ଛତ୍ରପୁର,୧୧।୧୨(ଦିଲ୍ଲୀପ ସାମଲ): ଗଞ୍ଜାମ ଜିଲା ଛତ୍ରପୁର ଉପଖଣ୍ଡ ଚିକିତ୍ସାଳୟରେ ୧୦୮ ଆମ୍ବୁଲାନ୍ସ ସେବା ବନ୍ଦ ରହିଛି। ଫଳରେ ରୋଗୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି। ଏହି ସେବା ନ ମିଳିବାରୁ ବହୁ ଲୋକ ଅଟୋରେ ଭଡାକରି ଆସୁଥିବା ଦେଖିବାକୁ ମିଳିଛି l ରୋଗୀ ଓ ତାଙ୍କ ସମ୍ପର୍କୀୟମାନେ ଅଧିକ ଖର୍ଚ୍ଚାନ୍ତ ହେବାକୁ ପଡୁଛି। ଏପରିକି ସଠିକ ସମୟରେ ୧୦୮ ସେବା ନ ମିଳିଲେ ତେବେ ଜୀବନ ଚାଲିଯିବାର ମଧ୍ୟ୍ୟ ଆଶଙ୍କା ରହିଛି ବୋଲି ରୋଗୀଙ୍କ ସମ୍ପର୍କୀୟମାନେ କହିଛନ୍ତି। ଅନ୍ୟ ପକ୍ଷରେ ବିଭିନ୍ନ ଦାବି ନେଇ ୧୦୮ ଆମ୍ବୁଲାନ୍ସ କର୍ମଚାରୀମାନେ ଦାବିପତ୍ର ପ୍ରଦାନ କରିଥିଲେ l ଦାବି ପୁରଣ ନ ହେବାରୁ ୧୦୮ ଆମ୍ବୁଲାନ୍ସ କର୍ମଚାରୀମାନେ ଜିପିଏସ ସେବା ବନ୍ଦ କରି ଆନ୍ଦୋଳନ କରିଛନ୍ତି। ସେମାନେ ଜିପିଏସ ବନ୍ଦ କରି ସେବା ଯୋଗାଇବେ ବୋଲି କହିଛନ୍ତି। ଜିପିଏସ ବନ୍ଦ କରିଥିବାରୁ କଲ ଦେବା ପାଇଁ କମ୍ପାନୀ କର୍ତ୍ତୃପକ୍ଷ ଅନୁମତି ଦେଉ ନ ଥିବା ସେମାନେ କହିଛନ୍ତି। ଏପରିକି ୧୨ ଘଣ୍ଟା ଡ୍ୟୁଟି କରିବାକୁ ବିରୋଧ କରିବା ସହିତ ୧୦୦ ଜଣ କର୍ମଚାରୀଙ୍କୁ ଚାକିରିରୁ ଛଟେଇକୁ ପ୍ରତିବାଦ କରି ସେମାନେ ଆନ୍ଦୋଳନକୁ ଓହ୍ଲାଇଥିଲେ l
