ଭଞ୍ଜନଗର,୬।୬(ଡି.ଏନ.ଏ)- ସଙ୍ଗରୋଧ କେନ୍ଦ୍ର ଯିବା ରାସ୍ତାରୁ ଖସି ଗଁାକୁ ଚାଲିଗଲେ। ଗ୍ରାମବାସୀ ବିରୋଧ କରିବାରୁ ୨ଦିନ ଗଁା ପାଖ ଜଙ୍ଗଲରେ ରହିଲେ। ଶନିବାର ସକାଳେ ଘଟଣାଟି ଲୋକଲୋଚନକୁ ଆସିବା ପରେ ପୋଲିସ ଓ ସ୍ଥାନୀୟ ପ୍ରଶାସନ ଉକ୍ତ ବ୍ୟକ୍ତିଙ୍କୁ ଉଦ୍ଧାର କରି ଆଣି ସଙ୍ଗରୋଧ କେନ୍ଦ୍ରରେ ଛାଡିଛି। ଏପରି ଘଟଣା ଘଟିଛି ଗଞ୍ଜାମ ଜିଲା ଭଞ୍ଜନଗର ବ୍ଲକ ସାନକୋଦଣ୍ଡା ଅଞ୍ଚଳରେ।
ତାମିଲନାଡୁରୁ ଟ୍ରେନ ଯୋଗେ ଆସି ସାନକୋଦଣ୍ଡା ଓ ବାଉଁଶଲୁଣ୍ଡି ପଞ୍ଚାୟତର ୮ ଜଣ ଗୁରୁବାର ବ୍ରହ୍ମପୁରରେ ଓହ୍ଲାଇଥିଲେ। ପ୍ରଶାସନ ସେମାନଙ୍କୁ ବସ୍ ଯୋଗେ ଆଣି ଭଞ୍ଜନଗର ବ୍ଲକରେ ଛାଡ଼ିଥିଲା। ବ୍ଲକ ପ୍ରଶାସନ ପକ୍ଷରୁ ସେମାନଙ୍କୁ ଜିଲୁଣ୍ଡି ସଙ୍ଗରୋଧ କେନ୍ଦ୍ରକୁ ପଠାଯାଇଥିଲା। ଯାନବାହନ ସୁବିଧା ନଥିବାରୁ ୪ କିମି ଦୂର ଜିଲୁଣ୍ଡି ସଙ୍ଗରୋଧ କେନ୍ଦ୍ରକୁ ସମସ୍ତେ ଚାଲିଚାଲି ଯାଉଥିଲେ। ବାଟରୁ ବିଞ୍ଜିଗିରିର ଜଣେ ପ୍ରବାସୀ ଖସି ଗ୍ରାମକୁ ଚାଲିଯାଇଥିଲେ। ସାଥିରେ ଥିବା ତାଙ୍କ ପୁଅ କିନ୍ତୁ ଉକ୍ତ ସଙ୍ଗରୋଧ କେନ୍ଦ୍ରକୁ ଯାଇଥିଲେ। ସମ୍ପୃକ୍ତ ବ୍ୟକ୍ତି ଗଁାରେ ପହଞ୍ଚତ୍ବା ପରେ ତାଙ୍କୁ ଗ୍ରାମବାସୀ ବିରୋଧ କରିବାରୁ ସେ ଗୁରୁବାର ରାତିରେ ଜଙ୍ଗଲରେ ରହିଥିଲେ। ଶୁକ୍ରବାର ପଞ୍ଚାୟତ ପକ୍ଷରୁ ତାଙ୍କୁ ଆଣି ସଙ୍ଗରୋଧ କେନ୍ଦ୍ରରେ ରଖିବାକୁ ଉଦ୍ୟମ ହୋଇଥିଲା। କିନ୍ତୁ ସେ ରାଜି ହୋଇ ନଥିଲେ। ଶନିବାର କଥାଟି ଅଧିକ ପ୍ରଚାରିତ ହେବାପରେ ବିଡିଓ ଅନିଲ କୁମାର ସେଠୀ ପୋଲିସ ସହ ଯାଇ ତାଙ୍କୁ ଜଙ୍ଗଲରୁ ଆଣି ମୁଜାଗଡ ସଙ୍ଗରୋଧ କେନ୍ଦ୍ରରେ ଛାଡିଛନ୍ତି। ଅପରପକ୍ଷେ ଉକ୍ତ ବ୍ୟକ୍ତି ଜଣକ ଗଣମାଧ୍ୟମ ସମ୍ମୁଖରେ ଅଭିଯୋଗ କରିଛନ୍ତି ଯେ, ତାଙ୍କୁ ଗ୍ରାମ ସଙ୍ଗରୋଧ କେନ୍ଦ୍ରରେ ରଖାଗଲା ନାହିଁ, ତେଣୁ ବାଧ୍ୟ ହୋଇ ସେ ଜଙ୍ଗଲରେ ଭୋକ ଉପାସରେ ରହିଥିଲେ।
