ପୋଲସରା,୩୦ା୪: ଜାଲ୍ ସାର୍ଟିଫିକେଟ ଦେଇ ଚାକିରି କରିଥିବା ଅଭିଯୋଗରେ ଜଣେ ଅଙ୍ଗନଓ୍ବାଡି କର୍ମୀଙ୍କୁ ବହିଷ୍କାର କରାଯାଇଛି। ସେ ହେଲେ ଗଞ୍ଜାମ ଜିଲା ପୋଲସରା ବ୍ଲକ ବିଲେଇଝୁରି ଗ୍ରାମର ବିଜ୍ଞାନୀ ପ୍ରଧାନ। ବିଜ୍ଞାନୀ ଅଙ୍ଗନୱାଡି କର୍ମୀ ଭାବେ ୨୦୦୩ ଏପ୍ରିଲରେ ନିଯୁକ୍ତି ପାଇଥିଲେ। ପୁରୁଷୋତ୍ତମପୁର ବ୍ଲକ ଅନ୍ତର୍ଗତ ଚିଙ୍ଗୁଡ଼ିଘାଇ ହାଇସ୍କୁଲରେ ୨୦୦୦ରେ ସେ ମାଟ୍ରିକ୍ ପାସ୍ କରିଥିଲେ। କିନ୍ତୁ ଜନ୍ମ ତାରିଖ ୪.୬.୧୯୮୫ ଥିବା ବେଳେ ଏହାକୁ ବଦଳାଇ ୪.୬.୧୯୮୧ କରି ଅଙ୍ଗନଓ୍ବାଡି କର୍ମୀ ଭାବେ ନିଯୁକ୍ତି ପାଇଥିଲେ। ବିଜ୍ଞାନୀ ୧୮ ବର୍ଷ ଧରି ଚାକିରି କରୁଥିଲେ ମଧ୍ୟ ବିଭାଗୀୟ ଅଧିକାରୀମାନେ କୌଣସି ପଦକ୍ଷେପ ନେଇ ନ ଥିଲେ। ୨୦୧୯ ନଭେମ୍ବର ୧୩ରେ ପୋଲସରା ବ୍ଲକରେ ଯୁଗ୍ମ ଅଭିଯୋଗ ଶୁଣାଣି ବେଳେ ବିଲେଇଝୁରି ଗ୍ରାମର କୃଷ୍ଣ ଚନ୍ଦ୍ର ସ୍ବାଇଁ ଜିଲାପାଳ ଓ ଏସ୍ପିଙ୍କୁ ଏ ନେଇ ଅଭିଯୋଗ କରିଥିଲେ। ପରେ ଘଟଣାର ତଦନ୍ତ ଆରମ୍ଭ ହୋଇଥିଲା। ଗତ ୮ ତାରିଖରେ ଛତ୍ରପୁର ଉପଜିଲାପାଳଙ୍କ କାର୍ଯ୍ୟାଳୟଠାରେ ସମସ୍ତଙ୍କ ଉପସ୍ଥିତିରେ ବିଜ୍ଞାନୀଙ୍କ କାଗଜପତ୍ର ଯାଞ୍ଚ କରାଯାଇଥିଲା। ଯାଞ୍ଚ ବେଳେ ଜାଲ୍ ସାର୍ଟିଫିକେଟ ଦେଇ ଚାକିରି କରିଥିବା ଜଣାପଡିଥିଲା। ଉପଜିଲାପାଳ ପ୍ରିୟ ରଞ୍ଜନ ପୃଷ୍ଟିଙ୍କ ନିର୍ଦ୍ଦେଶ କ୍ରମେ ପୋଲସରା ସିଡିପିଓ କୁନ୍ତଳା ନାୟକ ଚାକିରିରୁ ବିଜ୍ଞାନୀଙ୍କୁ ବହିଷ୍କାର କରିଛନ୍ତି।
