ବରଗଡ଼,୬।୪(ପ୍ରେମାନନ୍ଦ ଖମାରୀ): ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବ ଚଳିତବର୍ଷ ଉତ୍ସାହର ଉଦ୍ଦୀପନାର ସହିତ ଉଦ୍ଯାପିତ ହୋଇଥିଲା।ଅନ୍ୟବର୍ଷ ତୁଳନାରେ ଏଥର ମହୋତ୍ସବର ଆକର୍ଷଣ ସହିତ ଦର୍ଶକଙ୍କ ସଂଖ୍ୟା ମଧ୍ୟ ବଢ଼ିଥିବା ପରିଲକ୍ଷିତ ହୋଇଥିଲା। ତେବେ ଗତ ଧନୁଯାତ୍ରା ମହୋତ୍ସବକୁ ଆଉ ସପ୍ତାହକ ପରେ ୩ମାସ ବିତିଯିବ। କିନ୍ତୁ ଏ ଯାଏ ରାଜ୍ୟର ନୂଆଁ ଭାଜପା ସରକାର ମହୋତ୍ସବ ପାଇଁ କରିଥିବା ଘୋଷଣା ଗୁଡ଼ିକ ଅଧୁରା ରହିଯାଇଛି। ଏପର୍ଯ୍ୟନ୍ତ କଳାକାରମାନଙ୍କୁ ସହାୟତା ରାଶି ମିଳିପାରି ନଥିବାବେଳେ କୋଟିଏ ଅନୁଦାନରୁ ମାତ୍ର ଅଧେ ପହଞ୍ଚିଥିବା ଅଭିଯୋଗ ହୋଇଛି। ସେହିପରି କଂସ ଦରବାରରେ ରାଜ ଅତିଥିଭାବେ ଯୋଗଦେଇ ଖାଦ୍ୟ, ଯୋଗାଣ ଏବଂ ଖାଉଟୀ କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ମଥୁରାର ଖାଉଟୀମାନଙ୍କୁ ଗୋଟିଏ ମାସର ଅତିରିକ୍ତ ଚାଉଲ ଦିଆଯିବ ବୋଲି ଘୋଷଣା କରିଥିଲେ। ତାହା ମଧ୍ୟ ଏପର୍ଯ୍ୟନ୍ତ ମିଳି ନଥିବା ଅଭିଯୋଗ ହୋଇଛି। ଏହାକୁ ନେଇ ଅସନ୍ତୋଷ ଦେଖାଯାଇ ଥିବାବେଳେ ଶନିବାର ବରଗଡ଼ ନାଗରିକ ମଞ୍ଚ ଏଭଳି ଅଭିଯୋଗ ନେଇ ଜିଲାପାଳଙ୍କୁ ଫେରାଦ ହୋଇଥିଲା। ଧନୁଯାତ୍ରା ମହୋତ୍ସବ ସମିତିର ସଭାପତି ତଥା ଜିଲାପାଳ ଆଦିତ୍ୟ ଗୋୟଲଙ୍କ ଉଦ୍ଦେଶ୍ୟରେ ନାଗରିକ ମଞ୍ଚ ପକ୍ଷରୁ ଅତିରିକ୍ତ ଜିଲାପାଳ ମଧୁଛନ୍ଦା ସାହୁଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା। ରାଜ୍ୟ ସରକାର ଧନୁଯାତ୍ରା ମହୋତ୍ସବ ପାଇଁ ଯାହାସବୁ ଘୋଷଣା କରିଥିଲେ, ତାହା ତୁରନ୍ତ ପ୍ରଦାନ କରାଯିବାକୁ ନାଗରିକ ମଞ୍ଚ ଦାବିପତ୍ରରେ ଉଲ୍ଲେଖ କରିଛି।
ଗତ ଜାନୁୟାରୀ ମାସ ୩ତାରିଖରୁ ୧୩ତାରିଖ ଯାଏ ଦୀର୍ଘ ୧୧ଦିନ ବ୍ୟାପୀ ବରଗଡ଼ ଧନୁଯାତ୍ରା ମହୋତ୍ସବ ଚାଲିଥିଲା। ମହୋତ୍ସବକୁ ସ୍ଥାନୀୟ ବିଧାୟକ, ଏମ୍ପିଙ୍କଠାରୁ ଆରମ୍ଭ କରି ରାଜ୍ୟ ସରକାରଙ୍କ ବିଭିନ୍ନ ବିଭାଗର ମନ୍ତ୍ରୀ ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ ଅତିଥିଭାବେ ଆସିଥିଲେ। ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଉକ୍ତ ମହୋତ୍ସବରେ ରାଜ ଅତିଥିଭାବେ ଯୋଗଦାନ କରିଥିଲେ। ଧନୁଯାତ୍ରା ପାଇଁ ସରକାର କରିଥିବା ବିଭିନ୍ନ ଘୋଷଣାକୁ ସେମାନେ ପ୍ରତିଦିନ ଦୋହରାଇଥିଲେ। ଅନ୍ୟବର୍ଷ ତୁଳନାରେ ଏଥର ଅନୁଦାନ ରାଶି ମଧ୍ୟ ବହୁଗୁଣିତ ହୋଇଥିବା ଯୋଗୁ ଅଞ୍ଚଳବାସୀଙ୍କ ମଧ୍ୟରେ ଖୁସି ଦେଖାଯାଇଥିଲା। କିନ୍ତୁ ଏ ଯାଏ ସେହି ଘୋଷଣା ସମ୍ପୂର୍ଣ୍ଣଭାବେ କାର୍ଯ୍ୟକାରୀ ହୋଇ ନ ପାରିବା ସ୍ଥାନୀୟ ଲୋକଙ୍କୁ ବ୍ୟଥିତ କରିଛି।
ରାଜ୍ୟ ସରକାର ଧନୁଯାତ୍ରା ପାଇଁ ୧କୋଟି ଟଙ୍କା ଅନୁଦାନ ଘୋଷଣା କରିଥିଲେ। ଏହା ବ୍ୟତୀତ ଧନୁଯାତ୍ରାର ଲାଇଭ ବ୍ରୋଡ଼କାଷ୍ଟିଙ୍ଗ ପାଇଁ ଅତିରିକ୍ତ ୫୦ଲକ୍ଷ ଟଙ୍କା ଘୋଷଣା ହୋଇଥିଲା। ସେହିପରି ଧନୁଯାତ୍ରା ମହୋତ୍ସବରେ ଅଂଶଗ୍ରହଣ କରିଥିବା ୧୭୦ଜଣ କଳାକାରଙ୍କୁ ୧୦ହଜାର ଟଙ୍କା ଲେଖାଏ ସହାୟତା ପ୍ରଦାନ ପାଇଁ ଘୋଷଣା କରାଯାଇଥିଲା। କିନ୍ତୁ ସେହି ଘୋଷଣା ଅଧୁରା ରହିଯାଇଛି। ମୁଖ୍ୟମନ୍ତ୍ରୀ ଧନୁଯାତ୍ରା ମହୋତ୍ସବରେ ରାଜ ଅତିଥିଭାବେ ଯୋଗଦେଇ ମାତ୍ର ୬ଜଣ କଳାକାରଙ୍କୁ ୧୦ହଜାର ଟଙ୍କା ଲେଖାଏ ସହାୟତା ରାଶି ପ୍ରଦାନ କରିଥିବାବେଳେ ଏପର୍ଯ୍ୟନ୍ତ ଆହୁରି ୧୬୪ଜଣ କଳାକାରଙ୍କ ପାଖକୁ ସେମାନଙ୍କ ପ୍ରାପ୍ୟ ସହାୟତା ରାଶି ପହଞ୍ଚି ପାରି ନାହିଁ। ସେହିପରି ୧କୋଟି ଅନୁଦାନରୁ କେବଳ ୫୦ଲକ୍ଷ ଟଙ୍କା ଅନୁଦାନ ମିଳିଥିବା ସୂଚନା ଅଧିକାର ଆଇନରୁ ମିଳିଥିବା ତଥ୍ୟରୁ ଜଣାପଡ଼ିଛି ବୋଲି ନାଗରିକ ମଞ୍ଚ ଜିଲାପାଳଙ୍କୁ ଦେଇଥିବା ଦାବିପତ୍ରରେ ଉଲ୍ଲେଖ କରିଛି। ଏହା ସହିତ ଖାଦ୍ୟ, ଯୋଗାଣ ଓ ଖାଉଟୀ କଲ୍ୟାଣ ମନ୍ତ୍ରୀ ପାତ୍ର ରାଜ ଦରବାରରେ ମଥୁରାର ଖାଉଟୀମାନଙ୍କୁ ମାସକର ଅତିରିକ୍ତ ଚାଉଲ ପ୍ରଦାନ ନେଇ କରିଥିବା ଘୋଷଣା ମଧ୍ୟ ଘୋଷଣାରେ ସୀମିତ ରହିଯାଇଛି। ଏହାକୁ ନେଇ ଅସନ୍ତୋଷ ତେଜି ଉଠିଛି। ଏଭଳି ଅଭିଯୋଗ ନେଇ ବରଗଡ଼ ନାଗରିକ ମଞ୍ଚର ପ୍ରତିନିଧି ଦଳ ଜିଲାପାଳଙ୍କ କାର୍ଯ୍ୟାଳୟକୁ ଯାଇଥିଲେ। ଏହି ପ୍ରତିନିଧି ଦଳରେ ଭବାନୀ ସାହୁ, ଶୟନ ପଣ୍ଡା, ଶିବାନନ୍ଦ ମଟାରୀ, ନିଖିଳ ପାଣିଗ୍ରାହୀ, ଗଙ୍ଗା ପୂଝାରୀ, ମହେନ୍ଦ୍ର ପୁରୋହିତ, ସୁଦାମ ସାହୁ, ଅଲିମ ରିଜବି, ଗୋବିନ୍ଦ ଶର୍ମା ପ୍ରମୁଖ ରହଥିଲେ।
