ନୂଆଦିଲ୍ଲୀ,୪।୬: କରୋନା ସଂକ୍ରମଣକୁ ରୋକିବା ଲାଗି ସରକାର ଜାରି କରିଥିବା ଲକ୍ଡାଉନ ଯୋଗୁ ସାରା ଦେଶର ଅର୍ଥବ୍ୟବସ୍ଥାକୁ ଗଭୀର ଭାବେ କ୍ଷତି ପହଞ୍ଚିଛି। ବର୍ତ୍ତମାନ ଆର୍ଥତ୍କ କାର୍ଯ୍ୟକଳାପ ପୁଣି ଥରେ ଆରମ୍ଭ କରିବା ଲାଗି ସରକାର ଅନୁମତି ଦେଇଛନ୍ତି। ଫଳରେ ୫ ରାଜ୍ୟର ଅର୍ଥ ବ୍ୟବସ୍ଥା ପୁଣି ଥରେ ଟ୍ରାକ୍କୁ ଫେରୁଥିବା ଏକ ରିପୋର୍ଟରେ ଉଲ୍ଲେଖ ରହିଛି। ରାଜ୍ୟଗୁଡିକ ମଧ୍ୟରେ କେରଳ,ପଞ୍ଜାବ, ତାମିଲନାଡୁ, ହରିୟାଣା ଏବଂ କର୍ନାଟକ ରହିଛି। ଦେଶର ମୋଟ ଘରୋଇ ଉତ୍ପାଦ(ଜିଡିପି)କୁ ଏହି ରାଜ୍ୟଗୁଡିକ ୨୭% ଯୋଗଦାନ ରଖୁଛନ୍ତି। ଏଲାରା ସିକ୍ୟୁରିଟିଜ ପକ୍ଷରୁ ହୋଇଥିବା ଅଧ୍ୟୟନ ମୁତାବକ ଏହି ରାଜ୍ୟଗୁଡିକର କାର୍ଯ୍ୟକଳାପ ସୁଧାର ହେଉଛି। ରାଜ୍ୟଗୁଡିକର ବିଜୁଳି ଚାହିଦା, ଟ୍ରାଫିକ,ଉତ୍ପାଦର ଉପଲବ୍ଧତା ଭଳି ବିଭିନ୍ନ ପ୍ରସଙ୍ଗକୁ ଆଧାରରେ ଅଧ୍ୟୟନ କରାଯାଇଛି। ଏହି ରାଜ୍ୟଗୁଡିକରେ ବିଭିନ୍ନ କ୍ଷେତ୍ରରେ ଉନ୍ନତି ଆସୁଥିବା ଦେଖାଯାଉଛି। ଏହା ଦେଶର ଅର୍ଥ ବ୍ୟବସ୍ଥା ଲାଗି ଲାଭକାରି ବୋଲି ଏଲାର ପକ୍ଷରୁ ଗରିମା କପୁର କହିଛନ୍ତି।
ରିପୋର୍ଟ ମୁତାବକ ଚେନ୍ନାଇ ସହର ବାହାରେ ସ୍ଥିତି ଉନ୍ନତ ରହିଛି। ଏଠାରେ ମାନୁଫାକ୍ଚରିଂକୁ ଜିଡିପିର ଯୋଗଦାନ ୩୪%। ହ୍ୟୁଣ୍ଡାଇ, ଫୋର୍ଡ ସମେତ ଅନ୍ୟ କମ୍ପାନୀଗୁଡିକର ମାନୁଫାକ୍ଚରିଂ ୟୁନିଟ ସେଠାରେ ରହିଛି। ଲକ୍ଡାଉନ ଯେତେ କୋହଳ ହେବ ଇଣ୍ଡଷ୍ଟ୍ରିଗୁଡିକ ସେତେ ଶୀଘ୍ର କାମ ସମ୍ଭାଳିବେ। ରୋଜଗାର ଏବଂ ଅଭିବୃଦ୍ଧି ପାଇଁ ଏହା ଭଲ ସଙ୍କେତ। କେରଳ ପରେ ମଲ୍, ରେଷ୍ଟୁରାଷ୍ଟ ଖୋଲିଥିବା ରାଜ୍ୟ ମଧ୍ୟରେ କର୍ନାଟକ ଆସୁଛି। ଭାରତର ଆଇଟି ହବ୍ ବାଙ୍ଗାଲୋରରେ ଏଭଳି ପଦକ୍ଷେପ ଦ୍ୱାରା ସର୍ଭିସ ସେକ୍ଟର ପୁଣି ଟ୍ରାକ୍କୁ ଫେରିବାରେ ସହାୟକ ହୋଇପାରିବ। ରିପୋର୍ଟ ମୁତାବକ ସେଲୁନ ସର୍ଭିସ, ଏୟାର କଣ୍ଡିସନର, ଏୟାର ଟ୍ରାଭେଲ, ବାଇକ ଏବଂ ଭାକ୍ୟୁମ କ୍ଲିନର ବିକ୍ରିରେ ଉନ୍ନତି ଆସିଛି। କର୍ନାଟକ ଜିଡିପିରେ ସର୍ଭିସ ସେକ୍ଟରର ଯୋଗଦାନ ୬୪%। ସେହିଭଳି ସିମୋଗା, ହୁବୁଲି, ଗୁଲ୍ମାର୍ଗ, ମହୀଶୂର ଭଳି ସ୍ଥାନରେ ଫ୍ୟାକ୍ଟ୍ରିଗୁଡିକ କାମ ଆରମ୍ଭ କରିଛନ୍ତି।
ହରିୟାଣାରେ ମଧ୍ୟ ଅର୍ଥନୈତିକ କାର୍ଯ୍ୟକଳାପ ତ୍ୱରିତ ହେଉଛି। ସେଠାରେ ମୋଟ ଜିଡିପିରେ ସର୍ଭିସ ସେକ୍ଟରର ଯୋଗଦାନ ୫୧%। ଏଠାରେ ଗୁରୁଗ୍ରାମ ଏବଂ ମାଣେସରରେ ଥିବା ଫ୍ୟାକ୍ଟ୍ରିଗୁଡିକର ଟ୍ରାକ୍କୁ ଫେରିଲେଣି। ଆଇଟି,ଆଇଟିଇଏସ୍, ଅଟୋପାର୍ଟସ, ସାଇକେଲ, ଖେଳନା ଭଳି କ୍ଷେତ୍ରରେ ରୋଜଗାର ଦେଉଥିବା କମ୍ପାନୀଗୁଡିକର ପୁଣି ଥରେ କାମ ଆରମ୍ଭ ହୋଇଛି। ସେହିଭଳି ପଞ୍ଜାବରେ କୃଷି କାର୍ଯ୍ୟ ଟ୍ରାକ୍କୁ ଫେରିଥିବା ଜଣାପଡ଼ିଛି।
