ନୂଆଦିଲ୍ଲୀ,୩୧।୩:ଦେଶର ବୁଲେଟ୍ ଟ୍ରେନ ପ୍ରକଳ୍ପର ଅଗ୍ରଗତି ପାଇଁ ଜାପାନ ଇଣ୍ଟରନ୍ୟାଶନାଲ କୋଅପରେଶନ ଏଜେନ୍ସି (ଜେଆଇସିଏ) ଅଫିସିଆଲ୍ ଡେଭଲପମେଣ୍ଟ ଆସିଷ୍ଟାଣ୍ଟ (ଓଡିଏ) ଜରିଆରେ ଭାରତକୁ ୩୦୦ ବିଲିୟନ ୟେନ୍ (ଭାରତୀୟ ମୁଦ୍ରାରେ ପ୍ରାୟ ୧୮,୭୫୦ କୋଟି ଟଙ୍କା ) ଋଣ ଆକାରରେ ଯୋଗାଇଦେବ ବୋଲି ସୂଚନା ମିଳିଛି। ଏ ନେଇ ଉଭୟ ଭାରତ ଓ ଜାପାନ ମଧ୍ୟରେ ଏକ ଦ୍ୱିପାକ୍ଷିକ ରାଜିନାମା ସ୍ବାକ୍ଷର ହୋଇଥିବା ଜଣାପଡ଼ିଛି। ବିଶେଷକରି ମୁମ୍ବାଇ-ଅହମଦାବାଦ ହାଇସ୍ପିଡ୍ ରେଳ (ଏମ୍ଏଏଚ୍ଏସ୍ଆର୍) ପ୍ରକଳ୍ପର ଅଗ୍ରଗତି ହୋଇପାରିବ ବୋଲି କୁହାଯାଉଛି। ଏପରିକି ଏମ୍ଏଏଚ୍ଏସ୍ଆର୍ ବୁଲେଟ୍ ଟ୍ରେନ୍ ପ୍ରକଳ୍ପ ପାଇଁ ଉକ୍ତ ପରିମାଣର ଅର୍ଥରାଶି ଜାପାନ ଋଣ ଆକାରରେ ଯୋଗାଇଦେବ। ଏ ନେଇ ମଧ୍ୟ ଉଭୟ ଭାରତ ଓ ଜାପାନ ମଧ୍ୟରେ ବିସ୍ତୃତ ଆଲୋଚନା ହୋଇଥିବା ଉଭୟ ପକ୍ଷରୁ କୁହାଯାଇଛି। ସେହିଭଳି ଏକ ଏକକ ପ୍ରକଳ୍ପ ନିର୍ମାଣ ପାଇଁ ଜିକା ଦ୍ୱାରା ଦିଆଯାଇଥିବା ଉକ୍ତ ଋଣ ଜିକା ଇତିହାସରେ ଏକ ବିରଳ ରେକର୍ଡ ହୋଇଥିବା ବେଳେ ବିଶ୍ୱର ସର୍ବାଧିକ ଋଣ ମଞ୍ଜୁର ବୋଲି ଉକ୍ତ ଜାପାନୀ ସଂସ୍ଥା ପକ୍ଷରୁ ସୂଚନା ଦିଆଯାଇଛି।
ଅପରପକ୍ଷରେ ଭାରତୀୟ ଅର୍ଥନୀତି ବ୍ୟାପାର ବିଭାଗ ଓ ଅର୍ଥ ମନ୍ତ୍ରଣାଳୟର ଅତିରିକ୍ତ ମୁଖ୍ୟ ରଜତ କୁମାର ମିଶ୍ର ଓ ଜିକା ଭାରତ ପ୍ରତିନିଧି ମୁଖ୍ୟ ସାଇତୋ ମିତ୍ସୁନୋରୀଙ୍କ ମଧ୍ୟରେ ଉକ୍ତ ରାଜିନାମା ସ୍ବାକ୍ଷରିତ ହୋଇଥିବା ଜଣାପଡ଼ିଛି। ବିଶେଷକରି ଏମ୍ଏଏଚ୍ଏସ୍ଆର୍ ପ୍ରକଳ୍ପ ଜାପାନ-ଭାରତ ସହଯୋଗରେ ଏକ ପ୍ରତୀକ ବୋଲି ମିତ୍ସୁନୋରୀ କହିଛନ୍ତି। ଉଲ୍ଲେଖଯୋଗ୍ୟ, ୨୦୧୭ ଠାରୁ ଜିକା ମୁମ୍ବାଇ ଅହମଦାବାଦ ବୁଲେଟ ଟ୍ରେନ୍ ପ୍ରକଳ୍ପକୁ ବିଭିନ୍ନ ଦିଗରେ ସହଯୋଗ କରି ଆସୁଛି। ଉକ୍ତ ପ୍ରକଳ୍ପ ପାଇଁ ଜାପାନୀ ସଂସ୍ଥା ପ୍ରାୟ ୬୫୦ବିଲିୟନ ୟେନ୍ (୪୦,୬୨୬ କୋଟି ଟଙ୍କା ) ଦେବ ପୂର୍ବରୁ ବୋଲି ଘୋଷଣା କରିଛି। ସେହିପରି ଉକ୍ତ ପ୍ରକଳ୍ପ ପାଇଁ (ଏନ୍ଏଚ୍ଏସ୍ଆର୍ସିଏଲ୍) ହିନ୍ଦୁସ୍ଥାନ କନ୍ଷ୍ଟ୍ରକ୍ସନ କମ୍ପାନୀ ଲିମିଟେଡ୍ ଓ ମେଘା ଇଞ୍ଜିନିୟରିଂ ଆଣ୍ଡ ଇନ୍ଫ୍ରାଷ୍ଟ୍ରକ୍ଚରକୁ ବାନ୍ଦ୍ରା-କୁର୍ଲା କମ୍ପ୍ଲେକ୍ସରେ ଅଣ୍ଡର ଗ୍ରାଉଣ୍ଡ କରିଡର ନିର୍ମାଣ ପାଇଁ ୩,୬୮୧ କୋଟି କଣ୍ଟ୍ରାକ୍ଟ ଦେଇଛି।
