ନୂଆଦିଲ୍ଲୀ,୨୦।୭: ପ୍ରମୁଖ ଇ-କମର୍ସ କମ୍ପାନୀର ବିଶ୍ୱ ବଜାର ବିକ୍ରି କାର୍ଯ୍ୟକ୍ରମ ଆମାଜନ ଗ୍ଲୋବାଲରେ ଦେଶର ଏମ୍ଏସ୍ଏମ୍ଇଗୁଡିକ ୨ ବିଲିୟନ ଡଲାର ସାମଗ୍ରୀ ରପ୍ତାନି କରିବାକୁ ସକ୍ଷମ ହୋଇଛନ୍ତି। ୨୦୧୫ରେ ଏହି କାର୍ଯ୍ୟକ୍ରମକୁ କମ୍ପାନୀ ଆରମ୍ଭ କରିଥିଲା। ଆମାଜନର ୧୫ ଓ୍ବେବ୍ସାଇଟରେ ବିଶ୍ୱବଜାରକୁ ରପ୍ତାନି ସୁଯୋଗ କମ୍ପାନୀଗୁଡିକ ଏହା ଦ୍ୱାରା ଲାଭ କରିବାକୁ ସକ୍ଷମ ହୋଇଥିଲେ। ମାତ୍ର କେତେଜଣ ସେଲରଙ୍କୁ ନେଇ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମରେ ବର୍ତ୍ତମାନ ସୁଦ୍ଧା ୬୦ ହଜାର ରପ୍ତାନିକାରୀ ଯୋଡି ହୋଇଛନ୍ତି। ୨୦୨୫ ସୁଦ୍ଧା ଏହି ବର୍ଗରେ ରପ୍ତାନିକୁ ୧୦ ବିଲିୟନ ଡଲାରକୁ ବଢ଼ାଇବାକୁ ଯୋଜନା ରଖାଯାଇଥିବା କମ୍ପାନୀ ପକ୍ଷରୁ ସୂଚନା ଦିଆଯାଇଛି। ଦେଶର ଏମ୍ଏସ୍ଏମ୍ଇ ବିଶ୍ୱବଜାରକୁ ଅଧିକ ସାମଗ୍ରୀ କିଭଳି ପଠାଇପାରିବେ ସେ ଦିଗରେ କେନ୍ଦ୍ର ସରକାର ପଦକ୍ଷେପ ଗ୍ରହଣ କରୁଥିବା କେନ୍ଦ୍ର ଏମ୍ଏସ୍ଏମ୍ଇ ମନ୍ତ୍ରୀ ନୀତିନ ଗଡକରୀ କହିଛନ୍ତି। ଏହି ଅବସରରେ ସେ ଗଡକରୀ ଆମାଜନର ରପ୍ତାନି ଡାଇଜେଷ୍ଟକୁ ଉନ୍ମୋଚନ କରିଥିଲେ। ଏଭଳି ଏକ ପଦକ୍ଷେପ ଦ୍ୱାରା ଦେଶର ଅଭିବୃଦ୍ଧିକୁ ତ୍ୱରାନ୍ବିତ କରିବା ସହ କମ୍ପାନୀଗୁଡିକର ଉନ୍ନତି ଏବଂ ନିଯୁକ୍ତି ସୃଷ୍ଟି ଦିଗରେ କାର୍ଯ୍ୟକ୍ରମ ଜାରି ରହିଛି ବୋଲି ଆମାଜନର ବରିଷ୍ଟ ଉପସଭାପତି ତଥା କଣ୍ଟ୍ରି ମୁଖ୍ୟ ଅମିତ ଅଗ୍ରଓ୍ବାଲ କହିଛନ୍ତି।
