ଭୁବନେଶ୍ୱର, ୧୭ା୭(ବ୍ୟୁରୋ): ରାଜ୍ୟରେ ହାତୀ ଆକ୍ରମଣରେ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି। ୨୦୧୫ରୁ ୨୦୧୯ ମଧ୍ୟରେ ରାଜ୍ୟରେ ଜଙ୍ଗଲୀ ହାତୀ ଆକ୍ରମଣରେ ୩୬୯ ଜଣ ମୃତ୍ୟୁବରଣ କରିଛନ୍ତି। ଏହାସହ ୨୦୭ ଜଣ ବ୍ୟକ୍ତି ଆହତ ହୋଇଛନ୍ତି। ହାତୀ ଆକ୍ରମଣରେ ମୃତ୍ୟୁ ରୋକିବା ପାଇଁ ସରକାରଙ୍କ ପକ୍ଷରୁ ବହୁ ପଦକ୍ଷେପ ଗ୍ରହଣ କରାଯାଉଛି ବୋଲି କୁହାଯାଉଛି। ହେଲେ ସରକାର ନିୟମ କରିଦେଲେ କିଛି ଫଳ ମିଳୁ ନ ଥିବା ବିଭିନ୍ନ ମହଲରୁ ଅଭିଯୋଗ ଆସିବାରେ ଲାଗିଛି। ମଙ୍ଗଳବାର ବିଧାନସଭାରେ ବିଧାୟକ ମୁକେଶ କୁମାର ପାଲଙ୍କ ଏକ ଅଣତାରକା ପ୍ରଶ୍ନର ଉତ୍ତରରେ ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ ହାତୀ ଆକ୍ରମଣରେ ଶିକାର ହୋଇଥିବା ତଥ୍ୟ ରଖିଛନ୍ତି। ଏହାସହ ମନ୍ତ୍ରୀ ଏହି ପ୍ରକାର ମୃତ୍ୟୁ ରୋକିବା ପାଇଁ ଗ୍ରହଣ କରିଥିବା ବ୍ୟବସ୍ଥା ସମ୍ପର୍କରେ ଦର୍ଶାଇଛନ୍ତି। ହାତୀମାନେ ଜନବସତି ଅଞ୍ଚଳକୁ ନ ଆସିବା ଲାଗି ସମ୍ବେଦନଶୀଳ ଅଞ୍ଚଳରେ ପଥର ପାଚେରି, ଖାଇ, ସୌରଶକ୍ତି ଚାଳିତ ତାରବାଡ ନିର୍ମାଣ କରାଯାଇଛି। ଏହାସହ ହାତୀମାନଙ୍କ ଖାଦ୍ୟ ଉପଯୋଗୀ ବୃକ୍ଷ ରୋପଣ, ନୂତନ ଜଳାଶୟ ଖନନ, ପୁରାତନ ଜଳାଶୟ ଗୁଡିକର ପୁନରୁଦ୍ଧାର କରାଯାଇଛି। ହାତୀଙ୍କୁ ଜଙ୍ଗଲ ଆଡକୁ ଘଉଡାଇବା ପାଇଁ ଉପଦ୍ରବ ନିରୋଧୀ ଦଳ, ବନ୍ୟଜୀବ ସୁରକ୍ଷା ଦଳ, ହାତୀ ଅନୁସରଣ ଦଳ ଏବଂ ପାରା ଷ୍ଟାଫମାନଙ୍କୁ ନିୟୋଜିତ କରାଯାଇଛି। ମୋବାଇଲ ଆପ୍ ମାଧ୍ୟମରେ ହାତୀମାନଙ୍କ ପ୍ରଚଳନକୁ ଜାଣି ସେମାନଙ୍କୁ ନିୟନ୍ତ୍ରଣ କରାଯିବା ସହ ଜନସାଧାରଣଙ୍କୁ ସତର୍କ କରାଯାଉଛି ବୋଲି କହିଛନ୍ତି।
