କଣିହାଁ,୧୧।୯(ଡି.ଏନ.ଏ.)-କଣିହାଁ ବ୍ଲକ ବନାଞ୍ଚଳ ଅଧୀନ ରେଙ୍ଗାଳି ଫରେଷ୍ଟ ସେକ୍ସନରେ ୩ ମାସ ହେଲା ହାତୀ ଉପଦ୍ରବ ଲାଗି ରହିଛି। ବନ ବିଭାଗ ହାତୀ ଘଉଡାଇବାରେ ବିଫଳ ହେଉଥିବାବେଳେ ଜନ ସାଧାରଣ ଆତଙ୍କିତ ଅବସ୍ଥାରେ ରହିଛନ୍ତି। ସୋମବାର ରେଙ୍ଗାଳି ଫରେଷ୍ଟ ସେକ୍ସନର ସୁଲେଇପାଳ ଗ୍ରାମକୁ ଏକ ହାତୀପଲ ଆସି ଅନେକ ବ୍ୟକ୍ତିଙ୍କ ଘର ଭାଙ୍ଗିବା ସହ ଧାନ ଫସଲ ନଷ୍ଟ କରିଥିଲେ। ରାସ୍ତା ଉପରେ ହାତୀପଲ ରହିଥିବାବେଳେ ବନ ବିଭାଗ କର୍ମଚାରୀଙ୍କୁ ସୂଚନା ଦିଆଯାଇଥିଲେ ମଧ୍ୟ ଘଉଡାଇବା ପାଇଁ ଆସି ନ ଥିଲେ। ମଙ୍ଗଳବାର ବନ ବିଭାଗ କର୍ମଚାରୀ ସୁଲେଇପାଳ ଗ୍ରାମକୁ ଆସିବା ପରେ ଅସନ୍ତୋଷ ଦେଖାଦେଇଥିଲା। କ୍ଷତିଗ୍ରସ୍ତମାନେ ବନ ବିଭାଗ କର୍ମଚାରୀଙ୍କୁ ଘେରାଉ କରି ଅଟକ ରଖିଥିଲେ। ଏ ନେଇ କଣିହାଁ ବନାଞ୍ଚଳ ଅଧିକାରୀ ପ୍ରତାପ ରାଉଳ କହିଛନ୍ତି, ବିଧିମତେ କ୍ଷତିଗ୍ରସ୍ତଙ୍କୁ ସହାୟତା ଦିଆଯିବ। ଫରେଷ୍ଟର ସରସ୍ବତୀ ବେହେରାଙ୍କ ଉଦ୍ୟମରେ ସମାଧାନ ହୋଇଛି। ଅର୍କୀଳ, ସୁଲେଇପାଳ ରାସ୍ତାରେ ୧୫ଟି ହାତୀ ରହିଛନ୍ତି। ଘଉଡାଇବା ପାଇଁ ବନକର୍ମଚାରୀ ନିୟୋଜିତ ହୋଇଛନ୍ତି।
