ନୂଆଗାଁ,୨୫ା୮ (ଡି.ଏନ.ଏ.): ସ୍ବଚ୍ଛ ଭାରତ ମିଶନ ମାଧ୍ୟମରେ ଦେଶର ପ୍ରତ୍ୟେକ ପରିବାରକୁ ଘରୋଇ ପାଇଖାନା ଯୋଗାଇଦେବା ପାଇଁ ସରକାର ପ୍ରତିଶ୍ରୁତିବଦ୍ଧ। ହେଲେ କେତେଜଣ କର୍ମଚାରୀଙ୍କ ଅବହେଳା ଯୋଗୁ ଏହାର ସୁଫଳ ଲୋକମାନେ ପାଇପାରୁ ନାହାନ୍ତି। ନୟାଗଡ଼ ଜିଲା ନୂଆଗାଁ ବ୍ଲକରେ ଏହାର ନମୁନା ଦେଖିବାକୁ ମିଳିଛି। ବ୍ଲକ ଅନ୍ତର୍ଗତ ଜାକେଡା, ଗୁମୀ, କାପ୍ତାପଲ୍ଲୀ ପଞ୍ଚାୟତରେ ଅନେକ ଆଦିବାସୀ ପରିବାର ଏହି କାର୍ଯ୍ୟକ୍ରମ ଜରିଆରେ ଘରୋଇ ପାଇଖାନା ପାଇବାରୁ ବଞ୍ଚିତ ହୋଇଛନ୍ତି।
ଘରୋଇ ପାଇଖାନା ନିର୍ମାଣ କାର୍ଯ୍ୟ ସୁଚାରୁରୂପେ ତୁଲାଇବା ପାଇଁ ପ୍ରଥମେ ଏକ ବେସ୍ ଲାଇନ ସର୍ଭେ କରାଯାଇଥିଲା। ସେଥିରେ ନୂଆଗାଁ ବ୍ଲକର ୨୫୯୬୩ ହିତାଧିକାରୀଙ୍କ ନାମ ପଞ୍ଜୀକୃତ ହୋଇ ପ୍ରଥମ ପର୍ଯ୍ୟାୟରେ ୪୯୯୦ ହିତାଧିକାରୀଙ୍କ ପାଇଖାନା ନିର୍ମାଣ କାର୍ଯ୍ୟ ଶେଷ ହୋଇଥିଲା। ଦ୍ୱିତୀୟ ପର୍ଯ୍ୟାୟ ତାଲିକାରେ ୨୦୯୭୩ ହିତାଧିକାରୀଙ୍କ ପାଇଖାନା ନିର୍ମାଣ ୨୦୧୯ ଅକ୍ଟୋବର ସୁଦ୍ଧା କରାଇବାର ଯୋଜନା ରହିଥିବା ବେଳେ ଅଦ୍ୟାବଧି ପ୍ରାୟ ୭ ହଜାର ହିତାଧିକାରୀଙ୍କ ପାଇଖାନା ନିର୍ମାଣ ହୋଇପାରି ନାହିଁ । ସେହିପରି ଦୁଇଟି ଯାକ ତାଲିକାରୁ ବାଦ୍ ପଡିଥିବା ବଡଜିରି, ତାକୁଡା, ଲୁଣି, ବାଗିଆମା, କେନ୍ଦୁବଣିଆ, କୁଶବିଡା, ସୁଡୁଙ୍ଗି, ବାମୁରୀ ଆଦି ଗ୍ରାମର ଆଦିବାସୀଙ୍କ ସମେତ ଅନ୍ୟ ହିତାଧିକାରୀଙ୍କ ନାମ ତାଲିକାଭୁକ୍ତ କରିବା ପାଇଁ ନିର୍ଦ୍ଦେଶ ଦିଆଯାଇଥିବା ବେଳେ ତାହା କରାଯାଇ ନାହିଁ। ତେଣୁ ଅକ୍ଟୋବର ମାସରେ ସ୍ବଚ୍ଛ ଭାରତ ମିଶନ ଦ୍ୱାରା କରାଯାଉଥିବା ଘରୋଇ ପାଇଖାନା ନିର୍ମାଣ ବନ୍ଦ ହେବାକୁ ବସିଥିବା ବେଳେ ତାଲିକାରୁ ବାଦ୍ ପଡିଥିବା ଆଦିବାସୀମାନେ କିଭଳି ପାଇଖାନା ନିର୍ମାଣ କରିବେ ସେ ନେଇ ଚିନ୍ତାରେ ଅଛନ୍ତି। ଅନ୍ୟପକ୍ଷେ ସ୍ବଚ୍ଛ ଭାରତ କାର୍ଯ୍ୟକ୍ରମରେ ସମସ୍ତ କର୍ମଚାରୀ ବ୍ୟସ୍ତ ଯୋଗୁ ନୂଆଗାଁ ବ୍ଲକର ଆମ ଗାଁ ଆମ ବିକାଶ କାର୍ଯ୍ୟ ହୋଇପାରୁ ନ ଥିବା ନେଇ ଗତ ସମିତି ବୈଠକରେ ବିଡିଓ ସଫେଇ ଦେଇଥିବା ବେଳେ ପ୍ରାୟ ୭ ହଜାର ହିତାଧିକାରୀଙ୍କ ପାଇଖାନା ନିର୍ମାଣ ନ ହେବା ଓ ଆଦିବାସୀମାନଙ୍କ ନାମ ତାଲିକାଭୁକ୍ତ କରାଯାଇ ନ ପାରିବା କର୍ମଚାରୀମାନଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ବ୍ଲକ ଅଧିକାରୀମାନଙ୍କ ଅବହେଳା ଯୋଗୁ ଜନସାଧାରଣ ସରକାରୀ ଯୋଜନାରୁ ବଞ୍ଚତ୍ତ ହେଉଥିବା କହିଛନ୍ତି ଜାକେଡା ସରପଞ୍ଚ ତ୍ରିଲୋଚନ ସାହୁ। ଏ ସମ୍ପର୍କରେ ନୂଆଗାଁ ବିଡିଓ ଶିରିୟାଲ ଶୁଭ୍ର ପଟେଲଙ୍କୁ ପଚାରିବାରୁ ସେ କହିଥିଲେ, ତାଲିକାରୁ ବାଦ୍ ପଡିଥିବା ଲୋକମାନଙ୍କ ପାଇଁ ଏମ୍ଜିଏନ୍ଆର୍ଇଜିଏସ୍ ମାଧ୍ୟମରେ ପାଇଖାନା ନିର୍ମାଣ କରାଯିବ।
