କୋଟା,୧୦।୨: ବାହାଘରରେ ଜଣେ ବର ତାଙ୍କୁ ଶ୍ୱଶୁର ଘର ପକ୍ଷରୁ ମିଳିଥିବା ୨୧ ଲକ୍ଷ ଟଙ୍କାର ବିଳାସ ପୂର୍ଣ୍ଣ କାର ଏବଂ ୧୧ ଲକ୍ଷ ଟଙ୍କାର ଯୌତୁକ ନେବାକୁ ମନା କରିଛନ୍ତି। କେବଳ ୧୦୧ ଟଙ୍କା ଗ୍ରହଣ କରି ସେ ବିବାହ କରିବାକୁ ମନସ୍ଥ କରିଛନ୍ତି। ଅଜମେରର ବାସିନ୍ଦା ମୟଙ୍କ ଗୁର୍ଜରଙ୍କ ବିବାହ ଆସନ୍ତା ରବିବାର ଦିନ ସୁରଟର କନ୍ୟା ମୁକ୍ତାଙ୍କ ସହିତ ସମ୍ପନ୍ନ ହେବ। ବାହାଘର ପୂର୍ବରୁ ହୋଇଥିବା ନିର୍ବନ୍ଧରେ ବରଙ୍କୁ ଏସବୁ ଉପହାର ମିଳିବ ବୋଲି କନ୍ୟାପକ୍ଷ ସୂଚନା ଦେଇଥିଲେ। ତେବେ ଏସବୁ ନେବାକୁ ମୟଙ୍କ ଅରାଜି ହୋଇଛନ୍ତି। ସେ କେବଳ ୧୦୧ ଟଙ୍କା ଉପହାର ନେବାକୁ କହିଛନ୍ତି। ମୟଙ୍କଙ୍କ କଥାରେ ତାଙ୍କ ପିତା ରାମସୁଖ ଗୁର୍ଜର ମଧ୍ୟ ସହମତି ପ୍ରକାଶ କରିଥିଲେ। ବିନା ଯୌତୁକରେ ବୋହୂ ନେବାକୁ ସେମାନେ କହିଛନ୍ତି। ଏବେ ଏହା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
