ଏଲୁରୁ,୭ା୧୧: ଗତ ୨୦ ମାସ ମଧ୍ୟରେ ୧୦ ଜଣଙ୍କୁ ବିଷ ଦେଇ ହତ୍ୟା କରିଥିବା ସିରିଏଲ୍ କିଲର ଶିବାଙ୍କୁ ଆନ୍ଧ୍ରପ୍ରଦେଶ ପୋଲିସ ବୁଧବାର ଗିରଫ କରିଛି। ସେ ଆଉ ୨୦ ଜଣଙ୍କୁ ହତ୍ୟାକରିବା ଲାଗି ଯୋଜନାରେ ଥିଲା ବୋଲି ପୋଲିସ ବିଶ୍ୱାସ କରୁଛି। କେରଳର ଜୋଲି ଯୋସେଫ୍ଙ୍କ ଭଳି ଆନ୍ଧ୍ରପ୍ରଦେଶର ଭେଲାଙ୍କି ସୀମାଦ୍ରି ଓରଫ ଶିବା (୩୮) ସିୟାନାଇଡ୍ ଦେଇ ହତ୍ୟା କରୁଥିଲେ। ଜୋଲି ୧୪ ବର୍ଷରେ ତାଙ୍କ ପରିବାରର ୬ ଜଣଙ୍କୁ ଏହିପରି ହତ୍ୟା କରିଥିଲେ। ଗତ ମାସରେ ପୋଲିସ ତାଙ୍କୁ ଗିରଫ କରିବା ପରେ ହତ୍ୟା ଗୁମର ଖୋଲିଥିଲା। ଅନ୍ୟପକ୍ଷରେ ଓ୍ବାଚ୍ମ୍ୟାନ୍ରୁ ରିଅଲ ଇଷ୍ଟେଟ୍ ଏଜେଣ୍ଟ ହୋଇଥିବା ଶିବା ୨୦୧୮ ଫେବୃୟାରୀରୁ ପ୍ରତି ଦୁଇମାସରେ ଜଣେ ଲେଖାଏଙ୍କୁ ହତ୍ୟା କରିଚାଲିଥିଲେ। ମୃତକଙ୍କ ମଧ୍ୟରେ ଶିବାଙ୍କ ଜେଜେମାଆ, ଭାଉଜ, ଘର ମାଲିକାଣୀ ଏବଂ ରାଜମହେନ୍ଦ୍ରୀ ନିକଟରେ ଥିବା ପୁରୁଷୋତ୍ତମପାଟଣାମ୍ ଆଶ୍ରମର ଧର୍ମ ପ୍ରଚାରକ ଶ୍ରୀରାମକୃ୍ଷ୍ଣ ନନ୍ଦ ଅଛନ୍ତି।
ରିଅଲ ଇଷ୍ଟେଟ୍ ବ୍ୟବସାୟରେ ବିପୁଳ କ୍ଷତି ସହିବା ପରେ ଏହାକୁ ଭରଣା କରିବା ଲାଗି ସେ ଲୋକଙ୍କୁ ମିଥ୍ୟା ପ୍ରଲୋଭନ ଦେଖାଇବା ଆରମ୍ଭ କରିଥିଲା। ନିଜ ପାଖରେ ଚୁମ୍ବକୀୟ ଚାଉଳ, ଯାଦୁକରି ମୁଦ୍ରା, ଦୁଇମୁଣ୍ଡ ଥିବା ସାପ ରହିଛି ବୋଲି କହି ଏହାଦ୍ୱାରା ସେ ଅନ୍ୟମାନଙ୍କ ସମ୍ପତ୍ତିକୁ ଦୁଇଗୁଣା କରିଦେବା ସହ ମଧୁମେହ ଭଳି ଦୁରାରୋଗ୍ୟ ବ୍ୟାଧିକୁ ଭଲ କରିଦେବେ ବୋଲି ଦାବି କରୁଥିଲେ। ସେ କରିଥିବା ଗ୍ରାହକ ତାଲିକାରେ ଆଉ ୨୦ ଜଣଙ୍କ ନାଁ ଥିବାରୁ ସେମାନଙ୍କୁ ମଧ୍ୟ ସେ ହତ୍ୟା କରିଥାନ୍ତେ ବୋଲି ପୋଲିସ କହିଛି। ଜଣେ ଗ୍ରାହକଙ୍କୁ ଫସାଇବା ପରେ ତାଙ୍କୁ ସୁନା ଓ ଟଙ୍କା ଧରି ଏକ ନିର୍ଦ୍ଦିଷ୍ଟ ସ୍ଥାନକୁ ଆସିବାକୁ କହୁଥିଲେ। ସେଠାରେ ପହଞ୍ଚତ୍ବା ପରେ ତାଙ୍କୁ ଶିବା ପ୍ରସାଦରେ ସାଇନାଇଡ୍ ମିଶାଇ ଖାଇବାକୁ ଦେଉଥିଲେ। ଲୋକଟି ମରିଯିବା ପରେ ଟଙ୍କା ଓ ସୁନା ଧରି ଶିବା ପଳାଇଆସୁଥିଲେ। ଏହିପରି ସେ ୨୪ .୬୦ ଲକ୍ଷ ଟଙ୍କା ଓ ୩୫ ସ୍ବର୍ଣ୍ଣ ମୁଦ୍ରା ସଂଗ୍ରହ କରିବା ସହ ଏଲୁରୁରେ ଜମି କିଣି ଘର କରିଥିଲେ।
