ଜଟଣୀ, ୯।୩(ଡି.ଏନ.ଏ.): ଓଡ଼ିଶା ପ୍ରସିଦ୍ଧ ହରିରାଜପୁର ପଞ୍ଚୁଦୋଳ ମେଳଣ ପାଇଁ ଏହାର ପରିଚାଳନା କମିଟି ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି। ଜଟଣୀ ନିକଟବର୍ତ୍ତୀ ହରିରାଜପୁରସ୍ଥିତ ଶ୍ରୀପଶ୍ଚିମାଶମ୍ଭୁ ସୋମନାଥ ଦେବଙ୍କ ଏହି ମେଳଣର ଜମାଣ ଉତ୍ସବ ଆସନ୍ତା ୧୪ରୁ ୧୭ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ। ୮୦ ଏକର ବିଶିଷ୍ଟ ମେଳଣ ପଡିଆରେ ୪ ଦିନ ଧରି ଅନୁଷ୍ଠିତ ହେବାକୁ ଥିବା ଏହି ମେଳଣରେ ଲକ୍ଷାଧିକ ଜନସମାଗମ ହେବ। ଚଳିତବର୍ଷ ବିପଦ ସୃଷ୍ଟିକାରୀ ବାଣ ଉପରେ କଟକଣା କରାଯାଇ କେବଳ ଆକର୍ଷଣୀୟ ଆତସବାଜି ପ୍ରଦର୍ଶନ ଉପରେ ଏଥର ଗୁରୁତ୍ୱ ଦିଆଯାଇଛି। ପୂର୍ବବର୍ଷ ଭଳି ଚଳିତବର୍ଷ ଜମାଣ ଉତ୍ସବରେ ଏକ କୋଟିରୁ ଅଧିକ ଟଙ୍କାର ଆତସବାଜି ପ୍ରଦର୍ଶନ ହେବ ବୋଲି ମେଳଣ କମିଟିର ସଂଯୋଜକ ପ୍ରସନ୍ନ ମହାରଥୀ ରବିବାର କହିଛନ୍ତି। ଏଥିପାଇଁ ୪୦ଟି ବାଣ ପାଲି ପ୍ରସ୍ତୁତ କରାଯାଉଥିବା ସେ ସୂଚନା ଦେଇଥିଲେ। ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଥିଲେ ମଧ୍ୟ ଟ୍ରାଫିକ କଟକଣା, ଆଲୋକୀକରଣ, ରାସ୍ତା ପ୍ରଶସ୍ତୀକରଣ, ସୁରକ୍ଷା ଓ ଅନ୍ୟାନ୍ୟ ଆବଶ୍ୟକ ବ୍ୟବସ୍ଥା ଉପରେ ଅଧିକ ଗୁରୁତ୍ୱ ଦେବାକୁ ମେଳଣ କମିଟିର କର୍ମକର୍ତ୍ତାଙ୍କ ପକ୍ଷରୁ କୁହାଯାଇଛି। ଏହାଛଡ଼ା ୪ଦିନ ଧରି ଅନୁଷ୍ଠିତ ମେଳଣରେ ସ୍ବଚ୍ଛତା ବଜାୟ ରଖିବା ଓ ପଲିଥିନ୍ ବ୍ୟବହାର ନ କରିବାକୁ କମିଟି ପକ୍ଷରୁ ସଚେତନ କରାଯାଉଥିବା ସେ କହିଛନ୍ତି। ଏହାଛଡ଼ା ଅଧିକ ସଂଖ୍ୟାରେ ଭ୍ରାମ୍ୟମାଣ ସ୍ବାସ୍ଥ୍ୟକେନ୍ଦ୍ର, ପାନୀୟ ଜଳ, ପୋଲିସ ମୁତୟନ ଉପରେ ପ୍ରଶାସନ ଗୁରୁତ୍ୱ ଦେବା ଆବଶ୍ୟକ ବୋଲି ସଂଯୋଜକ ପ୍ରସନ୍ନ କହିଥିଲେ। ଏ ନେଇ ପ୍ରଶାସନକୁ କମିଟି ପକ୍ଷରୁ ପ୍ରସ୍ତାବ ଦିଆଯାଇଥିବା ସେ ସୂଚନା ଦେଇଥିଲେ।
