ବାଲିମେଳା,୨୩ା୬(ଶିବଦତ୍ତ ସାହୁ): ମାଲକାନଗିରି ଜିଲାର ବିଭିନ୍ନ ସ୍ଥାନରେ ନିର୍ମାଣାଧୀନ ଥିବା ପୋଲ କାର୍ଯ୍ୟ ଶେଷ ହେଉନାହିଁ। ଫଳରେ ଉକ୍ତ ଅଞ୍ଚଳରେ ବସବାସ କରୁଥିବା ଲୋକେ ବର୍ଷାଦିନେ ଯାତାୟାତରେ ବହୁ ଦୁର୍ଦ୍ଦଶା ଭୋଗୁଛନ୍ତି। ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ବାଲିମେଳା ସହରକୁ ସଂଯୋଗ କରୁଥିବା ମୁଖ୍ୟ ରାଜ୍ୟ ରାଜପଥ ତଥା ଜିଲାର କୋରୁକୋଣ୍ଡା ବ୍ଲକ ତର୍ଲାକୋଟାଠାରେ। ୫ ବର୍ଷ ପୂର୍ବେ ତର୍ଲାକୋଟା ନଦୀ ଉପରେ ପ୍ରାୟ ୨ କୋଟି ଟଙ୍କା ବ୍ୟୟ ଅଟକଳରେ ଏକ ନୂତନ ପୋଲ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ରାସ୍ତା ଓ ଗୃହ ନିର୍ମାଣ ବିଭାଗ ପକ୍ଷରୁ ଏହି କାର୍ଯ୍ୟ କରିବା ପାଇଁ ଟେଣ୍ଡର ସରିବା ପରେ ଆନ୍ଧ୍ରପ୍ରଦେଶର ଆର୍ଆର୍ ଏଣ୍ଟରପ୍ରାଇଜେସ୍ ନାମକ ଏକ ଠିକା କମ୍ପାନୀକୁ କାର୍ଯ୍ୟାଦେଶ ଦିଆଯାଇ କାମ ଆରମ୍ଭ ହୋଇଥିଲା। କିନ୍ତୁ ବିଡ଼ମ୍ବନାର ବିଷୟ ଆଜକୁ ୫ ବର୍ଷ ବିତିଥିଲେ ମଧ୍ୟ ଏହି ପୋଲ ଅଧାପନ୍ତରିଆ ଅବସ୍ଥାରେ ପଡ଼ି ରହିଛି। ଫଳରେ ଲୋକେ ବର୍ଷାଦିନେ ଯାତାୟାତରେ ସମସ୍ୟା ଭୋଗୁଛନ୍ତି ା ବର୍ଷା ହେଲେ ତର୍ଲାକୋଟାଠାରେ ଥିବା ବହୁ ପୁରାତନ ତଳୁଆ ପୋଲ ଉପରେ ପ୍ରାୟ ୫ ଫୁଟରୁ ଅଧିକ ଉଚ୍ଚତାରେ ବର୍ଷାଜଳ ପ୍ରବାହିତ ହୋଇଥାଏ। ଦୀର୍ଘ ବର୍ଷ ହେବ ଏହି ପୋଲରେ ବର୍ଷାଜଳ ମାଡ଼ ହେଉଥିବାରୁ ପୋଲଟି କ୍ରମଶଃ ଦୁର୍ବଳ ହେବାରେ ଲାଗିଛି। ଏହି ପୋଲ ଦେଇ ଦୈନିକ ଜିଲାର ବିଭିନ୍ନ ଅଞ୍ଚଳକୁ ଅନେକ ଯାତ୍ରୀବାହୀ ବସ୍ ,ମାଲ୍ ବୋଝେଇ ଟ୍ରକ୍, ପିଡିଏସ୍ ସାମଗ୍ରୀଠାରୁ ଆରମ୍ଭକରି ବିଭିନ୍ନ ଖାଦ୍ୟ ସାମଗ୍ରୀ ଟ୍ରକ୍ ଓ ଆମ୍ବୁଲାନ୍ସ ସମେତ ବିଭିନ୍ନ ଛୋଟ ବଡ଼ ଗାଡ଼ିମୋଟର ଯାତାୟାତ କରୁଛି। ବର୍ଷାଦିନେ ପୋଲ ଉପରେ ନଦୀପାଣି ପ୍ରବାହିତ ହେଉଥିବା ଯୋଗୁ ମାଲକାନଗିରିରୁ ବାଲିମେଳା, ଚିତ୍ରକୋଣ୍ଡା, କୁଡୁମୁଲୁଗୁମା ଏବଂ ଅନ୍ୟାନ୍ୟ ଅଞ୍ଚଳକୁ ଯୋଗାଯୋଗ ବାରମ୍ବାର ବିଚ୍ଛିନ୍ନ ହୋଇଥାଏ। ଏହି ପୋଲ ଉପରେ ପାଣି ବୁଡି ରହିବା ସମୟରେ ୨ ପାର୍ଶ୍ୱରେ ବହୁ ସଂଖ୍ୟାରେ ଯାନବାହନ ଓ ଯାତ୍ରୀ ଘଣ୍ଟା ଘଣ୍ଟା ଧରି ଅଟକି ରହିଥାନ୍ତି। ଅଧାପନ୍ତରିଆ ଅବସ୍ଥାରେ ପଡ଼ି ରହିଥିବା ଅର୍ଦ୍ଧ ନିର୍ମିତ ପୋଲ ନିର୍ମାଣ କାର୍ଯ୍ୟକୁ ତୁରନ୍ତ ଶେଷକରି ଏହାକୁ ଲୋକାର୍ପିତ କରିବା ପାଇଁ ରାଜନେତାଙ୍କଠାରୁ ଆରମ୍ଭ କରି ଅଞ୍ଚଳବାସୀଙ୍କ ପକ୍ଷରୁ ବହୁବାର ବିଭାଗୀୟ କର୍ତ୍ତୃପକ୍ଷ ଓ ପ୍ରଶାସନିକ ଅଧିକାରୀଙ୍କ ନିକଟରେ ଦାବିକରି ଆସୁଥିଲେ ମଧ୍ୟ ଅଦ୍ୟାବଧି କୌଣସି ସୁଫଳ ମିଳୁ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଯଦି ଚଳିତ ବର୍ଷ ଲଗାଣ ବର୍ଷା ଆରମ୍ଭ ହେବା ପୂର୍ବରୁ ଏହାର ନିର୍ମାଣ କାର୍ଯ୍ୟ ଶେଷ କରା ନ ଯାଏ, ତେବେ ଆଗାମୀ ଦିନରେ ପୁଣି ପୂର୍ବ ଭଳି ସମସ୍ୟା ଦେଖାଦେବ ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି ।
ଏ ସମ୍ପର୍କରେ ନିର୍ମାଣ ଦାୟିତ୍ୱରେ ଥିବା ରାସ୍ତା ଓ ଗୃହ ନିର୍ମାଣ ବିଭାଗ ଅଧୀକ୍ଷଣ ଯନ୍ତ୍ରୀ ନୀହାର ରଞ୍ଜନ ବେହେରାଙ୍କୁ ପଚାରିବାରୁ ତର୍ଲାକୋଟା ନୂତନ ପୋଲ ନିର୍ମାଣ କାର୍ଯ୍ୟ ପ୍ରାୟ ୯୦ ପ୍ରତିଶତ ଶେଷ ହୋଇଛି। ଏହାର ଦୁଇ ପାର୍ଶ୍ୱରେ ଥିବା ଆପ୍ରୋଚ୍ ରୋଡ୍ ତିଆରି ଲାଗି ଜାଗା ସମସ୍ୟା ପାଇଁ କାମ ନ ହୋଇ ବନ୍ଦ ରହିଛି। ଆପ୍ରୋଚ୍ ରୋଡ୍ ପାଇଁ ଆବଶ୍ୟକ ହେଉଥିବା ଜମି ଓ ଜାଗାର ଏସ୍ସି କ୍ଲିଅରାନ୍ସ ଅନୁମୋଦନ ପାଇଁ ପଠାଯାଇଛି। ପ୍ରାୟ ୮ ଦିନ ପରେ କ୍ଲିଅରାନ୍ସ ଏବଂ ଆମକୁ ଜମି ହସ୍ତାନ୍ତର ହେବା ପରେ ତୁରନ୍ତ ଏହି କାର୍ଯ୍ୟ ଶେଷ କରାଯିବ ବୋଲି ସେ କହିଛନ୍ତି।
