ଧର୍ମଶାଳା,୨୯ା୩(ଶିବପ୍ରସାଦ ମହାନ୍ତି): ଯାଜପୁର ଜିଲାର ପବିତ୍ର ବୈତରଣୀ ନଦୀକୂଳରେ ସୁଉଚ୍ଚ ଧ୍ୟାନମଗ୍ନ ଶିବ ମୂର୍ତ୍ତି ନିର୍ମାଣ କାର୍ଯ୍ୟ କେବେ ଶେଷ ହେବ ତାକୁ ନେଇ ପ୍ରଶ୍ନ ଉଠିଛି। ୨୦୨୧ରୁ ଆରମ୍ଭ ହୋଇଥିବା ଏହି କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି ବୋଲି ଶୁଣିବାକୁ ମିଳୁଥିଲେ ସୁଦ୍ଧା କେବେ ଶେଷ ହେବ ବୋଲି ଜିଲାବାସୀ ଅପେକ୍ଷା କରିଛନ୍ତି। ପର୍ଯ୍ୟଟନର ବିକାଶ ପାଇଁ ଜିଲାର ବିଭିନ୍ନ ସ୍ଥାନରେ ଚାଲିଛି ବିକାଶମୂଳକ ପ୍ରକଳ୍ପ କାର୍ଯ୍ୟ। ଏହା ଭିତରେ ଏବେ ଅନ୍ୟତମ ନିର୍ମାଣ ଚାଲିଥିବା ପ୍ରକଳ୍ପ କାର୍ଯ୍ୟ ହେଉଛି ସୁଉଚ୍ଚ ଧ୍ୟାନମଗ୍ନ ଶିବ ମୂର୍ତ୍ତି। ଏହି ମୂର୍ତ୍ତି ସାରା ଓଡ଼ିଶାର ଉଚ୍ଚତମ ମୂର୍ତ୍ତି ହେବ ବୋଲି ଆକଳନ ହେଉଛି। ତେବେ ପୂର୍ବରୁ ରାଜ୍ୟର ରାଉରକେଲାରେ ଥିବା ହନୁମାନ ବାଟିକାରେ ୭୫ ଫୁଟର ହୁନମାନ ମୂର୍ତ୍ତି ରହିଥିବା ବେଳେ କୋରାପୁଟର ଦାମନଯୋଡ଼ିଠାରେ ୧୦୮ ଫୁଟ ଉଚ୍ଚତାର ହନୁମାନ ମୂର୍ତ୍ତି ରହିଛି। ତେବେ ଏହି ମୂର୍ତ୍ତିଠାରୁ ଯାଜପୁରରେ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ୧୨୩ ଫୁଟର ଧ୍ୟାନମଗ୍ନ ଶିବ ମୂର୍ତ୍ତି ନିର୍ମାଣ ଚାଲିଛି । ଏହି କାର୍ଯ୍ୟ ସମ୍ପୂର୍ଣ୍ଣ ହେଲେ ଅଧିକରୁ ଅଧିକ ପର୍ଯ୍ୟଟକ ଜିଲାକୁ ଆସିବେ ବୋଲି ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆକଳନ କରାଯାଉଛି। ଏହି ଶିବ ମୂର୍ତ୍ତିର ନିର୍ମାଣ କାର୍ଯ୍ୟର ପ୍ରଥମେ ମୂଲ୍ୟ ୯ କୋଟି ୮୦ ଲକ୍ଷ ୪୨ହଜାରରେ କାମ ଆରମ୍ଭ ହୋଇଥିଲା। କିନ୍ତୁ ବର୍ତ୍ତମାନ ସ୍ଥିତିରେ ଏହାର ଚତୁଃପାର୍ଶ୍ୱରେ ସୋନ୍ଦର୍ଯ୍ୟ କରଣ ନିମନ୍ତେ ଆହୁରି ୮କୋଟି ଟଙ୍କାରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇସାରିଥିବା ସୂଚନା ମିଳିଛି।
ଅନ୍ୟପଟରେ ଜିଲାକୁ ପର୍ଯ୍ୟଟକମାନେ ପହଞ୍ଚି ମା’ ବିରଜା ମନ୍ଦିର, ଦଶାଶ୍ବମେଧ ଘାଟ, ଉଦୟଗିରି ଓ କୁସୁମା ଭଳି ସ୍ଥାନ ବୁଲିଥାନ୍ତି। ତେବେ ଆଗକୁ ଏହି ସୁଉଚ୍ଚ ଶିବ ମୂର୍ତ୍ତି ନିର୍ମାଣ କାର୍ଯ୍ୟ ଶେଷ ହେଲେ ପର୍ଯ୍ୟଟନ କ୍ଷେତ୍ରରେ ଆଉ ପ।ଦେ ପର୍ଯ୍ୟଟକଙ୍କୁ ଯାଜପୁରରେ ଆକୃଷ୍ଟ କରିବା ନେଇ ବୁଦ୍ଧିଜୀବୀ କହିଛନ୍ତି। ଜିଲା ପ୍ରଶାସନ ଏହା ଉପରେ ଦୃଷ୍ଟି ଦେବାକୁ ଦାବି ହୋଇଛି।
