ନୂଆଦିଲ୍ଲୀ,୨୪-୯: ଫ୍ଲାଟ୍ କିଣିବାକୁ ହାତପାହାନ୍ତରେ ପହଞ୍ଚାଇବା ଲକ୍ଷ୍ୟରେ ବିଲ୍ଡର ମାନେ ଫ୍ଲାଟ୍ ସାଇଜ୍(ଆକାର) କମାଇବା ଆରମ୍ଭ କରିଛନ୍ତି। ଗତ ୫ ବର୍ଷ ମଧ୍ୟରେ ଦେଶର ୭ ବୃହତ ସହରରେ ରେସିଡେନ୍ସିଆଲ ଫ୍ଲାଟ୍ ସାଇଜ୍ ୨୭ ପ୍ରତିଶତ ହ୍ରାସ ପାଇଛି ବୋଲି ପ୍ରପର୍ଟି କନ୍ସଲ୍ଟାଣ୍ଟ କମ୍ପାନୀ ଆନାରକ୍ ପକ୍ଷରୁ ଏକ ରିସର୍ଚ୍ଚ ରିପୋର୍ଟରେ କୁହାଯାଇଛି। ତେବେ ରାଷ୍ଟ୍ରୀୟ ରାଜଧାନୀ କ୍ଷେତ୍ର(ଏନ୍ସିଆର୍)ରେ ଫ୍ଲାଟଗୁଡ଼ିକର ହାରାହାରି ଆକାର ମାତ୍ର ୬% କମିଛି।
ଆନାରକ୍ ଅଧ୍ୟକ୍ଷ ଅନୁଜ ପୁରୀ ସୋମବାର କହିଛନ୍ତି ଯେ, ନଗଦ ସଙ୍କଟ, କ୍ରେତାଙ୍କ ପ୍ରାଥମିକତାରେ ପରିବର୍ତ୍ତନ ଓ ଫ୍ଲାଟ୍ ଦାମ ବୃଦ୍ଧି ପାଉଥିବା କାରଣରୁ ଏବେ ଅଧିକ ମାତ୍ରାରେ ବଡ଼ ଫ୍ଲାଟ୍ ବିକ୍ରି ହୋଇପାରୁନାହିଁ। ଏହାକୁ ଦୃଷ୍ଟିରେ ରଖି ବିଲ୍ଡର ଏବେ ‘ଅତ୍ୟନ୍ତ ଉନ୍ନତ’ ମାର୍କା ଫ୍ଲାଟ୍ ନିର୍ମାଣରୁ ଦୂରେଇ ଯାଇଛନ୍ତି। ୭ ପ୍ରମୁଖ ସହରରେ ସେମାନେ ଏବେ ଛୋଟ ଆକାର ଫ୍ଲାଟ୍ ନିର୍ମାଣ ଉପରେ ଦୃଷ୍ଟିନିବଦ୍ଧ କରିଛନ୍ତି। ଆନାରକ୍ ପକ୍ଷରୁ କୁହାଯାଇଛି ଯେ, ୨୦୧୪ରେ ଦିଲ୍ଲୀ-ଏନ୍ସିଆର୍, ପୁଣେ, ଚେନ୍ନାଇ, ବେଙ୍ଗାଲୁରୁ, ହାଇଦ୍ରାବାଦ୍ ଓ କୋଲକାତାରେ ୧୪୦୦ ବର୍ଗଫୁଟ୍ର ଫ୍ଲାଟ୍ ନିର୍ମାଣ କରାଯାଉଥିଲା। ଏବେ ଏହା ୧୦୨୦ ବର୍ଗଫୁଟ୍କୁ ଖସି ଆସିଛି। ଆନାରକ୍ର ତଥ୍ୟ ଅନୁଯାୟୀ, ମୁମ୍ବାଇରେ ଫ୍ଲାଟ୍ର ହାରାହାରି ଆକାର ସର୍ବାଧିକ ୪୫% ହ୍ରାସ ପାଇଛି। ୨୦୧୪ରେ ଏହା ୯୬୦ ବର୍ଗଫୁଟ୍ ରହିଥିବା ବେଳେ ଏବେ ଏହା ୫୩୦ ବର୍ଗଫୁଟକୁ ଖସିଆସିଛି। ପୁଣେରେ ଏହା ୩୮ ପ୍ରତିଶତ, ଚେନ୍ନାଇ, ବେଙ୍ଗାଲୁରୁ ଓ ହାଇଦ୍ରାବାଦ୍ରେ ଫ୍ଲାଟ୍ର ହାରାହାରି ଆକାର କ୍ରମଶଃ ୮,୯ ଓ ୧୨ ପ୍ରତିଶତ ହ୍ରାସ ପାଇଛି।
