ଭଞ୍ଜନଗର,୨୯।୧୨(ବାବୁଲା ପ୍ରଧାନ): ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ମୁଜାଗଡ଼ ରେଞ୍ଜ ଗୁଣ୍ଡିରିବାଡ଼ି ନିକଟରେ ହାତୀପଲ ଜଣେ ଚାଷୀଙ୍କ ଜମିରେ ଥିବା ଘରକୁ ଭାଙ୍ଗି ସମ୍ପୂର୍ଣ୍ଣ ନଷ୍ଟ କରିଦେବା ସହ ଉକ୍ତ ଘରେ ଥିବା ୧୦ ବସ୍ତା ଧାନକୁ ଖାଇ ଦେଇଛନ୍ତି।
ପ୍ରକାଶ ଯେ, କିଛିଦିନ ହେବ ୨୩ ଟିକିଆ ହାତୀପଲ ଉକ୍ତ ଅଞ୍ଚଳରେ ରହୁଛନ୍ତି। ସନ୍ଧ୍ୟା ହେଲେ ସେଠାରୁ ହାତୀପଲ ଅନ୍ୟତ୍ର ଯିବାକୁ ବାହାରୁଛନ୍ତି। କିନ୍ତୁ ଲୋକେ ଘଉଡ଼ାଇ ଦେଉଥିତ୍ବା ଯୋଗୁ ହାତୀପଲ ପୁଣି ଜଙ୍ଗଲକୁ ଫେରିଯାଉଛନ୍ତି। ଶନିବାର ରାତିରେ ହାତୀପଲ ଉତ୍ତ୍ୟକ୍ତ ହୋଇ ଜଣେ ଚାଷୀଙ୍କ ଘରକୁ ଭାଙ୍ଗି ଦେଇଛନ୍ତି।
ରବିବାର ସକାଳେ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରି ଫେରି ଆସିଛନ୍ତି। ଗତ ସପ୍ତାହରେ ଉକ୍ତ ହାତୀପଲ ଗୁଣ୍ଡିରିବାଡ଼ିର ଜଣେ ମନ୍ଦିର ପୂଜାରୀ ଏବଂ ଅନ୍ୟ ଜଣଙ୍କୁ ଗୋଡ଼ାଇଥିଲେ। ସେଥିମଧ୍ୟରୁ ଜଣେ ତଳେ ପଡ଼ି ଆହତ ହୋଇଥିବା ବେଳେ ଅନ୍ୟ ଜଣଙ୍କର ଚେତା ଚାଲିଯାଇଥିଲା। ରାତି ସାରା ପୂଜାରୀ ଜଣଙ୍କ ଏକ ବୁଦା ଭିତରେ ପଡ଼ିରହିଥିଲେ। ସକାଳୁ ଲୋକେ ଖୋଜାଖୋଜି କରିବା ପରେ ବୁଦା ନିକଟରୁ ପୂଜାରୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିସତ୍ା ପାଇଁ ସ୍ଥାନୀୟ ହସପିଟାଲରେ ଭର୍ତ୍ତି କରିଥିଲେ। ପରେ ସେ ସୁସ୍ଥ ହୋଇ ଘରକୁ ଫେରିଥିବା ଜଣାପଡ଼ିଛି।
