ନୂଆଦିଲ୍ଲୀ,୨୬-୮: କେନ୍ଦ୍ରୀୟ ଭିଜିଲାନ୍ସ କମିଶନ(ସିଭିସି) ୫୦ କୋଟି ଟଙ୍କାରୁ ଊର୍ଦ୍ଧ୍ୱ ବ୍ୟାଙ୍କ ଜାଲିଆତିର ତଦନ୍ତ ତଥା କାର୍ଯ୍ୟାନୁଷ୍ଠାନ ସମ୍ପର୍କରେ ସୁପାରିସ୍ କରିବା ଲାଗି ପୂର୍ବ ଭିଜିଲାନ୍ସ କମିଶନର ଟି.ଏମ୍.ଭସିନଙ୍କ ଅଧ୍ୟକ୍ଷତାରେ ଏକ ବ୍ୟାଙ୍କିଙ୍ଗ୍ ଜାଲିଆତି ସମ୍ପର୍କିତ ପରାମର୍ଶଦାତା ବୋର୍ଡ(ଏବିବିଏଫ୍) ଗଠନ କରିଛନ୍ତି। ପୂର୍ବରୁ ଏହାକୁ ବ୍ୟାଙ୍କ, ବାଣିଜି୍ୟକ ଏବଂ ବିତ୍ତୀୟ ଜାଲିଆତି ସମ୍ପର୍କିତ ପରାମର୍ଶଦାତା ବୋର୍ଡ କୁହାଯାଉଥିଲା। ସିଭିସି ପକ୍ଷରୁ ଏକ ବିବୃତି ଜାରି କରି କୁହାଯାଇଛି ଯେ, ଆର୍ବିଆଇ ପରାମର୍ଶରେ ଗଠିତ ଏବିବିଏଫ୍ ଜାଲିଆତି, ଠକାମୀ ସଂକ୍ରାନ୍ତୀୟ ସମସ୍ତ ବଡ଼ ମାମଲାର ପ୍ରାଥମିକ ତଦନ୍ତ କରିବ। ବ୍ୟାଙ୍କର ମହାପ୍ରବନ୍ଧକ ସ୍ତରରେ ହୋଇଥିବା ଜାଲିଆତିର ତଦନ୍ତ ଏହି ୪ ସଦସ୍ୟବିଶିଷ୍ଟ ବୋର୍ଡ କରିବେ। ୫୦ କୋଟି ଟଙ୍କାରୁ ଅଧିକ ଜାଲିଆତି ମାମଲାଗୁଡ଼ିକର ପ୍ରାଥମିକ ତଦନ୍ତ ଲାଗି ବ୍ୟାଙ୍କଗୁଡ଼ିକ ବୋର୍ଡ ନିକଟକୁ ପଠାଇବେ। ବୋର୍ଡର ସୁପାରିସ୍ ଅଥବା ପରାମର୍ଶ ଗ୍ରହଣ କରି ସମ୍ପୃକ୍ତ ବ୍ୟାଙ୍କ ମାମଲାକୁ ଆଗକୁ ବଢ଼ାଇବେ ଓ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରିବେ। ଏହି କମିଟିରେ ପୂର୍ବତନ ସହରାଞ୍ଚଳ ବିକାଶ ସଚିବ ମଧୁସୂଦନ ପ୍ରସାଦ, ସୀମା ସୁରକ୍ଷା ବଳର ପୂର୍ବତନ ମହାନିର୍ଦ୍ଦେଶକ ଡି.କେ.ପାଠକ ଓ ଆନ୍ଧ୍ର ବ୍ୟାଙ୍କର ପୂର୍ବତନ ପ୍ରବନ୍ଧ ନିର୍ଦ୍ଦେଶକ ତଥା ସିଇଓ ସୁରେଶ ଏନ୍. ପଟେଲ ସଦସ୍ୟ ରହିଛନ୍ତି।
