ଜଗତ୍ସିଂହପୁର ଅଫିସ,୩ା୪: ଜଗତ୍ସିଂହପୁର ଜିଲାରେ ୨୦୨୨ରେ ୨୪୮ଟି ସଡ଼କ ଦୁର୍ଘଟଣା ଘଟି ୧୦୭ ଜଣଙ୍କ ମୃତ୍ୟୁ ଘଟିଛି। ଏହା ୨୦୨୧ ବର୍ଷ ଅପେକ୍ଷା ୦.୮% ଅଧିକ। ଜିଲା ସଡ଼କ ସୁରକ୍ଷା ସମିତି ଆନୁକୂଲ୍ୟରେ ଏପ୍ରିଲ ୧ରୁ ଆରମ୍ଭ ହୋଇଥିବା ଶୂନ୍ୟ ସଡ଼କ ଦୁର୍ଘଟଣା ମୃତ୍ୟୁ ସପ୍ତାହ ପାଳନ ଅବସରରେ ଏହି ସୂଚନା ଦିଆଯାଇଛି। ଏହା ଆସନ୍ତା ୭ ତାରିଖ ପର୍ଯ୍ୟନ୍ତ ଚାଲିବ। ଏ ସମ୍ପର୍କରେ ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ସିଆଇଡିଓ ଏବଂ ଓଡ଼ିଶା କ୍ରାଇମବ୍ରାଞ୍ଚ ତଥ୍ୟ ଅନୁସାରେ ୨୦୨୧ ତୁଳନାରେ ୨୦୨୨ରେ ସଡ଼କ ଦୁର୍ଘଟଣାଜନିତ ମୃତ୍ୟୁ ହାର ୭.୬୦ ବଢ଼ିଛି। ତେଣୁ ପ୍ରତ୍ୟେକ ଦୁର୍ଘଟଣାକୁ ଏଡ଼ାଇବା ପାଇଁ ସଚେତନ ରହିବା ଜରୁରୀ। ଯେପରି ରାସ୍ତାରେ ଯାତାୟାତ କରୁଥିବା ସମୟରେ ନିୟମ ମାନିବା, ଗାଡ଼ି ଚଳାଇବା ସମୟରେ ମୋବାଇଲ ଫୋନ ବ୍ୟବହାର ନ କରିବା, ୨ ଚକିଆ ଯାନ ଚଳାଉଥିବା ସମୟରେ ହେଲମେଟ୍ ବ୍ୟବହାର, ୨ ଚକିଆ ଯାନରେ ୨ ଜଣରୁ ଅଧିକ ନ ବସିବା, ମାଦକ ଦ୍ରବ୍ୟ ସେବନ କରି ଗାଡି ନ ଚଳାଇବା, ୧୮ ବର୍ଷରୁ କମ୍ ପିଲାଙ୍କୁ ଗାଡ଼ି ଚଳାଇବାକୁ ଦିଆ ନ ଯିବା ଇତ୍ୟାଦି ବିଷୟରେ ସଚେତନତା ସୃଷ୍ଟି କରିବା ଆବଶ୍ୟକ। ଏହାବାଦ୍ ଗାଡ଼ି ଚଳାଇବା ପୂର୍ବରୁ ବ୍ରେକ୍, ହର୍ଣ୍ଣ, ଇଣ୍ଡିକେଟର, ଟାୟାର ପ୍ରେସର, ଇଞ୍ଜିନ ତେଲ ପରୀକ୍ଷା ସହ ଗାଡ଼ି କାଗଜପତ୍ର ସାଙ୍ଗରେ ନେବା ବିଧେୟ। ୪ ଚକିଆ ଗାଡ଼ି ଚଳାଇବା ବେଳେ ସିଟ୍ ବେଲ୍ଟ ବ୍ୟବହାର ସାଙ୍ଗକୁ ପାର୍କିଂ ପ୍ଲେସ୍ରେ ରଖିବାକୁ ବାର୍ତ୍ତା ଦିଆଯାଉଛି। ଗୃହପାଳିତ ପ୍ରାଣୀଙ୍କୁ ରାସ୍ତା ଉପରକୁ ଛାଡ଼ିବା ଉଚିତ ନୁହେଁ। ଏଥିସହ ଅଯଥା ରାସ୍ତା ଅବରୋଧ ନ କରିବାକୁ ପରାମର୍ଶ ଦିଆଯାଉଛି। ଶିକ୍ଷାନୁଷ୍ଠାନ, ଡାକ୍ତରଖାନା ଓ ବିଭିନ୍ନ କାର୍ଯ୍ୟାଳୟ ନିକଟରେ କର୍କଶ ସ୍ବରରେ ହର୍ଣ୍ଣ ବଜାଇବା ଆଦୌ ଗ୍ରହଣୀୟ ନୁହେଁ। ଆବଶ୍ୟକଠାରୁ ଅଧିକ ଗତିରେ ଗାଡ଼ି ଚଳାଇବା ବିପଦକୁ ଆମନ୍ତ୍ରଣ ସହ ସମାନ। ଅସୁସ୍ଥ ଥିଲେ ଗାଡ଼ି ଚଳାଇବା ନିରାପଦ ନୁହେଁ। କ୍ଷମତାଠାରୁ ଅଧିକ ଓଜନର ମାଲ୍, ଯାତ୍ରୀ ପରିବହନ ଉପରେ କଟକଣା ରହିଛି। ଯଦି ଏହି ନିୟମଗୁଡ଼ିକୁ କେହି ଅବମାନନା କରନ୍ତି ଆଇନ ଅନୁଯାୟୀ ଦଣ୍ଡିତ ହେବେ ବୋଲି ଆଞ୍ଚଳିକ ପରିବହନ ଅଧିକାରୀ ନିର୍ମଳ ମହାନ୍ତି ସୂଚନା ଦେଇଛନ୍ତି।
