ସାଉଥାମ୍ପଟନ, ୬।୬- ବୋଲରଙ୍କ ଚମତ୍କାର ପ୍ରଦର୍ଶନ ପରେ ରୋହିତ ଶର୍ମାଙ୍କ ଶତକ ବଳରେ ଭାରତ ବୁଧବାର ଅନୁଷ୍ଠିତ ଆଇସିସି ବିଶ୍ୱକପ ମ୍ୟାଚରେ ଦକ୍ଷିଣ ଆଫ୍ରିକାକୁ ୬ ଉଇକେଟରେ ପରାସ୍ତ କରିଛି। ରୋଜବାଉଲର ସ୍ଲୋ ପିଚ୍ରେ ବ୍ୟାଟିଂ କଷ୍ଟସାଧ୍ୟ ହେଉଥିବାବେଳେ ରୋହିତ କ୍ୟାରିୟରର ୨୩ତମ ଦିନିକିଆ ଶତକ ହାସଲ କରି ନିଜ ଦକ୍ଷତାର ପ୍ରମାଣ ଦେବା ସହ ଭାରତକୁ ବିଜୟ ସ୍ବାଦ ଚଖାଇଛନ୍ତି। ୟୁଜବେନ୍ଦ୍ର ଚହଲ ୪ଟି ଏବଂ ଯଶପ୍ରୀତ ବୁମ୍ରା ଓ ଭୁବନେଶ୍ୱର କୁମାର ୨ଟି ଲେଖାଏ ଉଇକେଟ ନେଇ ଦକ୍ଷିଣ ଆଫ୍ରିକା ଇନିଂସକୁ ୫୦ ଓଭରରେ ୨୨୭/୯ରେ ସୀମିତ ରଖିଥିଲେ। ଜବାବରେ ଭାରତ ରୋହିତଙ୍କ ଅପରାଜିତ ଶତକ(୧୨୨ ରନ, ୧୪୪ ବଲ, ୧୩ ଚୌକା, ୨ ଛକା) ବଳରେ ୪୭.୩ ଓଭରରେ ୪ ଉଇକେଟ ହରାଇ ୨୩୦ ରନ ସଂଗ୍ରହ କରି ନେଇଥିଲା। ଅନ୍ୟ ଭାରତୀୟ ବ୍ୟାଟ୍ସମ୍ୟାନଙ୍କ ମଧ୍ୟରେ ମହେନ୍ଦ୍ର ସିଂ ଧୋନୀ ୩୪, ଲୋକେଶ ରାହୁଲ ୨୬, ଅଧିନାୟକ ବିରାଟ କୋହଲି ୧୮ ଓ ହାର୍ଦ୍ଦିକ ପାଣ୍ଡ୍ୟା ୧୫* ରନ ସ୍କୋର କରିଥିଲେ। ସ୍ମରଣୀୟ ଶତକୀୟ ଇନିଂସ ପାଇଁ ରୋହିତ ମ୍ୟାନ ଅଫ୍ ଦି ମ୍ୟାଚ ବିବେଚିତ ହୋଇଥିଲେ।
