କଟକ ଅଫିସ, ୧।୨: ଥିଏଟର ମୁଭ୍ମେଣ୍ଟ ପକ୍ଷରୁ କଟକ କଳାବିକାଶ କେନ୍ଦ୍ରଠାରେ ଚାଲିଥିବା ଗ୍ଲୋବାଲ ଥିଏଟର ଫେଷ୍ଟିଭାଲ ଶୁକ୍ରବାର ସନ୍ଧ୍ୟାରେ ଉଦ୍ଯାପିତ ହୋଇଯାଇଛି। ଏଥିରେ ମୁଖ୍ୟଅତିଥି ଭାବେ ପୂର୍ବତନ ନିର୍ବାଚନ କମିଶନର ରବିନାରାୟଣ ସେନାପତି ଯୋଗଦେଇଥିଲେ। ଗତ ୨୦ ତାରିଖରୁ ଚାଲିଥିବା ଏହି ଫେଷ୍ଟିଭାଲରେ ମୋଟ୍ ୫୦ଟି ନାଟକ ମଞ୍ଚସ୍ଥ ହୋଇଥିଲା। ଏଥିସହିତ ବିଭିନ୍ନ ରାଜ୍ୟର କଳାକାର ଅଂଶଗ୍ରହଣ କରି କଥକ, ଓଡ଼ିଶୀ, ମଣିପୁରୀ, ଭାରତନାଟ୍ୟମ, ଆଧୁନିକ, କ୍ଲାସିକାଲ, ସେମିକ୍ଲାସିକାଲ ନୃତ୍ୟ ପରିବେଷଣ କରିଥିଲେ। ମଞ୍ଚସ୍ଥ ନାଟକଗୁଡିକ ମଧ୍ୟରୁ ଶ୍ରେଷ୍ଠ ୫ଟି ନାଟକ ପୁରସ୍କୃତ କରାଯାଇଥିଲା। ଶ୍ରେଷ୍ଠ ପ୍ରଯୋଜନା କ୍ଷେତ୍ରରେ ବାରାଣସୀର ନାଟ୍ୟସଂସ୍ଥା ମଞ୍ଚଦୂତମ ପ୍ରଥମ ପୁରସ୍କାର ପାଇଥିଲା। ସେହିପରି କଥକ ନୃତ୍ୟରେ ମଧ୍ୟପ୍ରଦେଶ ନବରଙ୍ଗ କଳାକେନ୍ଦ୍ର ପ୍ରଥମ, ଛତିଶଗଡର କଳାବିକାଶ କେନ୍ଦ୍ର ଦ୍ୱିତୀୟ ଓ ମୁମ୍ବାଇ କଳାଞ୍ଜଧି ସ୍କୁଲ ଅଫ ଆର୍ଟ ତୃତୀୟ ସ୍ଥାନ ଅଧିକାର କରିଥିଲେ। ଭାରତନାଟ୍ୟମରେ ଗୁରୁଦେବ ଏକାଡେମୀ ପ୍ରଥମ, କଳାଞ୍ଜଳି ଦ୍ୱିତୀୟ ଓ ଆସାମର ସୁରେଶ ସଙ୍ଗୀତ ଅନୁଷ୍ଠାନ ତୃତୀୟ ସ୍ଥାନ ହାସଲ କରିଥିଲା। ଶାସ୍ତ୍ରୀୟ ନୃତ୍ୟରେ ଆସାମ, ମଣିପୁରର କଳାକାର ପୁରସ୍କୃତ ହୋଇଥିବାବେଳେ ଲୋକନୃତ୍ୟ ଓ ଆଧୁନିକ ନୃତ୍ୟରେ ଓଡିଶା, ପଶ୍ଚିମବଙ୍ଗ, ଝାଡଖଣ୍ଡ, ମଧ୍ୟପ୍ରଦେଶ, ମହାରାଷ୍ଟ୍ରର କଳାକାରଙ୍କୁ ସମ୍ମାନିତ କରାଯାଇଥିଲା। ଏହି କାର୍ଯ୍ୟକ୍ରମରେ ଅନୁଷ୍ଠାନର ମୁଖ୍ୟ ଉପଦେଷ୍ଟା ଜଷ୍ଟିସ ଅନନ୍ତ ସୂର୍ଯ୍ୟନାରାୟଣ ନାଇଡୁ, କାର୍ଯ୍ୟକାରୀ ସଭାପତି ଡ. ଜୟନ୍ତ ପଣ୍ଡା, ଡ. ନାରାୟଣ ସାହୁ ଓ ଗୋଲକ ବିହାରୀ ଦାସ ମହାପାତ୍ର ଉପସ୍ଥିତ ଥିଲେ।
