କଲ୍ୟାଣୀ, ୧।୯ (ପି.ଟି.)-ନେପାଳକୁ ୭-୦ ଗୋଲରେ ପରାସ୍ତ କରି ଭାରତ ୧୫ ବର୍ଷରୁ କମ୍ ସାଫ୍ (ସାଉଥ ଏସିଆନ ଫୁଟ୍ବଲ ଫେଡେରେଶନ) ଚାମ୍ପିୟନଶିପ୍ ଟାଇଟଲ ହାସଲ କରିଛି। ଶନିବାର କଲ୍ୟାଣୀ ଷ୍ଟାଡିୟମରେ ଖେଳାଯାଇଥିବା ଏହି ଏକତରଫା ଫାଇନାଲରେ ଷ୍ଟ୍ରାଇକର ଶ୍ରୀଦାର୍ଥ ନଙ୍ଗ୍ମିକାପମ୍ (୫୧ତମ, ୭୬ତମ ଓ ୮୦ତମ) ହ୍ୟାଟ୍ରିିକ ଗୋଲ ସ୍କୋର କରିଥିଲେ। ମହେସନ ସିଂ (୧୫ତମ), ଅମନଦୀପ (୪୨ତମ), ଶିବଜିତ୍ ସିଂ (୪୫ତମ) ଏବଂ ହିମାଂଶୁ ଜାଙ୍ଗ୍ରା (୬୫ତମ) ଗୋଟିଏ ଲେଖାଏଁ ଗୋଲ ସ୍କୋର କରିଥିଲେ। ଭାରତ ରେକର୍ଡ ତୃତୀୟ ଥର ପାଇଁ ଟାଇଟଲ ଜିତିବାରେ ସମର୍ଥ ହୋଇଛି। ପୂର୍ବରୁ ଦଳ ୨୦୧୩ ଏବଂ ୨୦୧୭ରେ ଚାମ୍ପିୟନ ହୋଇଥିଲା। କୋଚ୍ ବିବିଆନୋ ଫର୍ନାଣ୍ଡିଜଙ୍କ ତତ୍ତ୍ୱାବଧାନରେ ଭାରତୀୟ ଦଳ ଟୁର୍ନାମେଣ୍ଟରେ ୫ଟି ମ୍ୟାଚ ଖେଳି ମୋଟ ୨୮ଟି ଗୋଲ ସ୍କୋର କରିଥିବାବେଳେ ଗୋଟିଏ ହେଲେ ଗୋଲ ବରଣ କରି ନ ଥିଲା। ଆମେ ଚାମ୍ପିୟନ ହେବା ଲକ୍ଷ୍ୟ ନେଇ ଏଠାକୁ ଆସିଥିଲୁ ଏବଂ ସଫଳ ହେଲୁ ମଧ୍ୟ। ଏଏଫ୍ସି କ୍ୱାଲିଫାୟର୍ସ ପାଇଁ ଏହି ଟୁର୍ନାମେଣ୍ଟ ଆମ ଲାଗି ଏକ ପ୍ରସ୍ତୁତି ଭଳି ଥିଲା। ଆମର ପରବର୍ତ୍ତୀ ନଜର ୧୬ ବର୍ଷରୁ କମ୍ ଏଏଫ୍ସି ଚାମ୍ପିୟନଶିପ୍ ୨୦୨୦ କ୍ୱାଲିଫାୟର୍ସ ଉପରେ ରହିଛି। ଏହା ସେପ୍ଟେମ୍ବର ୧୮ରୁ ୨୨ ପର୍ଯ୍ୟନ୍ତ ଖେଳାଯିବା କାର୍ଯ୍ୟକ୍ରମ ରହିଛି। ଭାରତ ଏଥିରେ ଉଜ୍ବେକିସ୍ତାନ, ବାହାରିନ ଏବଂ ତୁର୍କମେନିସ୍ତାନ ସହ ଗ୍ରୁପ୍ ‘ବି’ରେ ସ୍ଥାନ ପାଇଛି।
