ନୂଆଦିଲ୍ଲୀ,୨୯।୧୨: ଭାରତର ଟେକ୍ନୋଲୋଜି ଏବଂ ନବସୃଜନ କ୍ଷେତ୍ରରେ ଦେଶର କ୍ଷମତାକୁ ଚିହ୍ନଟ କରିବା ପାଇଁ ଗତ ୬ ମାସ ମଧ୍ୟରେ ପ୍ରାୟ ୧୦,୦୦୦ ଷ୍ଟାର୍ଟ ଅପ୍ ଆସିଥିଲା ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଇଣ୍ଡିଆନ ଇନ୍ଷ୍ଟିଚ୍ୟୁ ଅଫ୍ ଟେକ୍ନୋଲୋଜି (ଆଇଆଇଟି)ର ଛାତ୍ରୀଛାତ୍ରମାନଙ୍କୁ ଉଦ୍ବୋଧନ ଅଭିଭାଷଣରେ ପ୍ରଶଂସାକରି ଏଭଳି କିଛି ସୂଚନା ପ୍ରଦାନ କରିଛନ୍ତି। ମୋଦି ଆଇଆଇଟି କାନପୁରର ୫୪ତମ ସମାବର୍ତ୍ତନ ସମାରୋହକୁ ସମ୍ବୋଧିତ କରି କହିଥିଲେ, ଭାରତ ହେଉଛି ବିଶ୍ୱର ୨ୟ ବୃହତ୍ତମ ଷ୍ଟାର୍ଟ ଅପ୍ ହବ୍ ଏବଂ ୟୁନିକର୍ନ ପାଇଁ ତୃତୀୟ ବୃହତ୍ତମ ଯାହା ଆମର ଆଇଆଇଟି ଛାତ୍ରମାନଙ୍କ ପାଇଁ ସମ୍ଭବ ହୋଇପାରିଛି ।
ଏହି ଅବସରରେ ସେ କହିଛନ୍ତି, ଭାରତରେ ବର୍ତ୍ତମାନ ୭୫ରୁ ଅଧିକ ୟୁନିକର୍ନ ଥିବାବେଳେ ଷ୍ଟାର୍ଟ ଅପ୍ ସଂଖ୍ୟା ପ୍ରାୟ ୫୦,୦୦୦ ରହିଛି। ବିଶେଷକରି ଗତ ୬ ମାସ ମଧ୍ୟରେ ପ୍ରାୟ ୧୦,୦୦୦ ଷ୍ଟାର୍ଟ ଅପ୍ ଆସିଛନ୍ତି ବୋଲି ମୋଦି ମତବ୍ୟକ୍ତ କରିଛନ୍ତି। ଜଗତୀକରଣକୁ ନେଇ ଆଜି ଅନେକ ବିତର୍କ ଚାଲିଛି। ଏହା ମଧ୍ୟରେ ଭାରତୀୟ କମ୍ପାନୀ ଏବଂ ଉତ୍ପାଦଗୁଡିକ ସର୍ବଭାରତୀୟ ସ୍ତରରେ ଲକ୍ଷ୍ୟ କରିବାର ସୁଯୋଗ ପାଇଛନ୍ତି। ଦେଶର ଛାତ୍ରୀଛାତ୍ରଙ୍କ ସାମର୍ଥ୍ୟ ଉପରେ ମୋର ବିଶ୍ୱାସ ରହିଛି ଏବଂ ନିଶ୍ଚିତ କରିବାକୁ ଚାହୁଁଛି ଯେ ସରକାର ଆପଣଙ୍କ ସହ ସବୁ ସମୟରେ ଛିଡ଼ା ହେବେ। ସେହିପରି ସ୍ବାଧୀନତାର ୨୫ବର୍ଷ ପର୍ଯ୍ୟନ୍ତ ଭାରତ ଯାହା ପାଇବା ଉଚିତ ତାହା ହାସଲ କରିପାରିଲା ନାହିଁ। ଫଳରେ ସେ ସମୟର ଯୁବସମାଜ ତାଙ୍କର ମୂଲ୍ୟବାନ୍ ସମୟ ପ୍ରାୟ ୨ପିଢ଼ି ପର୍ଯ୍ୟନ୍ତ ହରାଇଲୁ। ବର୍ତ୍ତମାନ ଆମକୁ ନଷ୍ଟ କରିବାକୁ ଆଉ ସମୟ ନାହିଁ। ବର୍ତ୍ତମାନ ଏକବିଂଶ ଶତାବ୍ଦୀର ଜ୍ଞାନକୌଶଳ ଓ ଟେକ୍ନୋଲୋଜି ଚାଳିତ ବୋଲି ମୋଦି କହିଛନ୍ତି, ପ୍ରତ୍ୟେକ କ୍ଷେତ୍ରରେ ଟେକ୍ନୋଲୋଜି ବ୍ୟାପି ଚାଲିଛି। ଆଇଆଇଟି ଟେକ୍ନୋଲୋଜି ଇନ୍କ୍ୟୁବେସନ ସେଣ୍ଟର ଭାବେ କାର୍ଯ୍ୟ କରି ଚାଲିଛି। ଆପଣ ବିଶ୍ୱସ୍ତରରେ ଟେକ୍ନୋଲୋଜି କ୍ଷେତ୍ରରେ ଅବଦାନ ରଖିବା ପାଇଁ ସଜ୍ଜିତ ହୋଇଛନ୍ତି। ବୈଜ୍ଞାନିକ ଅନୁସନ୍ଧାନ କ୍ଷେତ୍ରରେ ଆଇଆଇଟି କାନପୁରର ଅବଦାନକୁ ପ୍ରଶଂସା କରି ମୋଦି କହିଛନ୍ତି, ଏହାର ଛାତ୍ରମାନେ ସେମାନଙ୍କ ଅନୁଷ୍ଠାନର ଗୌରବମୟ ଉତ୍ତରାଧିକାରୀ ଧାରା ବଜାୟ ରଖିବା ଉଚିତ। କାନପୁର ଆଇଆଇଟିର କାର୍ଯ୍ୟକ୍ରମ ପରେ ମୋଦି ୧୧,୦୦୦ କୋଟି ଟଙ୍କା ବିନିଯୋଗରେ ନିର୍ମାଣ ହେଉଥିବା କାନପୁର ମେଟ୍ରୋ ରେଳ ପ୍ରକଳ୍ପର ପ୍ରଥମ ପର୍ଯ୍ୟାୟର ଉଦ୍ଘାଟନ କରିଥିଲେ।
