ଭବାନୀପାଟଣା,୧୬।୧୦(ଉତ୍ତମ କୁମାର ଦାଶ):(୦୩) ଶାରଦୀୟ ଦୁର୍ଗାପୂଜା ପାଇଁ ସମୟ ଯେତେ ପାଖେଇ ଆସୁଛି, ପୂଜା ମଣ୍ଡପଗୁଡିକରେ ପ୍ରସ୍ତୁତି ସେତେ ଯୋର ଧରୁଛି। ଏପରିସ୍ଥଳେ କଳାହାଣ୍ଡି ଜିଲା ଭବାନୀପାଟଣା ସହରସ୍ଥିତ ନକଟିଗୁଡା ପୂଜା ମଣ୍ଡପ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି। ପ୍ରତିବର୍ଷ ପୂଜା କମିଟି ପକ୍ଷରୁ ନିଆରା ମଣ୍ଡପ ତିଆରି କରି ପଶ୍ଚିମ ଓଡ଼ିଶାରେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛି। ଏଠାରେ ବିଭିନ୍ନ ରୂପରେ ସୁନ୍ଦର ଓ ସୁଉଚ୍ଚ ଆକର୍ଷଣୀୟ ତୋରଣ ପ୍ରସ୍ତୁତ କରାଯାଏ। ଯାହାକି ହଜାର ହଜାର ଭକ୍ତଙ୍କ ମନମୋହିଥାଏ। ଚଳିତ ବର୍ଷ ନକଟିଗୁଡା ପୂଜା କମିଟି ପକ୍ଷରୁ ଢେଙ୍କାନାଳର କାରିଗରମାନଙ୍କ ଦ୍ୱାରା ଋଷିଆର ହର୍ମିଟେଜ୍ ମ୍ୟୁଜିୟମ ଆକୃତିର ତୋରଣ ନିର୍ମାଣ କରାଯାଇଛି। ଏଥର ନକଟିଗୁଡା ସାର୍ବଜନୀନ ଦୁର୍ଗା ପୂଜା ୧୩ ବର୍ଷରେ ପଦାର୍ପଣ କରିଛି।
ନକଟିଗୁଡ଼ାରେ ପ୍ରଥମେ ୨୦୧୧ରେ ପୁରୀ ଶ୍ରୀମନ୍ଦିର ଆକୃତିର ମଣ୍ଡପ ନିର୍ମାଣ କରାଯାଇଥିଲା। ୨୦୧୨ରେ ଚେନ୍ନାଇ ଆୟପ୍ପା ମନ୍ଦିର, ୨୦୧୩ରେ ତିରୁପତି ବାଲାଜୀ ମନ୍ଦିର, ୨୦୧୪ରେ କର୍ନାଟକ ବିଧାନ ସଭା, ୨୦୧୫ରେ ଅକ୍ଷରଧାମ ମନ୍ଦିର, ୨୦୧୬ରେ କୋଣାର୍କ ସୂର୍ଯ୍ୟ ମନ୍ଦିର, ୨୦୧୭ରେ ଋଷିକେଶ ମନ୍ଦିର, ୨୦୧୮ରେ ବୃନ୍ଦାବନ ଚଦ୍ରୋଦୟ ମନ୍ଦିର, ୨୦୧୯ରେ ଭୁବନେଶ୍ୱର ରାମମନ୍ଦିର ସଦୃଶ ପୂଜା ମଣ୍ଡପର ରୂପ ଦିଆଯାଇଥିଲା। କୋଭିଡ୍ ସମୟରେ କେବଳ ମା’ ଜଗତଜନନୀଙ୍କ ବିଧି ପୂଜା କରାଯାଇଥିଲା। ୨୦୨୨ରେ ରାଷ୍ଟ୍ରପତି ଭବନ ଆକୃତିର ପୂଜାମଣ୍ଡପ ଭକ୍ତଙ୍କ ମନମୋହିଥିଲା।
ଚଳିତବର୍ଷ ନକଟିଗୁଡାରେ ହର୍ମିଟେଜ ମ୍ୟୁଜିୟମ ଆକୃତିର ତୋରଣ ପ୍ରସ୍ତୁତି ହୋଇଛି। ପ୍ରାୟ ୧୦୦ ଫୁଟ ଲମ୍ବ ଓ ୭୦ ଫୁଟ ଉଚ୍ଚତା ବିଶିଷ୍ଟ ତୋରଣକୁ ୧୫ରୁ ଊର୍ଦ୍ଧ୍ୱ କୁଶଳୀ କାରିଗର ପ୍ରସ୍ତୁତ କରିଛନ୍ତି। ଚଳିତ ବର୍ଷ ମଧ୍ୟ ଏହା ମୁଖ୍ୟ ଆକର୍ଷଣ ହେବ ବୋଲି ଆଶା ରଖିଛନ୍ତି କମିଟି କର୍ମକର୍ତ୍ତା। ପୂଜା ସମୟ ମଧ୍ୟରେ ମା’ ମାଣିକେଶ୍ବରୀଙ୍କ ବିଶ୍ୱବିଖ୍ୟାତ ଛତରଯାତ୍ରା ପାଇଁ ଭବାନୀପାଟଣାରେ ଲକ୍ଷ ଲକ୍ଷ ଭକ୍ତଙ୍କ ସମାଗମ ହୋଇଥାଏ। ସେହି ସମୟରେ ପୂଜା ମଣ୍ଡପ ଭକ୍ତମାନଙ୍କ ଆକର୍ଷଣ ପାଲଟିଥାଏ। ଚଳିତବର୍ଷ ମଧ୍ୟ ଲକ୍ଷାଧିକ ଭକ୍ତଙ୍କ ସମାଗମ ହେବା ଆଶା କରାଯାଉଛି। ଭକ୍ତମାନଙ୍କ ମନରେ ଉତ୍ସାହ ଉଦ୍ଦୀପନା ସହ ଆଧ୍ୟାତ୍ମିକ ବାତାବରଣ ସୃଷ୍ଟି କରିବା ଓ ମନୋରଞ୍ଜନର ଖୋରାକ ଯୋଗାଇବା ପାଇଁ ପ୍ରୟାସ କରୁଛୁ ବୋଲି ନକଟିଗୁଡା ଦୁର୍ଗାପୂଜା କମିଟି ସଭାପତି ସାମନ୍ତ ଖମାରୀ, ସମ୍ପାଦକ ସୁକାନ୍ତ ବିଶି ଓ କମିଟି କର୍ମକର୍ତ୍ତା ପ୍ରକାଶ କରିଛନ୍ତି।
