ନୂଆଦିଲ୍ଲୀ,୧୪।୨: ଭାରତର ୧୯ ହଜାରରୁ ଊର୍ଦ୍ଧ୍ୱ ପିଲା ଫୁଟ୍ପାଥରେ ସେମାନଙ୍କ ମାଆବାପାଙ୍କ ସହ କିମ୍ବା ଏକାକୀ ରହୁଛନ୍ତି। ୮୮୨ ଶିଶୁ ଏକା ଏକା ରାସ୍ତା କଡ଼ରେ ଜୀବନ ପାଇଁ ସଂଗ୍ରାମ କରୁଛନ୍ତି। ଏକାକୀ ରହୁଥିବା ଶିଶୁଙ୍କ ମଧ୍ୟରୁ ଅଧିକାଂଶ ଉତ୍ତରପ୍ରଦେଶର ବୋଲି ବାଲ୍ ସ୍ବରାଜ ପୋର୍ଟାଲ ତଥ୍ୟରୁ ଜଣାପଡ଼ିଛି। ଏହି ତଥ୍ୟ ଅନୁଯାୟୀ ରାସ୍ତା ପାର୍ଶ୍ୱରେ ମୋଟ ୧୯,୫୪୬ ପିଲା ରହୁଛନ୍ତି। ମହାରାଷ୍ଟ୍ରରେ ସର୍ବାଧିକ ୫,୧୫୩ ଜଣ ଫୁଟ୍ପାଥ୍ରେ ଜୀବନ ଯାପନ କରୁଥିବାବେଳେ ଗୁଜରାଟରେ ୧,୯୯୦, ଦିଲ୍ଲୀରେ ୧,୮୫୩, ତାମିଲନାଡୁରେ ୧,୭୧୯, ମଧ୍ୟପ୍ରଦେଶରେ ୧,୪୯୧, କର୍ନାଟକରେ ୧,୨୨୦ ଏବଂ ଉତ୍ତରପ୍ରଦେଶରେ ୧,୦୩୮ ଜଣ ଶିଶୁ ରାସ୍ତା ପାର୍ଶ୍ୱରେ ରହିଛନ୍ତି। ଜାତୀୟ ଶିଶୁ ଅଧିକାର ସୁରକ୍ଷା କମିଶନ (ଏନ୍ସିପିସିଆର୍) ଏହି ଶିଶୁମାନଙ୍କ ଯତ୍ନ ନେବା ଆବଶ୍ୟକ ବୋଲି ବାଲ୍ ସ୍ବରାଜ ପୋର୍ଟାଲ ପକ୍ଷରୁ କୁହାଯାଇଛି।
ମୋଟ ୧୯,୫୪୬ ଜଣଙ୍କ ମଧ୍ୟରୁ ୧୦,୪୦୧ ଜଣ ରାସ୍ତା ପାର୍ଶ୍ୱରେ ସେମାନଙ୍କ ପରିବାର ସହ ରହୁଥିବାବେଳେ ୮,୨୬୩ ଜଣ ଦିନ ବେଳା ଫୁଟ୍ପାଥରେ ଏବଂ ରାତିରେ ସେମାନଙ୍କ ବସ୍ତିରେ ରହୁଛନ୍ତି। ୟୁପିର ୨୭୦ ପିଲା ବିନା ପରିବାର ଓ ମାଆବାପାଙ୍କ ସହାୟତାରେ ରାସ୍ତା ପାର୍ଶ୍ୱରେ ଜୀବନ ବିତାଉଛନ୍ତି। ଏହା ପଛକୁ ତାମିଲନାଡ଼ୁର ୧୨୪ ଥିବାବେଳେ କର୍ନାଟକର ୧୦୫, ଦିଲ୍ଲୀର ୬୧, ମଧ୍ୟପ୍ରଦେଶର ୪୫ ଏବଂ ମହାରାଷ୍ଟ୍ରର ୩୯ ପିଲା ରହିଛନ୍ତି। ଏହି ପିଲାମାନେ ମୁଖ୍ୟତଃ ଭିକ୍ଷା ମାଗି, ଛୋଟମୋଟ କାମ କରି କିମ୍ବା ରାସ୍ତା କଡ଼ରେ ବିଭିନ୍ନ ସାମଗ୍ରୀ ବିକ୍ରି କରି ଜୀବନ ବଞ୍ଚାଇଥାନ୍ତି ବୋଲି ଏନ୍ସିପିସିଆର୍ କହିଛି। ସେମାନଙ୍କ ମଧ୍ୟରୁ କେତେଜଣ ଭିନ୍ନକ୍ଷମ, ମାଆବାପା ଛେଉଣ୍ଡ ଯୋଗୁ ଏକୁଟିଆ ଫୁଟ୍ପାଥରେ ରହିବାକୁ ବାଧ୍ୟ ହୋଇଛନ୍ତି।
