ନୂଆଦିଲ୍ଲୀ: ବିମାନ ଯାତ୍ରୀଙ୍କ ଲାଗି ଖୁସି ଖବର। କେନ୍ଦ୍ର ସରକାର ଦେଶ ମଧ୍ୟରେ ୧୦% ଅଧିକ ବିମାନ ଚଳାଚଳ ଲାଗି ବୁଧବାର ଅନୁମତି ପ୍ରଦାନ କରିଛନ୍ତି। ବର୍ତ୍ତମାନ ସୁଦ୍ଧା ବିମାନ କମ୍ପାନୀଗୁଡିକ ୬୦% କ୍ଷମତାରେ ପରିଚାଳିତ ହେଉଥିଲେ। ନୂଆ ନିୟମ ଦ୍ୱାରା ଏହି କ୍ଷମତା ୭୦%କୁ ବଢାଯାଇଛି। ନୂଆ ନିଷ୍ପତ୍ତି ଦ୍ୱାରା ବିମାନ କମ୍ପାନୀଗୁଡିକ ଅଧିକ ବିମାନ ଚଳାଇପାରିବେ। ଫଳରେ ଦିଓ୍ବାଲି ପୂର୍ବରୁ ଅତିରିକ୍ତ ୨୧୦୦ ବିମାନ ଦେଶ ମଧ୍ୟରେ ସେବା ଯୋଗାଣ କରିପାରିବେ। ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି ଯେ, ବର୍ତ୍ତମାନ ଦେଶ ମଧ୍ୟରେ ଦୈନିକ ଭିତ୍ତିରେ ୨.୦୬ ଲକ୍ଷ ଯାତ୍ରୀ ବିମାନ ସେବା ଲାଭ କରିପାରୁଛନ୍ତି। ଏହା ମେ ୨୫ରେ ୩୦ ହଜାର ରହିଥିଲା। କରୋନା ମହାମାରୀ ବ୍ୟାପିବା ଯୋଗୁ ମାର୍ଚ୍ଚ ୨୫ରୁ ବିମାନ ସେବା ବାତିଲ କରାଯାଇଥିଲା। ମେ ୨୫ ଠାରୁ ଦେଶ ମଧ୍ୟରେ ବିମାନ ସେବାକୁ ଅନୁମତି ମିଳିଲା। ବର୍ତ୍ତମାନ ସୁଦ୍ଧା ଅନ୍ତର୍ଜାତୀୟ ବିମାନ ସେବାକୁ ଅନୁମତି ମିଳିନାହିଁ। କେତେକ ନିର୍ଦ୍ଦିଷ୍ଟ କ୍ଷେତ୍ରରେ ଏହି ସେବା ଉପଲବ୍ଧ ହେଉଛି।
