ଅତୀତରେ ମଲାଲା ୟୁସୁଫଜାଇ ଆତଙ୍କବାଦ ବିରୋଧରେ ନିଜ ଲଢ଼େଇ ପାଇଁ ପ୍ରଶଂସାର ପାତ୍ର ହୋଇଥିଲେ। ଏବେ ସେଭଳି କିଛି କାମ କରି ଆଫଗାନିସ୍ତାନର ଜଣେ ୧୬ ବର୍ଷ ବୟସ୍କା ଯୁବତୀ ଚର୍ଚ୍ଚାର ପରିସରକୁ ଆସିଛନ୍ତି। ତାଲିବାନର ଆତଙ୍କବାଦୀମାନେ ମା’ବାପାଙ୍କୁ ହତ୍ୟା କରିବା ପରେ ଯୁବତୀଙ୍କ ଲଢ଼େଇ ସମସ୍ତଙ୍କ ପାଇଁ ଉଦାହରଣ ପାଲଟିଛି। ସେ ହେଲେ କମର ଗୁଲ।
ତାଲିବାନ ଆତଙ୍କବାଦୀମାନେ କମରଙ୍କ ମା’ବାପାଙ୍କୁ ଘରୁ ବାହାରକୁ ଟାଣି ଆଣି ନିର୍ଦ୍ଦୟ ଭାବେ ହତ୍ୟା କରିଥିଲେ। ଏହାପରେ କମଲ ହାତରେ ଏକେ-୪୭ ରାଇଫଲ ଧରି ଆତଙ୍କବାଦୀମାନଙ୍କୁ ଗୁଳି କରିଥିଲେ। ଏଥିରେ କିଛି ଆତଙ୍କବାଦୀ ଆହତ ହୋଇଥିଲେ।
ଯାହା ସୂଚନା ମିଳେ, କମରଙ୍କ ବାପା ଗାଁର ମୁଖିଆ ଏବଂ ସରକାରଙ୍କ ସମର୍ଥକ ଥିବାରୁ ସେମାନେ ତାଙ୍କୁ ଖୋଜୁଥିଲେ। ଜୁଲାଇ ୧୭ ତାରିଖ ରାତି ୧ଟାରେ କିଛି ଆତଙ୍କବାଦୀ କମଲଙ୍କ ଘରକୁ ପଶି ଆସିଥିଲେ। ବାପାଙ୍କୁ ଟାଣି ନେଉଥିବା ଦେଖି କମଲଙ୍କ ମା’ ତାହାର ବିରୋଧ କରିଥିଲେ। ଏଣୁ ଆତଙ୍କବାଦୀମାନେ ଉଭୟଙ୍କୁ ହତ୍ୟା କରିଥିଲେ। ଏହା ଦେଖି କମର ବାହାରକୁ ଆସି ବନ୍ଧୁକ ଧରି ଗୋଟିଏ ପରେ ଗୋଟିଏ ଗୁଳି ଚଳାଇଥିଲେ। ଏହି ସମୟରେ ତାଙ୍କ ସହ ତାଙ୍କ ଭାଇ ମଧ୍ୟ ଥିଲେ। ଏକ ଘଣ୍ଟା ଧରି ଗୁଳି ବିନିମୟ ଚାଲିଥିଲେ। ଏଥିରେ ୩ ଆତଙ୍କବାଦୀ ପ୍ରାଣ ହରାଇଥିଲେ। ବାକି ସମସ୍ତେ ସେଠାରୁ ଫେରାର ହୋଇଯାଇଥିଲେ।
କୁହାଯାଉଛି ଉକ୍ତ ସମୟରେ ୪୦ରୁ ଅଧିକ ଆତଙ୍କବାଦୀ ଥିଲେ। ସେମାନଙ୍କୁ ନ ଡ଼ରି କମର ପ୍ରତିଶୋଧ ନେଇଥିଲେ। ହେଲେ ଏହାର ଦୁଇ ଦିନ ପର୍ଯ୍ୟନ୍ତ ସେ କିଛି କହିପାରି ନ ଥିଲେ। ଏବେ ସୁରକ୍ଷାକର୍ମୀମାନେ କମର ଏବଂ ତାଙ୍କ ଭାଇଙ୍କୁ ସୁରକ୍ଷିତ ସ୍ଥାନକୁ ନେଇଯାଇଥିବା ଜଣାପଡ଼ିଛି। ସୋସିଆଲ ମିଡିଆରେ ଏବେ କମରଙ୍କ ଅନେକ ଫଟୋ ଭାଇରାଲ ହେଉଛି।
