ସନା,୨ା୯(ଏଏଫ୍ପି): ହଉତି ବିଦ୍ରୋହୀଙ୍କ ଦଖଲରେ ଥିବା ୟେମେନର ଧମାରସ୍ଥିତ ଏକ ଜେଲକୁ ସୌଦି ନେତୃତ୍ୱାଧୀନ ସେନା ରବିବାର ଟାର୍ଗେଟ କରିଛି। ଆକାଶମାର୍ଗରୁ ବୋମାମାଡ଼ କରାଯିବା ଫଳରେ ଶତାଧିକ ଯୁଦ୍ଧବନ୍ଦୀ ନିହତ ହୋଇଛନ୍ତି। ଏହାକୁ ସାମରିକ ମେଣ୍ଟର ସବୁଠୁ ଘାତକ ଆକ୍ରମଣ ବୋଲି କୁହାଯାଉଛି।
ଇଣ୍ଟରନ୍ୟାଶନାଲ କମିଟି ଅଫ୍ ଦି ରେଡ୍କ୍ରସ୍ (ଆଇସିଆର୍ସି) ପକ୍ଷରୁ ମିଳିଥିବା ସୂଚନାନୁସାରେ, ୟେମେନ ରାଜଧାନୀ ସନାରୁ ୬୦ କି.ମି. ଦୂର ଦକ୍ଷିଣ-ପଶ୍ଚିମ ସହର ଧମାରସ୍ଥିତ ଏକ ବିଶ୍ୱବିଦ୍ୟାଳୟର କୋଠାକୁ ବିଦ୍ରୋହୀମାନେ କିଛିଦିନ ହେବ ଦଖଲ କରି ଜେଲରେ ପରିଣତ କରିଥିଲେ। ସେଠାରେ ସେମାନେ ଡ୍ରୋନ୍ ଓ କ୍ଷେପଣାସ୍ତ୍ର ମଧ୍ୟ ଗଚ୍ଛିତ ରଖିଥିଲେ। ୧୭୦ରୁ ଊର୍ଦ୍ଧ୍ୱ ଯୁଦ୍ଧବନ୍ଦୀଙ୍କୁ ରଖାଯାଇଥିଲା। ଯୁଦ୍ଧବନ୍ଦୀମାନେ ଶୋଇଥିବାବେଳେ ସୌଦି ନେତୃତ୍ୱାଧୀନ ସାମରିକ ମେଣ୍ଟ ଆକାଶମାର୍ଗରୁ ସେଠାରେ ବୋମାମାଡ଼ କରିଥିଲା। ଏଥିରେ ୧୦୦ରୁ ଊର୍ଦ୍ଧ୍ୱ ନିହତ ହୋଇଥିବାବେଳେ ଅନେକେ ଆହତ ହୋଇଛନ୍ତି। ଆଇସିଆର୍ସିର ଡାକ୍ତରୀ ଦଳ ଆକ୍ରମଣସ୍ଥଳକୁ ଯାଇ ଆହତଙ୍କୁ ଚିକିତ୍ସା ଚଳାଇଛନ୍ତି। ସ୍ବିଡେନର ବହିର୍ବ୍ୟାପାର ମନ୍ତ୍ରୀ ମାର୍ଗୋଟ୍ ଓ୍ବିଲଷ୍ଟର୍ମ ରବିବାର ଜୋର୍ଡାନରେ ପୁନଃ ଶାନ୍ତି ଆଲୋଚନାର ନେତୃତ୍ୱ ନେଉଥିବାବେଳେ ଏହି ଆକ୍ରମଣ ହୋଇଛି। ଏହାକୁ ଅନ୍ତର୍ଜାତୀୟ ସମୁଦାୟ ନିନ୍ଦା କରିଛି। ପ୍ରକାଶ ଯେ, ସାମରିକ ମେଣ୍ଟ ଛୋଟଛୋଟ ପିଲାଙ୍କୁ ହତ୍ୟା କରୁଥିବା ଦର୍ଶାଇ ଏହାକୁ ଜାତିସଂଘ କଳାତାଲିକାଭୁକ୍ତ କରିଥିବାବେଳେ ସୌଦି ଆରବ ଓ ଏହାର ସହଯୋଗୀ ହଉତି ବିଦ୍ରୋହୀଙ୍କୁ ମାନବ ଢାଳ ଭାବେ ବ୍ୟବହାର କରୁଥିବା ଅଭିଯୋଗ କରିଆସୁଛି।
