ନୂଆଦିଲ୍ଲୀ: ୨୦୨୦-୨୧ରେ ଭାରତର ଜିଡିପି ୯.୬% ଖସିବା ନେଇ ବିଶ୍ୱବ୍ୟାଙ୍କ ପରିବର୍ତ୍ତିତ ଆକଳନରେ କହିଛି। ଜିଡିପି ୩.୨% ଖସିବ ବୋଲି ଏହା ପୂର୍ବରୁ ଆକଳନ କରିଥିଲା। କୋଭିଡ୍ ଜନିତ ଲକ୍ଡାଉନ ଏବଂ ବ୍ୟକ୍ତିବିଶେଷ ଏବଂ ଫାର୍ମଗୁଡିକର ଆୟରେ ଗଭୀର ଭାବେ ହ୍ରାସ ହେବା ଯୋଗୁ ଏଭଳି ସ୍ଥିତି ଉପୁଜିବ ବୋଲି ଏକ ରିପୋର୍ଟରେ ପ୍ରକାଶ ପାଇଛି। ୨୦୨୧-୨୨ରେ ଭାରତ ବଜାର ପୁଣି ଥରେ ଅଭିବୃଦ୍ଧି ପଥକୁ ଫେରିବ। ଏହି ସମୟରେ ଅଭିବୃଦ୍ଧି ୫.୪% ରହିବ ବୋଲି ବିଶ୍ୱବ୍ୟାଙ୍କ ଏହାର ଦକ୍ଷିଣ ଏସିଆ ସଂକ୍ରାନ୍ତ ରିପୋର୍ଟରେ ପ୍ରକାଶ କରିଛି। ଚଳିତ ଆର୍ଥତ୍କ ବର୍ଷର ପ୍ରଥମ ତ୍ରୈମାସରେ ଭାରତର ଅଭିବୃଦ୍ଧି ୨୩.୯% ଖସିଛି। ଆର୍ଥତ୍କ ବର୍ଷ ସାରା ଅଭିବୃଦ୍ଧି ୫ରୁ ୧୫% ପର୍ଯ୍ୟନ୍ତ ଖସିଯିବ ବୋଲି ବିଶ୍ୱର ପ୍ରମୁଖ ଏଜେନ୍ସିଗୁଡିକ ଆକଳନ କରିଛନ୍ତି। ଏହି ସମୟରେ ଦକ୍ଷିଣ ଏସିଆର ଅଭିବୃଦ୍ଧି ୭.୭% ଖସିଯିବ ବୋଲି ବିଶ୍ୱ ବ୍ୟାଙ୍କ ରିପୋର୍ଟରେ କୁହାଯାଇଛି।
