ଭୁବନେଶ୍ୱର,୨୬ା୫ (ବ୍ୟୁରୋ): ଗତ ଦୁଇମାସରୁ ଊର୍ଦ୍ଧ୍ୱ ସମୟ ହେଲା ବନ୍ଦ ହୋଇ ପଡ଼ିଥିବା ହୋଟେଲ ଶିଳ୍ପକୁ ପୁନର୍ବାର ଖୋଲିବା ପାଇଁ ଦାବି ହୋଇଛି। ସୋମବାରଠାରୁ ଦେଶରେ ଘରୋଇ ବିମାନ ଚଳାଚଳ ଆରମ୍ଭ ହୋଇଥିବାବେଳେ ଆବଶ୍ୟକତାକୁ ଦୃଷ୍ଟିରେ ରଖି ହୋଟେଲ, ରିସର୍ଟ ଆଦି ଖୋଲିବାକୁ ଅନୁମତି ମାଗିଛି ହୋଟେଲ ଆଣ୍ଡ୍ ରେଷ୍ଟୁରାଣ୍ଟର ଆସୋସିଏଶନ ଅଫ୍ ଓଡ଼ିଶା (ଏଚ୍ଆର୍ଏଓ)। ବିଶେଷକରି ଭୁବନେଶ୍ୱର ପାଇଁ ଦାବି କରିଛି ଆସୋସିଏଶନ। ଏନେଇ ସୋମବାର ଭୁବନେଶ୍ୱର ମହାନଗର ନିଗମ (ବିଏମ୍ସି) କମିଶନର ପ୍ରେମଚନ୍ଦ୍ର ଚୌଧାରୀ ଓ ପର୍ଯ୍ୟଟନ ସଚିବ ବିଶାଲ ଦେବଙ୍କୁ ଏଚ୍ଆର୍ଏଓ ଅଧ୍ୟକ୍ଷ ଜେ.କେ. ମହାନ୍ତି ଏକ ପତ୍ର ଲେଖି ଅନୁରୋଧ କରିଛନ୍ତି।
ସୂଚନା ଅନୁଯାୟୀ, ଦୁଇ ମାସ ପରେ ସୋମବାର ଭୁବନେଶ୍ୱର ବିମାନ ବନ୍ଦରରେ ଏକାଧିକ ଯାତ୍ରୀବାହୀ ଘରୋଇ ବିମାନ ଅବତରଣ କରିଛି। ଅଧିକାଂଶ ଯାତ୍ରୀ ହୋଟେଲ କ୍ୱାରାଣ୍ଟାଇନ୍ରେ ରହିବା ପାଇଁ ଭୁବନେଶ୍ୱରର ପ୍ରମୁଖ ହୋଟେଲଗୁଡ଼ିକୁ ଯୋଗାଯୋଗ କରିଥିଲେ। ସେହିପରି ଅନ୍ୟ କେତେଜଣ ଯାତ୍ରୀ ରୁବ୍ ବୁକ୍ କରିବାକୁ ଚାହିଁଥିଲେ। ହେଲେ ସରକାରଙ୍କ ଗାଇଡ୍ଲାଇନ ଅନୁଯାୟୀ ହୋଟେଲଗୁଡ଼ିକ ସମସ୍ତ ଯାତ୍ରୀଙ୍କୁ ରହଣି ପାଇଁ ମନା କରିଥିବା ଏଚ୍ଆର୍ଏଓ ପକ୍ଷରୁ କୁହାଯାଇଛି। ମଙ୍ଗଳବାର ମଧ୍ୟ ଦେଶର ବିଭିନ୍ନ ପ୍ରାନ୍ତରୁ ଏକାଧିକ ବିମାନ ଭୁବନେଶ୍ୱର ବିମାନ ବନ୍ଦରରେ ଅବତରଣ କରିବ। ସେମାନଙ୍କ ପାଇଁ ସହରର ହୋଟେଲଗୁଡ଼ିକୁ କ୍ୱାରାଣ୍ଟାଇନ୍ ସେଣ୍ଟରଭାବେ ବ୍ୟବହାର କରାଯାଇପାରିବ। ସେହିଭଳି କେନ୍ଦ୍ର ବେସମରିକ ବିମାନ ଚଳାଚଳ ମନ୍ତ୍ରଣାଳୟର ନିୟମାବଳୀ ଅନୁଯାୟୀ ଅନ୍ତର୍ଜାତୀୟ ବିମାନ ତଥା ଦେଶ ବାହାରୁ ଆସିବାକୁ ଥିବା ଯାତ୍ରୀମାନେ ହୋଟେଲରେ ବାଧ୍ୟତାମୂଳକ ଦେୟଯୁକ୍ତ ବା ପେଡ୍ କ୍ୱାରାଣ୍ଟାଇନରେ ରହିବେ। ତେଣୁ ଏହାକୁ ଦୃଷ୍ଟିରେ ରଖି ଲୋକଙ୍କୁ ହୋଟେଲରେ ରହଣି ପାଇଁ ଅନୁମତି ଦେବାକୁ ଆସୋସିଏଶନ ଦାବି କରିଛି। ଜୁନ୍ ମାସ ପର୍ଯ୍ୟନ୍ତ ହୋଟେଲଗୁଡ଼ିକର ସମସ୍ତ ବୁକିଂ ବାତିଲ ହୋଇଥିବାରୁ ଏହାର ସିଧାସଳଖ ପ୍ରଭାବ କର୍ମଚାରୀଙ୍କ ଉପରେ ପଡ଼ିଛି। ହୋଟେଲ ମେଣ୍ଟେନାନ୍ସ, ବିଦ୍ୟୁତ ଦେୟ, ବ୍ୟାଙ୍କ ଋଣ, ଇଏମ୍ଆଇ ଆଦି ଦେବାସହ କର୍ମଚାରୀଙ୍କ ମାସିକ ବେତନ ଦେବା ହୋଟେଲ ମାଲିକଙ୍କ ପାଇଁ ସମ୍ଭବ ହେଉନି। ଏଭଳିସ୍ଥଳେ କ୍ୱାରାଣ୍ଟାଇନ୍ ସେଣ୍ଟର ମାଧ୍ୟମରେ ଆଶିଂକଭାବେ ହୋଟେଲ ଶିଳ୍ପକୁ କାର୍ଯ୍ୟକ୍ଷମ କରିବା ଦ୍ୱାରା ବହୁ କର୍ମନିଯୁକ୍ତି ସୁରକ୍ଷିତ କରାଯାଇପାରିବ ବୋଲି ମହାନ୍ତି କହିଛନ୍ତି।
