ତୁମୁଡିବନ୍ଧ,୨୫।୯,(ଦୀପକ କୁମାର ପରାସେଠ): ପରିତ୍ୟକ୍ତ ଝାଟି ମାଟି ଘରୁ ରାଶନ କାର୍ଡ ମିଳିବା ପରେ ଏବେ ଅନେକ ପ୍ରଶ୍ନ ଉଠିଛି। କିଏ ଆଉ କେଉଁ ଉଦ୍ଦେଶ୍ୟରେ ଏହାକୁ ଫିଙ୍ଗିଛି ତାହା ପ୍ରଶ୍ନବାଚୀ ହୋଇଥିବା ବେଳେ ବିଭାଗୀୟ ଅଧିକାରୀ ପଡିରହିଥିବା କାର୍ଡ଼କୁ ଉଦ୍ଧାର କରି ଜବତ କରିଥିବା ଜଣା ପଡ଼ିଛି। ଗୁରୁବାର ଏପରି ଘଟଣା କନ୍ଧମାଳ ଜିଲା ତୁମୁଡିବନ୍ଧ ବ୍ଳକରେ ଚର୍ଚ୍ଚାର ବିଷୟ ପାଲଟିଛି। ସୂଚନ ଅନୁସାରେ ତୁମୁଡିବନ୍ଧ ବ୍ଳକ କାର୍ଯ୍ୟାଳୟର ମାତ୍ର ଦେଢ଼ କିମି ଦୂରରେ ପତ୍ରପ ଜଙ୍ଗଲ ପାଖରେ ଥିବା ଏକ ଝାଟିମାଟି ପରିତ୍ୟକ୍ତ ଘରେ କିଛି ରାଶନ କାର୍ଡ ପଡ଼ିରହିଥିବା ସ୍ଥାନୀୟ ବାସିନ୍ଦା ଦେଖି ଗଣ ମାଧ୍ୟମ ପ୍ରତିନିଧିଙ୍କୁ ଜଣାଇଥିଲେ। ଗଣମାଧ୍ୟମ ପ୍ରତିନିଧିମାନେ ଘଟଣାସ୍ଥଳରେ ପହଞ୍ଚିି ତୁମୁଡିବନ୍ଧ ବ୍ଲକ ଯୋଗାଣ ନିରୀକ୍ଷଙ୍କୁ ଖବର ଦେବାରୁ ଯୋଗାଣ ନିରୀକ୍ଷକ ଘଟଣା ସ୍ଥଳରେ ପହଞ୍ଚି ସମସ୍ତ ରାଶନ କାର୍ଡ ଉଦ୍ଧାର କରି ଜବତ କରିଛନ୍ତି। ତେବେ ଏହି ଜବତ ହୋଇଥିବା ରାଶନ କାର୍ଡ ୧୭୬ଗୋଟି ଏବଂ ଏହା ଝିରିପାଣି ପଂଚାୟତର ବୋଲି ଜଣାପଡିଛି। ତଦନ୍ତରୁ ଜଣାପଡ଼ିଛି ଉକ୍ତ ପରିତ୍ୟକ୍ତ ଝାଟିମାଟି ଘର ହେଉଛି ଝିରିପାଣି ଯୋଗାଣ ସହାୟକ ବିରେନ୍ଦ୍ର ନାୟକଙ୍କ ବଡ଼ ଭାଇଙ୍କର। ତେବେ ପ୍ରଶ୍ନ ଉଠୁଛି ଯେ ଝିରିପାଣି ଭଳି ଆଦିବାସୀ ଅଧ୍ୟୁଷିତ ଭିତର ଅଞ୍ଚଳର ହିତାଧିକାରୀଙ୍କ ରାଶନ କାର୍ଡ ନ ଦିଆ ଯାଇ କାହିଁକି ନଷ୍ଟ କରିବା ଉଦ୍ଦେଶ୍ୟ ଅପଣାଇ ଥିଲେ ବିଭାଗୀୟ ଅଧିକାରୀ। କେବେଠାରୁ ଏହି ରାଶନ କାର୍ଡ ଫିଙ୍ଗା ଯାଇଛି ଏବଂ କେଉଁ କେଉଁ ଗ୍ରାମର ହିତାଧିକାରୀଙ୍କ ବୋଲି କିଛି ଜଣା ପଡ଼ିନାହିଁ। ତେବେ ଗରିବ ଲୋକମାନେ ପେଟ ପୋଷିବା ପାଇଁ ବାହାର ରାଜ୍ୟକୁ ଯାଇ ଦାଦନ ଶ୍ରମିକ ଭାବେ ଖଟୁଛନ୍ତି। ହେଲେ ଗରିବର ଦାନା ଛଡ଼ାଇ ବିଭାଗୀୟ ଅଧିକାରୀ ମାନେ ମାଲେ ମାଲ ହେଉଛନ୍ତି କି । ଉକ୍ତ ରାଶନ କାର୍ଡ ବାବଦରେ କେଉଁ ମାସ ଠାରୁ ଚାଉଳ ମଞ୍ଜୁର ହୋଇଛି ଓ ସେହି ଚାଉଳ କାହାକୁ ଦିଆଯାଉଛି ନା କାଗଜ କଲମରେ ହିତାଧିକାରୀଙ୍କୁ ଦିଆ ଯାଇଛି ତାହା ପ୍ରଶ୍ନବାଚୀରେ ରହିଛି। ତେବେ ଏହି ବାବଦରେ ତୁମୁଡିବନ୍ଧ ଯୋଗାଣ ନିରୀକ୍ଷକ ବିନୋଦ ଚନ୍ଦ୍ର ନାୟକଙ୍କୁ ପଚାରିବାରୁ ସେ ଏହି ରାଶନ କାର୍ଡ ଝିରିପାଣି ପଞ୍ଚାୟତର ଓ କିଏ କାହିଁକି ଫିଙ୍ଗିଛି ଏବଂ ସେହି ରାଶନ କାର୍ଡ ଯାଞ୍ଚ କରାଯିବା ସହିତ ତଦନ୍ତ କରାଯିବ ବୋଲି କହିଛନ୍ତି। ତେବେ ଏପରି ଘଟଣାକୁ ଅଞ୍ଚଳବାସୀ ନିନ୍ଦା କରିବା ସହିତ ତଦନ୍ତ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି।
