କ୍ୱିଭ୍,୨୨।୪: ରୁଷିଆ ଓ ୟୁକ୍ରେନ ମଧ୍ୟରେ ଜାରି ରହିଥିବା ଯୁଦ୍ଧ ୫୮ଦିନରୁ ଅଧିକ ବିତିଲାଣି। ହେଲେ ବି ଯୁଦ୍ଧ ଥମିବାର ନା ନେଉନି। ସମୟକ୍ରମେ ୟୁକ୍ରେନର ଗୋଟିଏ ପରେ ଗୋଟିଏ ସହରକୁ ରୁଷିଆ ନିଜ କବ୍ଜାକୁ ନେଉଛି। ଇତିମଧ୍ୟରେ ଗୁରୁବାର ରୁଷିଆ ସୈନ୍ୟ ୟୁକ୍ରେନର ଅନ୍ୟ ସହର ମାରିଆପୋଲକୁ ମଧ୍ୟ କବ୍ଜା କରିନେଇଛନ୍ତି। ଉକ୍ତ ସହର ଏବେ ରୁଷୀୟ ସୈନ୍ୟଙ୍କ ନିୟନ୍ତ୍ରଣରେ ରହିଛି ବୋଲି ରାଷ୍ଟ୍ରପତି ଭ୍ଲାଡିମିର ପୁଟିନ୍ କହିଛନ୍ତି। ଅନ୍ୟପଟେ ମାରିଆପୋଲକୁ କବ୍ଜା କରିବା ପରେ ଦକ୍ଷିଣ ସହରକୁ ସମ୍ପୂର୍ଣ୍ଣ ଖାଲି କରିବାକୁ ଶୁକ୍ରବାର ମାରିଆପୋଲ ମେୟର ନାଗରିକଙ୍କୁ ନିବେଦନ କରିଛନ୍ତି। ବର୍ତ୍ତମାନ ମାରିଆପୋଲରେ ୧ଲକ୍ଷରୁ ଅଧିକ ଲୋକ ଫସିରହିଛନ୍ତି ବୋଲି ମେୟର ଭାଡିମ ବୋଇଚେଙ୍କୋ କହିଛନ୍ତି। ସେମାନଙ୍କୁ ସମ୍ପୂର୍ଣ୍ଣ ସ୍ଥାନାନ୍ତର କରିବା ନିହାତି ଆବଶ୍ୟକ। ଏଥିସହ ବୋଇଚେଙ୍କୋ ଦାବି କରିଛନ୍ତି ଯେ, ସହରରେ ହଜାର ହଜାର ନାଗରିକଙ୍କ ମୃତ୍ୟୁ ଘଟିଛି। ଅନ୍ୟପଟେ ସାଧାରଣ ନାଗରିକଙ୍କୁ ଟାର୍ଗେଟ କରାଯାଇନାହିଁ ୋବଲି ରୁଷିଆ ସଫା ସଫା ମନା କରିଦେଇଛି।
