ନୂଆଦିଲ୍ଲୀ,୧୩-୧୧: ଚଳିତ ଆର୍ଥିକ ବର୍ଷ ଦ୍ୱିତୀୟ ତ୍ରୈମାସରେ ଦେଶର ଜିଡ଼ିପି ଅଭିବୃଦ୍ଧି ୪.୨%କୁ ହ୍ରାସ ଘଟିପାରେ। ଅଟୋମୋବାଇଲ କ୍ଷେତ୍ରରେ ବିକ୍ରି ହ୍ରାସ, ଏୟାର ଟ୍ରାଫିକ ମନ୍ଥରତା, ପ୍ରମୁଖ ଶିଳ୍ପ କ୍ଷେତ୍ର ଅଭିବୃଦ୍ଧିରେ ହ୍ରାସ ଏବଂ ଭିତ୍ତିଭୂମି କ୍ଷେତ୍ରରେ ନିବେଶ କମିବା ଯୋଗୁ ଦେଶର ଆର୍ଥତ୍କ କାର୍ଯ୍ୟକଳାପ ହ୍ରାସ ହେଉଥିବା ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ) ଅର୍ଥନୈତିକ ଗବେଷଣା ବିଭାଗର ଇକୋରାପ୍ ରିପୋର୍ଟରେ ଏହା ପ୍ରକାଶ ପାଇଛି। ଚଳିତ ଆର୍ଥତ୍କ ବର୍ଷରେ ଘରୋଇ ବଜାରର ଅଭିବୃଦ୍ଧି ହାର ଖସିବା ନେଇ ଏହି ରିପୋର୍ଟରେ ସୂଚନା ଦିଆଯାଇଛି। ଦେଶର ଅଭିବୃଦ୍ଧି ହାର ୬.୧% ରହିବ ବୋଲି ଏସ୍ବିଆଇ ପୂର୍ବରୁ ପୂର୍ବାନୁମାନ କରିଥିଲା ମାତ୍ର ଏହାକୁ ବର୍ତ୍ତମାନ ପରିବର୍ତ୍ତନ କରାଯାଇଛି। ୨୦୨୦ ଆର୍ଥତ୍କ ବର୍ଷରେ ଦେଶର ଜିଡ଼ିପି ଅଭିବୃଦ୍ଧି ୫%କୁ ଖସିବା ନେଇ ଏହା ପୂର୍ବାନୁମାନ କରିଛି।
ସେହିଭଳି ୨୦୨୦-୨୧ରେ ଦେଶର ଅର୍ଥ ବ୍ୟବସ୍ଥାରେ ସୁଧାର ଆସିବା ସହ ଏହା ୬.୨% ଛୁଇଁବା ସମ୍ଭାବନା ରହିଥିବା ରିପୋର୍ଟରେ କୁହାଯାଇଛି। ସେହିଭଳି ରିଜର୍ଭ ବ୍ୟାଙ୍କ ଡିସେମ୍ବରରେ ଏହାର ମୁଦ୍ରାନୀତି ସମୀକ୍ଷା ବେଳେ ସୁଧହାର ହ୍ରାସ କରିପାରେ ବୋଲି ରିପୋର୍ଟରେ ପ୍ରକାଶ ପାଇଛି। ଗତ ମାସରେ ରିଜର୍ଭ ବ୍ୟାଙ୍କ ଏହାର ରେପୋକୁ ଲଗାତର ଭାବେ ୫ଥର ଲାଗି ହ୍ରାସ କରିବା ସହ ୨୫ ବେସିସ୍ ପଏଣ୍ଟ କମାଇଥିଲା। ଡିସେମ୍ବର ୫ରେ ରିଜର୍ଭ ବ୍ୟାଙ୍କ ଦ୍ୱିମାସିକ ମୁଦ୍ରାନୀତି ଘୋଷଣା କରିବ। ୨୦୧୯-୨୦ ଆର୍ଥତ୍କ ବର୍ଷ ଲାଗି ଦେଶର ଅଭିବୃଦ୍ଧି ପୂର୍ବାନୁମାନକୁ ଏହା ୬.୯%ରୁ ୬.୧%କୁ କମାଇଥିବା ଜଣାପଡିଛି। ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଜିଡ଼ିପି ଅଭିବୃଦ୍ଧି ୫%କୁ ଖସିଥିବାରୁ ଏହାକୁ ନେଇ ବଜାର ବିଶେଷଜ୍ଞ ଉଦ୍ବେଗ ପ୍ରକାଶ କରିଛନ୍ତି।
ବର୍ତ୍ତମାନ ଦେଶର ସାମଗ୍ରିକ ଚାହିଦାରେ ବୃଦ୍ଧି ଏବଂ ବିତ୍ତୀୟ ନୀତି ଉପରେ ସରକାର କିଭଳି ପଦକ୍ଷେପ ଗ୍ରହଣ କରୁଛନ୍ତି ତାକୁ ବଜାର ବିଶେଷଜ୍ଞମାନେ ନଜରରେ ରଖିଛନ୍ତି। ସେହିଭଳି ବିତ୍ତୀୟ ନିଅଣ୍ଟ ଲକ୍ଷ୍ୟ ହାସଲ ଦିଗରେ ସରକାରଙ୍କ ଯୋଜନା ଉପରେ ନଜର ରହିଛି। ଏଦିଗରେ ସରକାର ଶୀଘ୍ର ସ୍ପଷ୍ଟ କଲେ ଏହା ବଜାର ଉପରେ ସକାରାତ୍ମକ ପ୍ରଭାବ ଆଣିବ ବୋଲି ରିପୋର୍ଟରେ ପ୍ରକାଶ ପାଇଛି। ଏହାବାଦ ଟେଲିକମ୍, ଶକ୍ତି ଏବଂ ଏନ୍ବିଏଫ୍ସି କ୍ଷେତ୍ରର ସମସ୍ୟାକୁ ଧ୍ୟାନରେ ରଖାଯିବା ନେଇ ରିପୋର୍ଟରେ କୁହାଯାଇଛି।
୬% ସ୍ତରରେ ଋଣ ଅଭିବୃଦ୍ଧି
ଘରୋଇ ବଜାରର ଋଣ ଅଭିବୃଦ୍ଧି ଏବେ ପ୍ରଭାବିତ ସ୍ତରରେ ରହିଛି। ଜୁଲାଇ-ସେପ୍ଟେମ୍ବରରେ ଏହା ୬%କୁ ଖସିଯିବ ବୋଲି ଫାଇନାନସିଆଲ ସର୍ଭିସ କମ୍ପାନୀ କ୍ରେଡିଟ୍ ସୁଇସ କହିଛି। ବିମୁଦ୍ରୀକରଣ ସମୟରେ ଋଣ ଅଭିବୃଦ୍ଧି ଏହି ସ୍ତରରେ ରହିଥିବା ଏହା ସୂଚନା ଦେଇଛି। ଏହାବାଦ ଏନ୍ବିଏଫ୍ସି ଋଣ ପ୍ରଦାନ ହାର -୩୬% ଏବଂ ବ୍ୟାଙ୍କଗୁଡିକର ଋଣ ପ୍ରଦାନ ହାର ୮% ରହିଛି। ପ୍ରଥମ ତ୍ରୈମାସରେ ଘରୋଇ ବ୍ୟାଙ୍କଗୁଡିକର ଋଣ ଅଭିବୃଦ୍ଧି ୨୨ରୁ ୧୪%କୁ ଖସିଛି। ଏହି ସମୟରେ ରାଷ୍ଟ୍ରାୟତ୍ତ ବ୍ୟାଙ୍କ ଋଣ ଅଭିବୃଦ୍ଧି ୮%ରୁ ୫%କୁ ଖସିଛି ବୋଲି କ୍ରେଡିଟ ସୁଇସ ଏହାର ରିପୋଟରେ ଉଲ୍ଲେଖ କରିଛି।
