ବଇଣ୍ଡା,୬ା୫(ଡି.ଏନ୍.ଏ)-କିଶୋରନଗର ବ୍ଲକ ହଣ୍ଡପା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଦୀର୍ଘକିଛି ମାସ ହେବ ଡାକ୍ତରୀ ପଦବୀ ଖାଲିପଡ଼ିଛି। ଫଳରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡ଼ିଛି। ତୁରନ୍ତ ସ୍ବାସ୍ଥ୍ୟକେନ୍ଦ୍ରରେ ଜଣେ ଡାକ୍ତରଙ୍କୁ ନିଯୁକ୍ତି କରିବା ପାଇଁ ବୁଧବାର ଗ୍ରାମବାସୀ ଦାବି କରିଛନ୍ତି। ଏ ନେଇ ଏକ ଦାବିପତ୍ର ଡାକ ଯୋଗେ ଅନୁଗୋଳ ଜିଲାପାଳ, ରାଜ୍ୟ ସ୍ବାସ୍ଥ୍ୟମନ୍ତ୍ରୀଙ୍କୁ ପ୍ରଦାନ କରିଛନ୍ତି।
ଗ୍ରାମବାସୀ କହିଛନ୍ତି, ଆଠମଲ୍ଲିକ ଉପଖଣ୍ଡର ବହୁ ପୁରାତନ ସ୍ବାସ୍ଥ୍ୟକେନ୍ଦ୍ର ହଣ୍ଡପା ହୋଇଥିବାବେଳେ ଦୀର୍ଘ କିଛିବର୍ଷ ହେଲା ସମସ୍ୟା ଦେଇ ଗତି କରୁଛି। ଗତ କିଛିମାସ ହେବ ଡାକ୍ତରୀ ପଦବୀ ଖାଲି ପଡ଼ିଥିଲେ ମଧ୍ୟ ନିଯୁକ୍ତି କରାଯାଉ ନାହିଁ। ଏହି ସ୍ବାସ୍ଥ୍ୟକେନ୍ଦ୍ର ଉପରେ ହଣ୍ଡପା, ବିଲେଇନାଳୀ, କଟରଙ୍ଗା, ନାକିଚି, କଣ୍ଟେଇକୁଳିଆ ଆଦି ପଞ୍ଚାୟତର ୨୦ ହଜାରରୁ ଊର୍ଦ୍ଧ୍ୱ ଲୋକ ଚିକିତ୍ସା ପାଇଁ ନିର୍ଭର କରୁଛନ୍ତି। ହେଲେ ଡାକ୍ତର ନ ଥିବା ଯୋଗୁ ସାମାନ୍ୟ ଜ୍ୱର ହେଲେ ଘରୋଇ କ୍ଲିନିକ ନ ଚେତ ୩୦ କିମି ଦୂର କିଶୋରନଗର, ୫୦ କିମି ଦୂର ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ଉପରେ ନିର୍ଭର କରୁଛନ୍ତି। ହଣ୍ଡପାରେ ମୃତଦେହ ବ୍ୟବଚ୍ଛେଦ ଗୃହ ଥିବାବେଳେ ଡାକ୍ତର ନ ଥିବା ଯୋଗୁ ବ୍ୟବଚ୍ଛେଦ କରିବାରେ ବିଳମ୍ବ ହେଉଛି। ସେହିପରି ୫୫ ନଂ. ଜାତୀୟ ରାଜପଥ ରାସ୍ତା କଡ଼ରେ ଏହି ସ୍ବାସ୍ଥ୍ୟକେନ୍ଦ୍ର ଥିବାରୁ ଦୁର୍ଘଟଣାଗ୍ରସ୍ତ ଗୁରୁତର ବ୍ୟକ୍ତିମାନେ ଚିକିତ୍ସା ନ ପାଇ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ତୁରନ୍ତ ଡାକ୍ତର ନିଯୁକ୍ତି କରିବା ପାଇଁ ଗ୍ରାମର ଗୌରାଙ୍ଗ ପ୍ରଧାନ, କଷ୍ଟୁ ପ୍ରଧାନ, ବିଶ୍ୱଜିତ୍ ପ୍ରଧାନ, ଗୁଲୁ ଦେହୁରି, ରମେଶ ଦେହୁରି, ଗୋପାଳ ସାହୁ, ଅଜିତ ପ୍ରଧାନ, ସରୋଜ ମିଶ୍ର, ଅରକ୍ଷିତ ମିଶ୍ର ପ୍ରମୁଖ ଦାବି କରିଛନ୍ତି।
