ନୂଆଦିଲ୍ଲୀ,୧୮-୧୦:ଫେବୃୟାରୀ ୨୬ରେ ଭାରତୀୟ ବାୟୁସେନାର ବାଲାକୋଟ ଏୟାରଷ୍ଟ୍ରାଇକ୍ ପରେ ନୂଆଦିଲ୍ଲୀ ଓ ଇସ୍ଲାମାବାଦ ମଧ୍ୟରେ ଉତ୍ତେଜନା ଲାଗିରହିଛି। ସେପ୍ଟେମ୍ବର ୨୩ରେ ନୂଆଦିଲ୍ଲୀରୁ କାବୁଲ ଯାଉଥିବା ଭାରତୀୟ ଯାତ୍ରୀବାହୀ ବିମାନକୁ ପାକିସ୍ତାନୀ ବାୟୁସେନା ଆକାଶ ମାର୍ଗରେ ପାଖାପାଖି ଘଣ୍ଟାଏ ଅଟକାଇଥିଲା ବୋଲି ଜଣାପଡିଛି। ସ୍ପାଇସ୍ ଜେଟ୍ କମ୍ପାନୀର ଉକ୍ତ ବିମାନକୁ ପାକିସ୍ତାନର ୨ଟି ଏଫ୍-୧୬ ଯୁଦ୍ଧବିମାନ ଘେରିଯାଇଥିଲେ। ବିମାନକୁ ତଳକୁ ଖସାଇବା ଲାଗି ସେମାନେ ସ୍ପାଇସ୍ ଜେଟ୍ର ପାଇଲଟଙ୍କୁ କହିବା ସହ ଉଡାଣର ସବିଶେଷ ବିବରଣୀ ମାଗିଥିଲେ।
ଏସ୍ଜି-୨୧ ବିମାନରେ ୧୨୦ ଯାତ୍ରୀ ଥିଲେ। ଗୁରୁତ୍ୱପୂର୍ଣ୍ଣ କଥା ହେଲା, ସେତେବେଳେ ଭାରତ ପାଇଁ ପାକିସ୍ତାନ ଏହାର ବାୟୁସୀମା ବନ୍ଦ କରି ନ ଥିଲା। ଏହା ଭାରତର ବ୍ୟବସାୟିକ ବିମାନ ଓ ଯାତ୍ରୀଙ୍କୁ ନେଇ କାବୁଲ ଅଭିମୁଖେ ଯାଉଛି ବୋଲି ସ୍ପାଇସ୍ ଜେଟ୍ର କ୍ୟାପ୍ଟେନ ପାକ୍ ବାୟୁସେନା ବିମାନର ପାଇଲଟଙ୍କୁ ଜଣାଇଥିଲେ। ଏଫ୍-୧୬ ଯୁଦ୍ଧବିମାନ ଦୁଇଟି ସ୍ପାଇସ୍ ଜେଟ୍ ବିମାନ ଚାରିପଟେ ଚକ୍କର କାଟିବା ସହ ଏତେ ନିକଟକୁ ଆସିଯାଇଥିଲେ ଯେ, ତାହାର ପାଇଲଟଙ୍କୁ ଯାତ୍ରୀମାନେ ସ୍ପଷ୍ଟ ଦେଖିପାରିଥିଲେ। ସେମାନେ ହାତ ହଲାଇ ସ୍ପାଇସ୍ ଜେଟ୍ ପାଇଲଟଙ୍କୁ ବିମାନ ତଳକୁ କରିବା ଲାଗି ଇସାରା ଦେଉଥିବା ଦେଖାଯାଇଥିଲା ବୋଲି ଜଣେ ଯାତ୍ରୀ କହିଛନ୍ତି।
