ନନ୍ଦପୁର, ୩୧ା୧୨(ଶଙ୍କର ପୂଜାରୀ)କୋରାପୁଟ ଜିଲା ନନ୍ଦପୁର ବ୍ଲକ ଅନ୍ତର୍ଗତ ପାଡୁଆ ପଞ୍ଚାୟତର ୧୨ଟି ଗ୍ରାମ ବିକାଶରେ ରେଳଧାରଣା ବାଧକ ସାଜିଛି। ଏହି ଗ୍ରାମଗୁଡିକ ବିଶାଖାପାଟଣା-କିରାଣ୍ଡୁଲ ରେଳ ଧାରଣା ଆରପଟେ ରହିଛି। ରେଳ ଧାରଣା ଆରପଟକୁ ଭାରିଯାନ ଯାତାୟାତ ନିଷେଧ ଥିବାରୁ ସରକାରଙ୍କ ବିଭିନ୍ନ ଯୋଜନା ଲୋକଙ୍କ ନିକଟରେ ପହଞ୍ଚତ୍ପାରୁନାହିଁ। ଉକ୍ତ ରେଳଧାରଣାର ଦାର୍ଲିପୁଟ ଷ୍ଟେଶନ ନିକଟରେ ଭୂତଳ ସେତୁ ନିର୍ମାଣ ନିମନ୍ତେ ୫ା୨ା୨୦୧୯ରେ ମୁଖ୍ୟମନ୍ତ୍ରୀ ଆଭାସି ମାଧ୍ୟମରେ କୋରାପୁଟ ଜିଲାରେ ୭ଟି ଭୂତଳ ସେତୁର ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏହି ସମୟରେ ତତ୍କାଳୀନ ପଟ୍ଟାଙ୍ଗି ବିଧାୟକ ପ୍ରଫୁଲ୍ଲ ପାଙ୍ଗୀ ଉପସ୍ଥିତ ଥିଲେ। ମାତ୍ର ଭିତ୍ତିପ୍ରସ୍ତର ସ୍ଥାପନର ୪ବର୍ଷ ବିତିଯାଇଥିବା ସତ୍ତ୍ୱେ ଉକ୍ତ ଜାଗାରେ ଭୂତଳସେତୁ ନିର୍ମାଣର କୌଣସି ପ୍ରକ୍ରିୟା ଏଯାଏ ଆରମ୍ଭ ହୋଇନାହିଁ। ଫଳରେ ରେଳ ଧାରଣା ଆରପଟେ ଥିବା ୧୨ ଗ୍ରାମବାସୀ ସରକାରଙ୍କ କୌଣସି ଯୋଜନାରୁ ଉପକୃତ ହୋଇପାରୁନାହାନ୍ତି। ଫଳରେ ଏନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଏହି ଭୂତଳ ସେତୁ ନିର୍ମାଣ ହେଲେ ପାଡୁଆ ପଞ୍ଚାୟତ ହାତୀବାରି ପଞ୍ଚାୟତ ସହ ସଂଯୋଗ ହେବ। ଅନ୍ୟପକ୍ଷରେ ଭୂତଳ ସେତୁ ନିର୍ମାଣ ବଦଳରେ ଏବେ ରେଳ ଧାରଣାର ଆରପଟେ ପ୍ରଧାନମନ୍ତ୍ରୀ ସଡ଼କ ଯୋଜନାରେ ରାସ୍ତା କାମ ଆରମ୍ଭ ହୋଇଛି। ରେଳଧାରଣା ଆରପଟକୁ ଭାରିଯାନ ଚଳାଚଳ ନିଷେଧ ଥିବାରୁ ରାସ୍ତା ନିର୍ମାଣରେ ବ୍ୟବହୃତ କୌଣସି ସାମଗ୍ରୀ ନେବା ଆଣିବା କରିବା କଷ୍ଟକର ହେଉଛି। ରାଜ୍ୟ ସରକାର, ରେଳ ବିଭାଗ କର୍ତ୍ତୃପକ୍ଷ ଓ ଜିଲା ପ୍ରଶାସନ ଏଥିପ୍ରତି ଦୃଷ୍ଟିଦେଇ ପଦକ୍ଷେପ ଗ୍ରହଣ କରିବାକୁ ପାଡ଼ୁଆ ପଞ୍ଚାୟତର ଗାଲଗଣ୍ଡା, ଦାର୍ଲିପୁଟ, ପୂଜାରିପୁଟ, ଗୁମିଗୁଡ଼ା, ଗତରଖଣ୍ଡା, ଗୁଞ୍ଜିଗୁଡ଼ା, ବାଲିଘାଟ, ସଦରଆମ୍ବ, ଫୁଲଗୁଡ଼ା, କଟରାଗୁଡା, ଆମ୍ବାପଡ଼ା ଓ ଜୋଗିବାରି ଗ୍ରାମବାସୀ ଦାବି କରିଛନ୍ତି। ଅନ୍ୟପକ୍ଷରେ ବିଶାଖାପାଟଣା କିରାଣ୍ଡୁଲ ରେଳଧାରଣାର ଦୋହରୀକରଣ କାର୍ଯ୍ୟ ଚାଲିଥିବାରୁ ଏବେ ଭୂତଳ ସେତୁ ନିର୍ମାଣକଲେ ରେଳଧାରଣାର କୌଣସି କ୍ଷତି ହେବନାହିଁ ବୋଲି ସାଧାରଣରେ ମତ ପ୍ରକାଶ ପାଉଛି।
