ଢେଙ୍କାନାଳ ଅଫିସ,୧୧ା୨
ଢେଙ୍କାନାଳ ଗ୍ରାମ୍ୟ ଉନ୍ନୟନ ସଂସ୍ଥା ସମ୍ମିଳନୀ କକ୍ଷରେ ସୋମବାର ଅପରାହ୍ନ ୫ଟାରେ ୧୮ତମ ଜିଲା ଯୋଜନା କମିଟି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଜିଲା ପ୍ଲାନିଂ କମିଟି ଅଧ୍ୟକ୍ଷ ତଥା ଶକ୍ତି ମନ୍ତ୍ରୀ କ୍ୟାପଟେନ୍ ଦିବ୍ୟଶଙ୍କର ମିଶ୍ର ଅଧ୍ୟକ୍ଷତା କରିଥିଲେ। ଜିଲାର ସାମଗ୍ରିକ ବିକାଶ ନିମନ୍ତେ ୨୦୧୯-୨୦ ଆର୍ଥିକ ବର୍ଷ ପାଇଁ ୧୩୦୯ କୋଟି ୪୩ଲକ୍ଷ ୭୩ ହଜାର ଟଙ୍କା ଅନୁମୋଦିତ ହୋଇଛି। ୨୦୨୪ ସୁଦ୍ଧା ଜିଲାର ସମସ୍ତ ଗ୍ରାମାଞ୍ଚଳକୁ ସ୍ବଚ୍ଛ ପାନୀୟ ଜଳ ଯୋଗାଣ ହେବ ବୋଲି ସ୍ବତନ୍ତ୍ର ନିମନ୍ତ୍ରିତ ଅତିଥି ଭାବେ ଯୋଗଦେଇ ପାନୀୟ ଜଳଯୋଗାଣ ଏବଂ ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନା ସୂଚନା ଦେଇଛନ୍ତି। ସେହିପରି ଅନୁଦାନ ଟଙ୍କାର ସଦ୍ବିନିଯୋଗ କରିବା ଏବଂ ଧାର୍ଯ୍ୟ ସମୟ ମଧ୍ୟରେ ଦଳଗତ ଉଦ୍ୟମ କରି ପ୍ରକଳ୍ପ କାର୍ଯ୍ୟ ସାରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଏନ୍ଏସି ଏବଂ ପୌରାଞ୍ଚଳରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ପାନୀୟଜଳ ଯୋଗାଣ ପ୍ରକଳ୍ପ ପାଇଁ ଟେଣ୍ଡର ପ୍ରକ୍ରିୟା ଶେଷ ହୋଇନାହିଁ। ଏହାକୁ ନେଇ ମନ୍ତ୍ରୀ ଅସନ୍ତୋଷ ବ୍ୟକ୍ତ କରିଥିଲେ। ଜିଲାର ୨ ବ୍ଲକରେ ଖୁବ୍ଶୀଘ୍ର ମେଗା ପାନୀୟଜଳ ପ୍ରକଳ୍ପ ଆରମ୍ଭ ହେବ। ୨-୩ ମାସରେ ଜିଲାର ୭୦% ଅଞ୍ଚଳକୁ ବିଶୁଦ୍ଧ ପାଣି ଯୋଗାଇ ଦେବାକୁ ମନ୍ତ୍ରୀ ଜେନା ଗୁରୁତ୍ୱାରୋପ କରିଥିଲେ।
ଅନୁମୋଦିତ ଟଙ୍କା ମଧ୍ୟରୁ କୃଷିଭିତ୍ତିକ କାର୍ଯ୍ୟକ୍ରମ ଲାଗି ୫୪ କୋଟି ୮୯ଲକ୍ଷ ୯୨ ହଜାର, ଗ୍ରାମ୍ୟ ବିକାଶ ପାଇଁ ୧୯୬ କୋଟି ୬୯ଲକ୍ଷ ୯୦ ହଜାର, ଗୋପବନ୍ଧୁ ଗ୍ରାମୀଣ ଯୋଜନାରେ ୧୪କୋଟି ୮୮ଲକ୍ଷ ୬ହଜାର, ଜଳସେଚନ ଓ ବନ୍ୟା ନିୟନ୍ତ୍ରଣ ନିମନ୍ତେ ୬୩କୋଟି ୩୯ଲକ୍ଷ ୪୫ହଜାର ଟଙ୍କା ବିନିଯୋଗ ହେବ। ବିଦ୍ୟୁତ୍ ଯୋଗାଣ ଓ ଉନ୍ନତୀକରଣ ପାଇଁ ୧୨୮ କୋଟି ୧୬ଲକ୍ଷ ୬୨ହଜାର, ଶିଳ୍ପବିକାଶ ଓ ଖଣି ନିମନ୍ତେ ୬କୋଟି ୨୦ଲକ୍ଷ ୬୪ ହଜାର, ରାସ୍ତା ଓ ପୋଲ ନିର୍ମାଣ ନିମନ୍ତେ ୨୫୩କୋଟି ୧୮ଲକ୍ଷ ୮ହଜାର, ବିଜ୍ଞାନ ଓ ପ୍ରଯୁକ୍ତିବିଦ୍ୟା ଓ ପରିବେଶ ବିକାଶ ନିମନ୍ତେ ୧କୋଟି ୩୫ଲକ୍ଷ ୭୪ହଜାର ଟଙ୍କା ଖର୍ଚ୍ଚ ହେବ। ସେହିପରି ସାଧାରଣ ଅର୍ଥନୈତିକ ସେବା ଉଦ୍ଦେଶ୍ୟରେ ୧୪କୋଟି ୧୯ଲକ୍ଷ, ସାଧାରଣ ଶିକ୍ଷା ପାଇଁ ୧୫୮କୋଟି ୨୫ଲକ୍ଷ ୫୫ହଜାର ଟଙ୍କା, କ୍ରୀଡ଼ା ଓ ସଂସ୍କୃତି ପାଇଁ ୪୭ଲକ୍ଷ ୬୦ହଜାର, ପ୍ରାଥମିକ ସ୍ବାସ୍ଥ୍ୟସେବା ନିମନ୍ତେ ୯୭କୋଟି ୫୭ଲକ୍ଷ ୩୨ହଜାର, ବାସଗୃହ ନିର୍ମାଣ ଲାଗି ୧୭୧କୋଟି ୩୭ଲକ୍ଷ ୬୦ହଜାର, ସହରାଞ୍ଚଳ ବିକାଶ ପାଇଁ ୮କୋଟି ୭୨ଲକ୍ଷ ୨ହଜାର, ଏସ୍ସିଏସ୍ଟି ଓ ପଛୁଆ ବର୍ଗଙ୍କ ବିକାଶ ପାଇଁ ୨କୋଟି ୮ଲକ୍ଷ, ସାମାଜିକ ସୁରକ୍ଷା ଓ ସମାଜ ମଙ୍ଗଳ କାର୍ଯ୍ୟକ୍ରମ ପାଇଁ ୧୦୦କୋଟି ୭୦ଲକ୍ଷ ୨୭ହଜାର ଟଙ୍କା ବିନିଯୋଗ ପାଇଁ ଅନୁମୋଦିତ ହୋଇଛି।
ବୈଠକରେ ଖଣିମନ୍ତ୍ରୀ ପ୍ରଫୁଲ୍ଲ କୁମାର ମଲିକ, ପରଜଙ୍ଗ ବିଧାୟକ ଡା. ନୃସିଂହ ଚରଣ ସାହୁ, ଢେଙ୍କାନାଳ ବିଧାୟକ ସୁଧୀର କୁମାର ସାମଲ, ହିନ୍ଦୋଳ ବିଧାୟିକା ସୀମାରାଣୀ ନାୟକ ପ୍ରମୁଖ ପ୍ରସ୍ତାବିତ ପ୍ରକଳ୍ପଗୁଡ଼ିକର ସଫଳ ରୂପାୟନ ଲାଗି ଯତ୍ନବାନ ହେବାକୁ ଅଧିକାରୀଙ୍କୁ ପରାମର୍ଶ ଦେଇଥିଲେ। ପ୍ରାରମ୍ଭରେ ଜିଲାପାଳ ଭୂମେଶ ଚନ୍ଦ୍ର ବେହେରା ସ୍ବାଗତ ଭାଷଣ ପ୍ରଦାନ କରିଥିଲେ। ଏସ୍ପି ଅନୁପମା ଜେମ୍ସ, ପିଡି ଡିଆରଡିଏ ନରୋତ୍ତମ ବେହେରାଙ୍କ ସମେତ ଜିଲା ଯୋଜନା କମିଟିର ସଭ୍ୟାସଭ୍ୟ, ଉପଜିଲାପାଳ, ଜିଲାସ୍ତରୀୟ ଅଧିକାରୀମାନେ ଉପସ୍ଥିତ ଥିଲେ।
