ଭଦ୍ରକ,୨୯।୮(ସନାତନ ରାଉତ): ଭଦ୍ରକ ଚରମ୍ପା ରେଳ ଓଭର ବ୍ରିଜ ନିକଟରେ ଦୁଇ କିନ୍ନର ଗୋଷ୍ଠୀଙ୍କ ମଧ୍ୟରେ ଶୁକ୍ରବାର ରାତିରେ ମୁହାଁମୁହିଁ ହୋଇଛନ୍ତି। ଗୋଟିଏ କିନ୍ନର ଗୋଷ୍ଠୀ ଆକ୍ରମଣରେ ଅନ୍ୟ ଏକ କିନ୍ନର ଗୋଷ୍ଠୀର ୭ ଜଣ କିନ୍ନର ଆହତ ହୋଇଥିବାବେଳେ ୩ ଜଣ ଗୁରୁତର ଆହତ ହୋଇଛନ୍ତି l ସମସ୍ତ ଆହତ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି।
ତେବେ କିଛି ବର୍ଷ ହେବ ଭଦ୍ରକ ଚରମ୍ପା ଅଞ୍ଚଳରେ ଦୁଇ କିନ୍ନର ଗୋଷ୍ଠୀଙ୍କ ମଧ୍ୟରେ ତିକ୍ତତା ଲାଗି ରହିଛି l ଶୁକ୍ରବାର ବିଳମ୍ବିତ ରାତିରେ ଏହି ରେଳ ଓଭର ବ୍ରିଜ ନିକଟରେ ଗୋଟିଏ କିନ୍ନର ଗୋଷ୍ଠୀର ସଦସ୍ୟ ମାନେ ଅନୈତିକ କାର୍ଯ୍ୟରେ ଲିପ୍ତ ଥିବା ବେଳେ ଅନ୍ୟ ଏକ କିନ୍ନର ଗୋଷ୍ଠୀର ସଦସ୍ୟ ମାନେ ସେହି ରାସ୍ତାରେ ଯାଉଥିଲେ। ସେମାନଙ୍କୁ ଦେଖି ଅନୈତିକ କାର୍ଯ୍ୟରେ ଲିପ୍ତଥିବା କିନ୍ନର ଗୋଷ୍ଠୀ ବିଭିନ୍ନ ମରଣାସ୍ତ୍ରରେ ଆକ୍ରମଣ କରିଥିବା ନେଇ ଗୋଟିଏ କିନ୍ନର ଗୋଷ୍ଠୀ ଅଭିଯୋଗ କରିଛି l ପୂର୍ବରୁ କିନ୍ନର ମାନଙ୍କ ଅନୈତିକ କାର୍ଯ୍ୟକୁ ନେଇ ଗୋଟିଏ ଗୋଷ୍ଠୀ ବିରୋଧ କରି ଆସୁଥିଲେ l ଗ୍ରାମାଞ୍ଚଳ ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚି କିନ୍ନରମାନଙ୍କୁ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି l ତେବେ କିନ୍ନରମାନଙ୍କ ଭିତରେ ଗୋଷ୍ଠୀ ବିବାଦକୁ ନେଇ ପୂର୍ବରୁ ଭଦ୍ରକ ଏସପିଙ୍କ ପାଖରେ ଅଭିଯୋଗ ହୋଇଛି l ପୂର୍ବରୁ ମଧ୍ୟ ଏକାଧିକଥର ଉଭୟ ଗୋଷ୍ଠୀ ମଧ୍ୟରେ ଆକ୍ରମଣ ପ୍ରତି ଆକ୍ରମଣ ହୋଇଛି l ତେବେ ଏହି ଆକ୍ରମଣ ଘଟଣାରେ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ସେମାନଙ୍କୁ ନ୍ୟାୟ ଦିଆଯାଉ ବୋଲି ସୌମ୍ୟା ଓ ଶ୍ରାବଣୀ କିନ୍ନର ଦାବି କରିଛନ୍ତି l
Dharitri – Odisha’s No.1 Odia Daily
