ଭୁବନେଶ୍ୱର,୮ା୧୧(ବ୍ୟୁରୋ) : ସିଏସ୍ଏନ୍ଆର୍ ଓ ସିଏଚ୍ଆର୍ଆଇ ପକ୍ଷରୁ ରାଜ୍ୟର ୪ ପୋଲିସ ଜିଲାର ଅପରାଧ ରିପୋର୍ଟ ଗୁରୁବାର ପ୍ରକାଶ ପାଇଛି। ୨୦୧୭ ରୁ ୨୦୧୮ ମେ’ ମଧ୍ୟରେ ଭୁବନେଶ୍ୱର, କଟକ, ଯାଜପୁର ଓ କନ୍ଧମାଳ ପୋଲିସ ଜିଲାରେ ଘଟିଥିବା ଅପରାଧର ସ୍ଥିତି ସଂକ୍ରାନ୍ତରେ ଉଲ୍ଲେଖ ରହିଛି। ଆର୍ଟିଆଇ, ରାଷ୍ଟ୍ରୀୟ ଓ ରାଜ୍ୟ ଅପରାଧ ରେକର୍ଡ ବ୍ୟୁରୋ, ପୋଲିସ ଅନୁସନ୍ଧାନ ଓ ବିକାଶ ବ୍ୟୁରୋ, ଓଡିଶା ସରକାର, କମିଶନରେଟ ପୋଲିସ, ରାଷ୍ଟ୍ରୀୟ ଏବଂ ରାଜ୍ୟ ମାନବାଧିକାର ଆୟୋଗ, ବିଧାନସଭା ତଥ୍ୟକୁ ନେଇ ଏହି ରିପୋର୍ଟ ପ୍ରସ୍ତୁତ କରାଯାଇଛି। ତେବେ ଭୁବନେଶ୍ୱର ପୋଲିସ ଜିଲାରେ ସର୍ବାଧିକ ଅଭିଯୋଗ ରହିଥିବାବେଳେ ଏହା ତଳକୁ ଯାଜପୁର, କଟକ ଓ କନ୍ଧମାଳ ରହିଛି।
ଉକ୍ତ ରିପୋର୍ଟ ଅନୁସାରେ, ଏହି ୪ ପୋଲିସ ଜିଲାରେ ୨୦୧୭ରେ ୧୭,୦୮୨ ଓ ୨୦୧୮ ଜାନୁୟାରୀରୁ ମେ ମଧ୍ୟରେ ୬,୯୯୯ ଅଭିଯୋଗ ବିଭିନ୍ନ ଥାନାରେ ଦାଖଲ ହୋଇଛି। ୨୦୧୭ରେ ଭୁବନେଶ୍ୱରରେ ସର୍ବାଧିକ ୭ ହଜାର ୩୩୦ ଓ ୨୦୧୮ ଜାନୁୟାରୀ-ମେ ମଧ୍ୟରେ ୩୦୨୮ ଆପରାଧିକ ମାମଲା ରୁଜୁ ହୋଇଛି। ତେବେ ଶହୀଦନଗର ଥାନାରେ ସର୍ବାଧିକ ୮୬୧, ଖଣ୍ଡଗିରି ଥାନାରେ ସର୍ବାଧିକ ୬ ହତ୍ୟା ଓ ୪୩ ଲୁଟ୍ ଏବଂ କ୍ୟାପିଟାଲ ଥାନାରେ ୨୩୨ ଚୋରି ମାମଲା ରୁଜୁ ହୋଇଛି। ସେହିପରି ୨୦୧୭ରେ କଟକ ପୋଲିସ ଜିଲାରେ ୩,୮୭୯, ଯାଜପୁରରେ ୪,୫୪୬ ଓ କନ୍ଧମାଳରେ ୧୩୨୭ ଆପରାଧିକ ମାମଲା ରୁଜୁ ହୋଇଛି। ଏହି ବର୍ଷରେ ରାଜ୍ୟରେ ୨,୨୨୧ ବଳାତ୍କାର ମାମଲା ରୁଜୁ ହୋଇଥିବାବେଳେ ଏହି ୪ ପୋଲିସ ଜିଲାରେ ୫୯୯ ମାମଲା ହୋଇଛି। ଏଥିସହ ମହିଳାଙ୍କ ବିରୋଧରେ ୨୦୧୭ରେ ୧,୮୭୫ ମାମଲା ରୁଜୁ ହୋଇଛି। ସେହିଭଳି ପୋଲିସ ଅଧିକାରୀଙ୍କ ବିରୋଧରେ କଟକ ଏଚ୍ଆର୍ପିସିରେ ୧୧୩, ରାଜ୍ୟ ମାନବାଧିକାର କମିଶନଙ୍କ ନିକଟରେ ୩୬୬, ଜାତୀୟ ମାନବାଧିକାର କମିଶନଙ୍କ ନିକଟରେ ୪୩୯ ଓ ରିଜର୍ଭ ପୋଲିସ ଭୁବନେଶ୍ୱରଙ୍କ ନିକଟରେ ୧୪ ଜଣ ପୋଲିସ ଅଧିକାରୀଙ୍କ ବିରୋଧରେ ମାମଲା ରୁଜୁ କରାଯାଇଥିବା ପ୍ରକାଶିତ ରିପୋର୍ଟରୁ ଜଣାପଡିଛି।
ଏଥିସହ ଉକ୍ତ ରିପୋର୍ଟରେ କେତେକ ପ୍ରସ୍ତାବ ଦିଆଯାଇଛି। ରାଜ୍ୟ ପୋଲିସ ପ୍ରଶାସନ ୩୩ ପ୍ରତିଶତ ମହିଳା ପୋଲିସଙ୍କୁ ନିଯୁକ୍ତି ଦିଅନ୍ତୁ। ପ୍ରତ୍ୟେକ ଥାନାରେ ମହିଳାଙ୍କ ପାଇଁ ଅଲଗା ଶୌଚାଳୟ ଓ ଲକ୍ଅପ୍ ବ୍ୟବସ୍ଥା, ଥାନାରେ ର଼୍ୟାମ୍ପ ଓ ସିସିଟିଭି କ୍ୟାମେରା ବ୍ୟବସ୍ଥା କରିବାକୁ ସୁପାରିସ କରାଯାଇଛି। ଭୁବନେଶ୍ୱରସ୍ଥିତ ଦି ପ୍ରେସ କ୍ଲବ ଅଫ୍ ଓଡିଶାଠାରେ ଗୁରୁବାର ଆୟୋଜିତ ରିପୋର୍ଟ ଉନ୍ମୋଚନ କାର୍ଯ୍ୟକ୍ରମରେ ବିଧାୟକ ସୌମ୍ୟ ରଞ୍ଜନ ପଟ୍ଟନାୟକ, ପ୍ରଫେସର କୃଷ୍ଣ ଦେବା ରାଓ, ସିଏସ୍ଏନ୍ଆର୍ ସଚିବ ଧୀରେନ୍ଦ୍ର ପଣ୍ଡା ଓ ସିଏଚ୍ଆର୍ଆଇ ପୋଗ୍ରାମ ଅଫିସର ଦେବିକା ପ୍ରସାଦ ଓ ଅନ୍ୟ ସାମଜିକ ସଙ୍ଗଠନର ସଦସ୍ୟମାନେ ଉପସ୍ଥିିତ ଥିଲେ। ସିଏସ୍ଏନ୍ଆର୍ ସଚିବ ପଣ୍ଡା ରିପୋର୍ଟର ସମୀକ୍ଷା କରିଥିଲେ।
