ଭୁବନେଶ୍ୱର, ୨୩-୧୦(ବ୍ୟୁରୋ) : କମିଶନରେଟ ପୋଲିସ ଅଞ୍ଚଳରେ ହିଂସା ପୀଡିତା ମହିଳାଙ୍କ ସମସ୍ୟାର ସମାଧାନ ପାଇଁ ସହଯୋଗର ହାତ ବଢାଇଥିବା ‘ମାଧ୍ୟମ’ ମଙ୍ଗଳବାର ୫ ବର୍ଷରେ ପଦାର୍ପଣ କରିଛି। ଏହି ଅବସରରେ କମିଶନରେଟ ପୋଲିସ ମୁଖ୍ୟାଳୟରେ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା। ପୋଲିସ କମିଶନର ଡ. ସୁଧାଂଶୁ ଷଡ଼ଙ୍ଗୀ ମୁଖ୍ୟ ଅତିଥିଭାବେ ଯୋଗଦେଇ କହିଲେ, ଇନ୍ଷ୍ଟିଚ୍ୟୁଟ ଫର୍ ସୋସିଆଲ ଡେଭଲପ୍ମେଣ୍ଟ (ଆଇଏସ୍ଡି) ଓ କମିଶନରେଟ ପୋଲିସର ମିଳିତ ସହଯୋଗରେ ୨୦୧୪ରୁ ଆରମ୍ଭ ହୋଇଛି ‘ମାଧ୍ୟମ’। ମହିଳାଙ୍କୁ ସହଯୋଗ ଦେବା ପାଇଁ ଏହା ଏକ ଉତ୍ତମ ପଦକ୍ଷେପ। ଏଥିସହ ‘ମାଧ୍ୟମ’ର ଦ୍ୱିତୀୟ ପର୍ଯ୍ୟାୟ ପାଇଁ ୨ବର୍ଷିଆ ଏମଓୟୁ କରିବା ସହ ଅପ୍ଡେଟ ବୁକଲେଟ୍କୁ ଉନ୍ମୋଚନ କରି କହିଲେ, ବିଗତ ୫ ବର୍ଷ ମଧ୍ୟରେ ମୋଟ ୨୩୦୪ ମାମଲା ପଞ୍ଜୀକୃତ ହୋଇଛି। ଏଥିମଧ୍ୟରେ ଭୁବନେଶ୍ୱରରେ ୧୧୦୪୫ ଓ କଟକରେ ୧୨୫୮ ମାମଲା ହୋଇଥିବା ବେଳେ ୧୪୪୯ ମାମଲାର ସମାଧାନ କରାଯାଇଛି। କଟକ-ଭୁବନେଶ୍ୱର ମହିଳା ଥାନା ସହ ସମନ୍ବୟ ରଖାଯାଇ କାର୍ଯ୍ୟ କରାଯିବ ବୋଲି ଆଇଏସ୍ଡି ନିର୍ଦ୍ଦେଶିକା ଶୁଭଶ୍ରୀ ଦାସ ୫ ବର୍ଷର ରିପୋର୍ଟକୁ ଉପସ୍ଥାପନ କରିବା ଅବସରରେ କହିଛନ୍ତି।
