ଅନୁଗୋଳ ଅଫିସ୍, ୧୨।୨ – ଅନୁଗୋଳ ଷ୍ଟାଡିୟମଠାରେ ମଙ୍ଗଳବାର ୮ମ ଜିଲା ମହୋତ୍ସବ ଉଦ୍ଘାଟିତ ହୋଇଯାଇଛି। ଏହି କାର୍ଯ୍ୟକ୍ରମରେ ଜିଲାପାଳ ତଥା ସଂସ୍କୃତି ପରିଷଦ ଅଧ୍ୟକ୍ଷ ମନୋଜ କୁମାର ମହାନ୍ତି ଅଧ୍ୟକ୍ଷତା କରିଥିଲେ। ମୁଖ୍ୟ ଅତିଥିଭାବେ ବିଧାନସଭାର ଉପବାଚସ୍ପତି ତଥା ଅନୁଗୋଳ ବିଧାୟକ ରଜନୀକାନ୍ତ ସିଂହ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବେ ଏମ୍ପି ମହେଶ କୁମାର ସାହୁ, ଛେଣ୍ଡିପଦା ବିଧାୟକ ସୁଶାନ୍ତ କୁମାର ବେହେରା, ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ଆଠମଲ୍ଲିକ ବିଧାୟକ ରମେଶ କୁମାର ସାଏ, ରାଜ୍ୟ ଗୃହ ନିର୍ମାଣ ନିଗମ ଅଧ୍ୟକ୍ଷ ମୀନକେତନ ଅମାନ୍ତ ଓ ଜିଲା ପରିଷଦ ସଭାପତି ବାସନ୍ତୀ କିଷାନ ପ୍ରମୁଖ ମଞ୍ଚାସୀନ ଥିଲେ। ଏହି ଅବସରରେ ଅତିଥିଙ୍କ ଦ୍ୱାରା ସ୍ମରଣିକା ଉନ୍ମୋଚନ ହୋଇଥିବାବେଳେ ଜିଲାପାଳ ଅତିଥିମାନଙ୍କୁ ସମ୍ବର୍ଦ୍ଧିତ କରିଥିଲେ। ଚଳିତବର୍ଷ ଜଳ ସଂରକ୍ଷଣକୁ ଜିଲା ମହୋତ୍ସବର ବାର୍ତ୍ତା ଭାବେ ରଖାଯାଇଛି।
କାର୍ଯ୍ୟକ୍ରମରେ ଯୋଗଦେଇଥିବା ଏମ୍ପି ସାହୁ କହିଥିଲେ ଯେ, ଜିଲାରେ ଖଣି, ଜଳ ଓ ବନ ସମ୍ପଦ ଭରି ରହିଛି। ଏହାର ସଦୁପଯୋଗ କରାଯାଇପାରିଲେ ଜଳ ସଂରକ୍ଷଣ ହୋଇପାରିବ। ଜିଲା ମହୋତ୍ସବର ମୁଖ୍ୟ ଲକ୍ଷ୍ୟ ହେଉଛି ଜିଲାରେ ଥିବା ସୁପ୍ତ ପ୍ରତିଭାଙ୍କୁ ଜାଗ୍ରତ କରାଯିବା ବୋଲି ଏମ୍ପି ସାହୁ ପ୍ରକାଶ କରିଥିଲେ। ମୁଖ୍ୟଅତିଥି ବିଧାୟକ ସିଂହ କହିଥିଲେ, ୭ମ ରୁ ୮ମ ଜିଲା ମହୋତ୍ସବ ସମୟ ମଧ୍ୟରେ ଜିଲାରେ ବହୁ କିଛି ପରିବର୍ତ୍ତନ ହୋଇଛି। ବିଶେଷକରି ଜିଲା ମୁଖ୍ୟ ଚିକିତ୍ସାଳୟରେ ଉନ୍ନତି ଘଟିଛି। ଟ୍ରମା କେୟାର ସେଣ୍ଟର ଖୋଲିବାର ବ୍ୟବସ୍ଥା ହେଉଥିବାବେଳେ ଶଯ୍ୟା ସଂଖ୍ୟା ୨ଶହକୁ ବୃଦ୍ଧି ପାଇବ। ବିଳମ୍ବରେ ହେଲେ ମଧ୍ୟ ଖୁବ୍ଶୀଘ୍ର ଜାତୀୟ ରାଜପଥରରେ ବାଇପାସ୍ ଫିଟିବ। ଖଣି ଓ ସ୍ବାସ୍ଥ୍ୟ ପାଇଁ ଜିଲା ଖଣିଜ ପାଣ୍ଠି(ଡିଏମ୍ଏଫ୍) ବ୍ୟବହାର ହେଉଥିବାବେଳେ ଶିକ୍ଷା କ୍ଷେତ୍ରରେ ମଧ୍ୟ ଏହି ପାଣ୍ଠି ଖର୍ଚ୍ଚ କରାଯିବା ନିମନ୍ତେ ଆଲୋଚନା ଚାଲିଛି।
