ଟୋକିଓ,୪।୧ : ଚଳିତ ବର୍ଷ ଦେଶର ଜନସଂଖ୍ୟା ବୃଦ୍ଧି ପାଇଁ ଏକ ଅଭିଯାନ ଉପରେ ଜାପାନ ସରକାର ଅଧିକ ଗୁରୁତ୍ୱ ଦେବାକୁ ନିଷ୍ପତ୍ତି ନେଇଛନ୍ତି। ପରିବାରରେ ସନ୍ତାନ ପ୍ରସବ କରିବାକୁ ଉତ୍ସାହିତ କରିବା ପାଇଁ ବର୍ତ୍ତମାନ ଏକ ନୂତନ ଯୋଜନା ଘୋଷଣା କରାଯାଇଛି। ଏହା ଅଧୀନରେ, ଟୋକିଓ ମହାନଗର ନିଗମ ବାହାରେ ଥିବା ପରିବାରର ପ୍ରତି ପିଲାଙ୍କୁ ଅତି କମରେ ୧୦ ଲକ୍ଷ ୟେନ (ପ୍ରାୟ ୭,୫୦୦ଡଲାର୍) ସହାୟତା ପ୍ରଦାନ କରାଯିବ। ଏହି ସ୍କିମ ପୂର୍ବରୁ ଜାରି ରହିଛି। କିନ୍ତୁ ପୂର୍ବରୁ ଏହି ସହାୟତା ପରିମାଣ ମାତ୍ର ୩ ଲକ୍ଷ ୟେନ ଥିଲା।
ଦମ୍ପତିଙ୍କୁ ଅଧିକ ସନ୍ତାନ ଜନ୍ମ କରିବାକୁ ଉତ୍ସାହିତ କରିବା ସରକାରଙ୍କ ଉଦ୍ଦେଶ୍ୟ। ଏହି ଯୋଜନା ୨୦୧୯ରେ ଆରମ୍ଭ କରାଯାଇଥିଲା । ଏହା ଅଧୀନରେ ପରିବାରମାନେ ସେହି ଅଞ୍ଚଳରେ ବସବାସ କରିବାକୁ ଉତ୍ସାହିତ ହୁଅନ୍ତି ଯେଉଁଠାରେ ଜନ୍ମ ହାର ଯଥେଷ୍ଟ ହ୍ରାସ ପାଇଛି ଏବଂ ଜନସଂଖ୍ୟାରେ ବୃଦ୍ଧ ବ୍ୟକ୍ତିଙ୍କ ସଂଖ୍ୟା ଅପେକ୍ଷାକୃତ ଅଧିକ ହୋଇଛି। ସେଥିପାଇଁ ଟୋକିଓ ମହାନଗର ନିଗମରୁ ପରିବାରକୁ ଏଭଳି ସ୍ଥାନକୁ ଯିବାକୁ ଉତ୍ସାହିତ କରାଯାଉଛି।
ନୂତନ ଘୋଷଣା ଅନୁଯାୟୀ, ଯେଉଁମାନେ ସାଇତାମା, ଚିବା, କାନାଗାୱା ଇତ୍ୟାଦି ଗ୍ରାମୀଣ ଅଞ୍ଚଳରେ ରୁହନ୍ତି ଏବଂ ସେମାନଙ୍କ କାର୍ଯ୍ୟ ପାଇଁ ଟୋକିଓକୁ ଯାତାୟାତ କରନ୍ତି ସେମାନେ ମଧ୍ୟ ଏହି ଯୋଜନାର ଲାଭ ପାଇବାକୁ ହକଦାର ହେବେ। ଏହି ଯୋଜନା ଅଧୀନରେ ହିତାଧିକାରୀ ହେବାକୁ ପରିବାରଗୁଡିକ ତିନୋଟି ସର୍ତ୍ତ ମଧ୍ୟରୁ ଯେକୌଣସି ଗୋଟିଏ ପୂରଣ କରିବାକୁ ପଡିବ। ଏହି ସର୍ତ୍ତଗୁଡିକ ହେଉଛି- ଯଦି ସେମାନେ ସ୍ଥିର ହୋଇଥିବା ଅଞ୍ଚଳରେ ଏକ ଛୋଟ କିମ୍ବା ମଧ୍ୟମ କମ୍ପାନୀରେ କାର୍ଯ୍ୟ କରୁଛନ୍ତି, ଯଦି ସେମାନେ ନୂତନ ସ୍ଥାନରେ ଅବସ୍ଥାନ କରିବା ସତ୍ତ୍ୱେ ଇଣ୍ଟରନେଟ ମାଧ୍ୟମରେ ନିଜର ପୁରୁଣା କାର୍ଯ୍ୟ କରୁଛନ୍ତି, କିମ୍ବା ସେମାନେ ନୂତନ ବାସସ୍ଥାନରେ କୌଣସି କାର୍ଯ୍ୟ କରୁଛନ୍ତି ଅବା ବ୍ୟବସାୟ ଆରମ୍ଭ କରିଛନ୍ତି ।
