ରତ୍ନଗିରି,୩ା୫(ଡି.ଏନ୍/ଏ.): ଯାଜପୁର ଜିଲାରେ ଶନିବାର ୮ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ। ସେଥିମଧ୍ୟରୁ ବରୀ ବ୍ଲକ କଳାମାଟିଆ ପଞ୍ଚାୟତର ତଲକାଇପଡ଼ା ଗ୍ରାମରୁ ଜଣେ, ଉଦୟନାଥପୁରରୁ ଜଣେ ଓ ବାଇଁଶିରିଆ ପଞ୍ଚାୟତରୁ ୨ ଜଣ ସଂକ୍ରମିତ ବ୍ୟକ୍ତି ଚିହ୍ନଟ ହୋଇଥିଲେ। ଏହାକୁ ଗୁରୁତ୍ୱ ଦେଇ ପ୍ରଶାସନ ପକ୍ଷରୁ କଣ୍ଟେନ୍ମେଣ୍ଟ୍ ଜୋନ୍ ଭାବେ ଘୋଷଣା କରାଯାଇଥିଲା। କଳାମାଟିଆ ପଞ୍ଚାୟତର ୪ଟି ରାଜସ୍ବ ଗ୍ରାମକୁ ବରୀ ପ୍ରଶାସନ ପକ୍ଷରୁ ସିଲ୍ କରାଯାଇଛି। ସିଲ୍ ହୋଇଥିବା ସ୍ଥାନରେ ବରୀ ପୋଲିସ ପକ୍ଷରୁ ଏହି ଅଞ୍ଚଳର କୌଣସି ବ୍ୟକ୍ତି ଯେମିତି ବାହାରକୁ ନ ଆସନ୍ତି ସେଥିପ୍ରତି କଡ଼ା ନଜର ରଖାଯାଇଛି। ଅପରପକ୍ଷରେ ଉଦୟନାଥପୁର ରାଜସ୍ବ ଗ୍ରାମ ଓ ବାଇଁଶିରିଆ ପଞ୍ଚାୟତର ବାଲିଆପାଳ,ମହମ୍ମଦପୁର,ବାଲିକାନ୍ଥିଆ,ବାଇଁଶିରିଆ ଓ ଚୁଡ଼ାକଳ ଛକ ପ୍ରଭୃତି ଅଞ୍ଚଳ ସିଲ୍ ହୋଇଛି। ବରୀ ତହସିଲଦାର ସରୋଜକାନ୍ତ ନାୟକ, ବରୀ ଥାନାଧିକାରୀ ମାର୍କଣ୍ଡ ଚନ୍ଦ୍ର ମିଶ୍ର ଓ ବରୀର ଭାରପ୍ରାପ୍ତ ବିଡିଓ ଶାଶ୍ୱତ ଜେନା ମିଳିତ ଭାବେ ଏହି ଅଞ୍ଚଳର ଲୋକମାନେ ସରକାରୀ ନିୟମକୁ ଉଲ୍ଲଂଘନ କରନ୍ତି ପୃଥକ୍ ପୃଥକ୍ ଭାବେ ଟିମ୍ ଗଠନ କରି ବ୍ୟକ୍ତିଗତ ଭାବେ ତଦାରଖ କରିଥିବା ଦେଖିବାକୁ ମିଳିଛି। ଏହା ଅତ୍ୟନ୍ତ ସମ୍ବେଦନଶୀଳ ଘଟଣା ହୋଇଥିବାରୁ ପ୍ରଶାସନିକସ୍ତରରେ କଣ୍ଟେନ୍ମେଣ୍ଟ ଜୋନ୍ଗୁଡ଼ିକୁ ସାନିଟାଇଜେଶନ କରାଯିବା ସହିତ ଆବଶ୍ୟକସ୍ଥଳେ ଏହି ଅଞ୍ଚଳର ଲୋକମାନଙ୍କ ପାଇଁ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପ୍ରଶାସନ ସହଯୋଗରେ ଯୋଗାଇ ଦିଆଯିବ ବୋଲି ବରୀ ତହସିଲଦାର ସରୋଜକାନ୍ତ ନାୟକ ପ୍ରକାଶ କରିଛନ୍ତି।
