ନୂଆଦିଲ୍ଲୀ,୧୬-୧ : ଚଳିତ ମାସ ୩୧ରୁ ବ୍ୟାଙ୍କ ସଙ୍ଗଠନଗୁଡିକ ସାରା ଦେଶରେ ଧର୍ମଘଟ ଡାକରା ଦେଇଛନ୍ତି। ଏହା ବାଦ୍ ବ୍ୟାଙ୍କଗୁଡିକର ମିଳିତ ସଂଘ ୟୁଏଫ୍ବିୟୁ ପକ୍ଷରୁ ମାର୍ଚ୍ଚ ୩୧ରୁ ୩ ଦିନିଆ ଧର୍ମଘଟ ଏବଂ ଏପ୍ରିଲ ପହିଲାରୁ ଅନିର୍ଦ୍ଦିଷ୍ଟ କାଳ ଯାଏ ଧର୍ମଘଟ ହେବ ବୋଲି ସଂଘଗୁଡିକ ପକ୍ଷରୁ ସୂଚନା ରହିଛି। ସଂଘଗୁଡିକ ରଖିଥିବା ବିଭିନ୍ନ ଦାବି ପୂରଣ ନ ହେବା ଯୋଗୁ ସେମାନେ ଧର୍ମଘଟକୁ ଓହ୍ଲାଇଥିବା ଜଣାପଡିଛି। ୨୦% ବୃଦ୍ଧିରେ ବେତନ ସଂଶୋଧନ, ୫ ଦିନିଆ ବ୍ୟାଙ୍କିଙ୍ଗ୍ , ସ୍ବତନ୍ତ୍ର ଭତ୍ତା ଏବଂ ବେସିକ ପେ ମିଶ୍ରଣ, ନୂଆ ପେନସନ ସ୍କିମକୁ ହଟାଇବା, ପେନସନର ଅପଡେଟ, ପରିବାର ପେନସନର ଉନ୍ନତୀକରଣ, ପରିଚାଳନା ଲାଭ ଆଧାରରେ କର୍ମଚାରୀ ମଙ୍ଗଳ ପାଣ୍ଠିକୁ ପୁଞ୍ଜି ପ୍ରଦାନ, ଅବସରକାଳୀନ ସୁବିଧାସୁଯୋଗ ଲାଭ କ୍ଷେତ୍ରରେ ବିନା କୌଣସି ସିଲିଂ ଆୟକର ରିହାତି ଭଳି ଦାବି ସଂଘଗୁଡିକ ପକ୍ଷରୁ ରଖାଯାଇଛି। ଏହାବାଦ ୍ଶାଖା ସ୍ତରରେ ବିଜନେସ ଆଓ୍ବାର, ଲଞ୍ଚ ଆଓ୍ବାରର ଏକକ ସଂଜ୍ଞା ନିର୍ଦ୍ଧାରଣ, ଲିଭ୍ ବ୍ୟାଙ୍କ ଲାଗୁ କରାଇବା, କର୍ମଚାରୀଙ୍କ ଲାଗି ଓ୍ବାର୍କିଂ ଆଓ୍ବାର ନିରୂପଣ କରିବା, ସମାନ କାମ ପାଇଁ ସମାନ ବେତନ ବ୍ୟବସ୍ଥା କରିବା ନେଇ ଦାବି ରହିଛି।
ଚଳିତମାସ ୮ରେ ହୋଇଥିବା ଭାରତ ବନ୍ଦ ଡାକରାରେ ୬ ବ୍ୟାଙ୍କ କର୍ମଚାରୀ ସଂଘ ସାମିଲ ହୋଇଥିଲେ। ଏହି ଦିନ ସାରା ଦେଶରେ ଅଧିକାଂଶ ବ୍ୟାଙ୍କ ବନ୍ଦ ରହିଥିଲା। ଯେଉଁ ବ୍ୟାଙ୍କଗୁଡିକ ଖୋଲା ରହିଥିଲା କାରବାର ପ୍ରଭାବିତ ସ୍ଥିତିରେ ରହିଥିଲା। ଚଳିତ ଥର ଦିଆଯାଇଥିବା ଧର୍ମଘଟ ଡାକରା ଅତ୍ୟନ୍ତ ଗୁରୁତ୍ୱ ବହନ କରେ ବୋଲି କୁହାଯାଇଛି। କାରଣ ଫେବୃୟାରୀ ପହିଲାରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ବଜେଟ ଉପସ୍ଥାପନ କରିବେ। ଏହାର ଗୋଟିଏ ଦିନ ଆଗରୁ ୩୧ ଜାନୁୟାରୀରେ ଅର୍ଥନୈତିକ ସର୍ଭେ ରିପୋର୍ଟ ଆସିବ। ଏବେ ବଜେଟ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ରହିଛି। ମାନ୍ଦାବସ୍ଥାରୁ ଦେଶର ଅର୍ଥ ବ୍ୟବସ୍ଥାକୁ ବାହାର କରିବା ସରକାରଙ୍କ ସାମ୍ନାରେ ଏକ ବଡ ଚ୍ୟାଲେଞ୍ଜ ବୋଲି କୁହାଯାଉଛି। ସେହିଭଳି ଫେବୃୟାରୀ ୨ ତାରିଖ ରବିବାର ପଡୁଥିବାରୁ ଉକ୍ତ ଦିନ ମଧ୍ୟ ବ୍ୟାଙ୍କ ବନ୍ଦ ରହିବ। ଧର୍ମଘଟ ଯୋଗୁ ବ୍ୟାଙ୍କ ୩ ଦିନ ଲଗାତାର ବନ୍ଦ ହେବାକୁ ଥିବାରୁ ଏହାଦ୍ୱାରା ସାଧାରଣ ଲୋକ ବିଭିନ୍ନ ଅସୁବିଧା ସାମ୍ନା କରିବେ ବୋଲି ଆଶଙ୍କା କରାଯାଉଛି। ସେହିଭଳି ଏଟିଏମ୍ଗୁଡିକରେ ନଗଦ ଅଭାବ ଦେଖାଯାଇପାରେ ବୋଲି କୁହାଯାଉଛି।
