ଭୁବନ, ୨୧।୬(ଡି.ଏନ.ଏ.)-ଜୀବନ କ’ଣ ଜାଣିବା ଆଗରୁ ଦାରୁଣ ହୋଇଛି ସମୟ। ମାତ୍ର ୭ବର୍ଷ ବୟସରେ ଉଭୟ କିଡ୍ନୀ ହରାଇଛନ୍ତି ଅବୋଧ ଶିଶୁ ରାକେଶ। ଦୀର୍ଘ ୫ବର୍ଷ ହେଲା ରୋଗ କଲବଲ କରୁଥିବାବେଳେ ଖର୍ଚ୍ଚ ହେଲାଣି ୫ଲକ୍ଷରୁ ଊର୍ଦ୍ଧ୍ୱ ଟଙ୍କା। ଚିକିତ୍ସାରେ ଆହୁରି ୬ଲକ୍ଷ ଖର୍ଚ୍ଚ ହେବ ବୋଲି ଜଣାପଡ଼ିବା ପରେ ମା’ବାପାଙ୍କ ମୁଣ୍ଡରେ ଛିଣ୍ଡି ପଡ଼ିଛି ଦୁଃଖର ପାହାଡ଼। ପୁଅର ଚିକିତ୍ସାରେ ସର୍ବସ୍ବାନ୍ତ ହୋଇପଡ଼ିଥିବା ଲକ୍ଷ୍ମୀଧର ବେହେରା ଏବେ ଅନାଇଛନ୍ତି ସହୃଦୟ ବ୍ୟକ୍ତିଙ୍କ ସହାୟତାକୁ।
ଢେଙ୍କାନାଳ ଜିଲା ଭୁବନ ବ୍ଲକ ଭୁଷଳ ପଞ୍ଚାୟତର ଅସୁରବନ୍ଧ ପାଟଣା ଗ୍ରାମରେ ରୁହନ୍ତି ଲକ୍ଷ୍ମୀଧର। ପରିବାର କହିଲେ ସ୍ତ୍ରୀ, ଦୁଇ ପୁଅ। ବଡ଼ପୁଅ ରାଜେଶ ୬ଷ୍ଠ ଶ୍ରେଣୀରେ ପଢୁଥିବାବେଳେ ରାକେଶ ୨ୟ ଶ୍ରେଣୀର ଛାତ୍ର। ଲକ୍ଷ୍ମୀଧରଙ୍କ କହିବା କଥା, ରାକେଶ ୨ବର୍ଷର ହୋଇଥିବାବେଳେ ହଠାତ୍ ତାଙ୍କ ମୁହଁ, ଗୋଡ଼ହାତ ଫୁଲିବା ଆରମ୍ଭ କଲା। ସ୍ଥାନୀୟ ଡାକ୍ତରଖାନାରେ ପ୍ରଥମେ ତାଙ୍କର ଚିକିତ୍ସା ଆରମ୍ଭ ହୋଇଥିଲା। ରୋଗ ଜଣା ନ ପଡ଼ିବାରୁ ଜିଲା ମୁଖ୍ୟ ଚିକିତ୍ସାଳୟ ଏବଂ ପରବର୍ତ୍ତୀ ସମୟରେ କଟକ ଶିଶୁଭବନରେ ରାକେଶଙ୍କୁ ଭର୍ତ୍ତି କରାଯାଇଥିଲା। ୨୦୧୯ ଜୁନ୍ ୧୭ରେ ତାଙ୍କର ଦୁଇଟି ଯାକ କିଡ୍ନୀ ନଷ୍ଟ ହୋଇଯାଇଥିବା ଜଣାପଡ଼ିଥିଲା। ଶିଶୁ ଭବନରେ ଚିକିତ୍ସାଧୀନ ଥିବାବେଳେ ସେଠାକାର ଡାକ୍ତର ପୁଅର କିଡ୍ନୀ ଆଂଶିକ ନଷ୍ଟ ହୋଇଥିବା କହିଥିଲେ। ପୁଅର ଆରୋଗ୍ୟ କାମନା କରି ଜିଲା ପ୍ରଶାସନ ଏବଂ ସମ୍ପର୍କୀୟଙ୍କଠାରୁ ଧାରଉଧାର କରି ୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରିସାରିଥିଲେ। ତେବେ ରାକେଶଙ୍କ ଉଭୟ କିଡ୍ନୀ ନଷ୍ଟ ହୋଇଯାଇଥିବା ନିକଟରେ ଶିଶୁଭବନର ଡାକ୍ତର ସ୍ପଷ୍ଟ କରିବା ପରେ ଏବେ ପାଦତଳୁ ମାଟି ଖସିଯାଇଥିବା ଲକ୍ଷ୍ମୀଧର କହିଛନ୍ତି। ପୁଅ କିପରି ଭଲ ହେବ ଏବେ ସେହି ଚିନ୍ତା ଘାରିଛି। ସବୁଆଡୁ ନିରାଶ ହେବାପରେ ଏବେ ଠାକୁରଙ୍କ ଭରସାରେ ଅଛନ୍ତି ଲକ୍ଷ୍ମୀଧର ଏବଂ ତାଙ୍କ ସ୍ତ୍ରୀ। ପୁଅକୁ ପ୍ରତିଦିନ ମନ୍ଦିର ଦର୍ଶନ କରାଇ ଜୀବନ ଭିକ୍ଷା ମାଗୁଛନ୍ତି। ଯଦି କୌଣସି ସହାୟତା ବ୍ୟକ୍ତି ସହାୟତାର ହାତ ବଢ଼ାନ୍ତି ତେବେ ରାକେଶଙ୍କ ଜୀବନ ବଞ୍ଚତ୍ୟିବ ବୋଲି ଲକ୍ଷ୍ମୀଧର କହିଛନ୍ତି। ତାଙ୍କୁ ସହାୟତା ଦେବାକୁ ମୋବାଇଲ ନଂ ୮୦୧୮୧୬୩୫୨୪ରେ ଯୋଗାଯୋଗ କରିବାକୁ ସେ ନିବେଦନ କରିଛନ୍ତି।
