ବମ୍ବେ: ୨୦୧୮ରେ ରିଲିଜ ହୋଇଥିଲା କରିନା କପୁର ଖାଁ, ସୋନମ କପୁର, ସ୍ବରା ଭାସ୍କର, ଶିଖା ତଲ୍ସିନିୟା ଅଭିନୀତ ‘ବୀରେ ଦି ଓ୍ବେଡିଂ’। ଏବେ ଏହାର ସିକ୍ୟୁଏଲ(ଉତ୍ତରବୃତ୍ତାନ୍ତ) ନିର୍ମାଣ ହେବାକୁ ଯାଉଛି। ପ୍ରଯୋଜିକା ରିୟା କପୁର ନିଜ ଇନ୍ଷ୍ଟାଗ୍ରାମରେ ‘ଆସ୍କ ମି ଏନିଥିଙ୍ଗ’ ସେଶନରେ ଜଣେ ପ୍ରଶଂସକଙ୍କ ପ୍ରଶ୍ନର ଉତ୍ତର ଦେବା ପରେ ଫିଲ୍ମ ନିର୍ମାଣ ହେଉଥିବା ସ୍ପଷ୍ଟ ହୋଇଛି। ଭାବିଥିବା ସମୟର ପୂର୍ବରୁ ଏହା ହେଉଥିବାରୁ ଖୁବ୍ ଉତ୍ସାହିତ ଥିବା କହିଛନ୍ତି ରିୟା। ତେବେ ଫିଲ୍ମ ନିର୍ମାଣ ହେବା ନେଇ ସୂଚନା ମିଳିଥିଲେ ହେଁ କଳାକାର ବଦଳିବେ ନା ପୂର୍ବଭଳି ରହିବେ ତାହା ଜଣାପଡ଼ିନାହିଁ।
ସିକ୍ୟୁଏଲ ନେଇ କରିନା ମଧ୍ୟ ପ୍ରତିକ୍ରିୟା ରଖିଥିଲେ। ରିୟା ସେ ନେଇ ଯୋଜନା କରୁଛନ୍ତି। ମୋ ଭଳି ସମସ୍ତେ ଉତ୍ସାହିତ ଅଛନ୍ତି। ରିୟା ଏବଂ ସୋନମଙ୍କ ସହ କାମ କରିବା ତାଙ୍କୁ ଆନନ୍ଦ ଦିଏ ବୋଲି ସେ କହିଥିଲେ।
ଚାରିଜଣ ଝିଅଙ୍କ ବନ୍ଧୁତା ଉପରେ ନିର୍ମିତ ଫିଲ୍ମ ‘ବୀରେ ଦି ଓ୍ବେଡିଂ’ର ନିର୍ଦ୍ଦେଶନା ଦେଇଥିଲେ ଶଶାଙ୍କ ଘୋଷ। ଅନିଲ କପୁର, ରିୟା କପୁର, ଏକତା କପୁର, ନିଖିଲ ଏବଂ ଶୋଭା କପୁରଙ୍କ ସଂସ୍ଥା ଏହାର ପ୍ରଯୋଜନା ଭାର ସମ୍ଭାଳିଥିଲା। ରିଲିଜ ବେଳେ ଫିଲ୍ମଟି ବକ୍ସ ଅଫିସରେ ୧୩୮ କୋଟି ଟଙ୍କା ବ୍ୟବସାୟ କରିଥିଲା।
