ନୂଆଦିଲ୍ଲୀ,୧୬।୬: କୋଭିଡ୍-୧୯ ଯୋଗୁ ଦେଶର ଅର୍ଥ ବ୍ୟବସ୍ଥା କ୍ଷତିଗ୍ରସ୍ତ ହୋଇଛି। ଏଥିଯୋଗୁ ଘରୋଇ ବଜାରର ୧୩୦ ନିୟୁତ (୧୩ କୋଟି) ଚାକିରି ଉପରେ କଳାବାଦଲ ଛାଇ ହୋଇ ରହିଛି। ଏହା ମଧ୍ୟରେ ପ୍ରାୟ ୪୦% ବ୍ଲୁ କୋଲାର ବା ମାନୁଆଲ ଓ୍ବାର୍କର ବୋଲି ହ୍ୟୁମାନ ରିସୋର୍ସ କନ୍ସଲଟିଂ ଫାର୍ମ ଜିନିୟସ କନ୍ସଲଣ୍ଟାଣ୍ଟ ପକ୍ଷରୁ ସୂଚନା ଦିଆଯାଇଛି। ବିମାନ ଚଳାଚଳ, ଅଟୋମୋବାଇଲ, ଟ୍ରାଭେଲ ଏବଂ ଟୁରିଜମ, ଖାଦ୍ୟ, ମନୋରଞ୍ଜନ ସମେତ କେତେକ ବର୍ଗରେ ମାନୁଫାକଚରିଂ ଶିଳ୍ପ ଉପରେ ଅଧିକ ପ୍ରଭାବ ରହିବ ବୋଲି ରିପୋର୍ଟରେ ଉଲ୍ଲେଖ ରହିଛି।
ଜିନିୟସ କନ୍ସଲଣ୍ଟାଣ୍ଟର ଏମ୍ଡି ଆର୍.ପି. ଯାଦବ କହିଛନ୍ତି ଯେ, ଘରୋଇ ବଜାରରେ ବର୍ତ୍ତମାନ ଅନିଶ୍ଚିତତାର ସ୍ଥିତି ଉପୁଜିଛି। କୋଭିଡ୍ ୧୯ ସ୍ଥିତିରେ ସେବା ଯୋଗାଣ କରୁଥିବା ହେଲ୍ଥ କେୟାର, ଫାର୍ମାସିଟିକାଲ, ଇ-କମର୍ସ, ଆଇଟି ସର୍ଭିସ ଏବଂ ଅତ୍ୟାବଶ୍ୟକ ରିଟେଲ ସାମଗ୍ରୀ ଯୋଗାଉଥିବା କମ୍ପାନୀଗୁଡିକ ଭଲ ସ୍ଥିତିରେ ରହିଛନ୍ତି। ଏଭଳି ଶିଳ୍ପଗୁଡିକରେ ନିଯୁକ୍ତି କ୍ଷତିଗ୍ରସ୍ତ ହେବ ନାହିଁ ବୋଲି ଯାଦବ ମତ ପ୍ରକାଶ କରିଛନ୍ତି। ସେହିଭଳି ଶିଳ୍ପ ବିଶେଷଜ୍ଞମାନେ କହିଛନ୍ତି ଯେ, କମ୍ପାନୀଗୁଡିକ ଲାଗି ପରିଚାଳନା ପୁଞ୍ଜିର ବିଭିନ୍ନ ସମସ୍ୟା ଦେଖାଦେବ। ସରକାର ଟିକସ ରିହାତି, ଇଏମ୍ଆଇ ଏବଂ ଋଣ ସୁବିଧା ଯୋଗାଣ କରିଥିବା ବେଳେ ଉଚ୍ଚ ହାରର ୯% ସୁଧହାର ରହିଛି। ଏହା କମ୍ପାନୀଗୁଡିକ ଲାଗି ଚିନ୍ତାର କାରଣ ପାଲଟିଛି।
ଲକ୍ଡାଉନ ଉଠିବା ପରେ ବର୍ତ୍ତମାନ କମ୍ପାନୀଗୁଡିକ ଅଭିବୃଦ୍ଧିରେ ବିଭିନ୍ନ ସମସ୍ୟା ଉପୁଜୁଛି। ଚାହିଦା ହ୍ରାସ, ପରିଚାଳନା ପୁଞ୍ଜି ଅଭାବ ଏବଂ ଶ୍ରମିକ ଅଭାବ ଭଳି ବିଭିନ୍ନ ସମସ୍ୟା କମ୍ପାନୀଗୁଡିକ ସାମ୍ନାରେ ରହିଛି। ରାଜସ୍ବ ଏବଂ ଲାଭରେ କମ୍ପାନୀଗୁଡିକ ଲାଗି ନକାରାତ୍ମକ ସ୍ଥିତି ଉପୁଜିଛି। ଚଳିତ ବର୍ଷ ଭାରତର ଅଭିବୃଦ୍ଧି ୧ରୁ ୧.୫% ରହିବ ବୋଲି ରିପୋର୍ଟରେ କୁହାଯାଇଛି। କିଛି କ୍ଷେତ୍ର ପାଇଁ ନିୟମ କୋହଳ ହୋଇଥିବାରୁ ହସ୍ପିଟାଲିଟି ଏବଂ ହୋଟେଲ ଶିଳ୍ପ କ୍ଷତି ସତ୍ତ୍ୱେ କାରବାର ଆଗକୁ ବଢାଇବେ। ଜୁଏଲେରି, ରିଟେଲ ଶିଳ୍ପ, ହୋଟେଲ ଏବଂ ରେଷ୍ଟୁରାଣ୍ଟ ଶିଳ୍ପ ନିୟମ କୋହଳ ହେବା ଯୋଗୁ ଟ୍ରାକ୍କୁ ଫେରୁଥିବା ରିପୋର୍ଟରେ କୁହାଯାଉଛି।
