ବରଗଡ଼ ଅଫିସ୍,୧୯।୪: ଲକ୍ ଡାଉନ ସମୟରେ ଘରେ ବସି ନିଜର ଇଚ୍ଛାଶକ୍ତି, ପ୍ରୟାସରେ ଏକ ସାନିଟାଇଜର୍ ମେଶିନ ତିଆରି କରି ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି ବରଗଡ଼ ଜିଲା କଲାପାଣି ଗ୍ରାମର ଚାଷୀ ତଥା ଯୁବ ଇଞ୍ଜିନିୟର ସିଏଚ୍. କଲ୍ୟାଣ କୁମାର । କଲ୍ୟାଣ କୁମାର ଇଞ୍ଜିନିୟରିଂ ପଢ଼ିଛନ୍ତି। ତାଙ୍କର ଏକ ଟ୍ରାକ୍ଟର ସୋ ରୁମ୍ ରହିଛି। ସେ ଚାଷବାସ ମଧ୍ୟ କରିଛନ୍ତି । ନିଜର ଦୁଇଜଣ ସହଯୋଗୀଙ୍କ ସହିତ ସେ ଏହି ମେଶିନ ତିଆରି କରିଥିବା କହିଛନ୍ତି । ପାଣି ଟାଙ୍କି, ପାଣି ପାଇପ୍, ଔଷଧ ସିଞ୍ଚନ ଯନ୍ତ୍ର, ମୋଟର ବ୍ୟବହାର କରି ସେ ଏହି ମେଶିନ ତିଆରି କରିଛନ୍ତି । ଏଥିପାଇଁ ୩୫ହଜାର ଟଙ୍କା ଖର୍ଚ୍ଚ ହୋଇଛି ବୋଲି କଲ୍ୟାଣ କୁମାର ପ୍ରକାଶ କରିଛନ୍ତି । କରୋନା(କୋଭିଡ୍-୧୯) ଭୂତାଣୁ ସଂକ୍ରମଣ ମହାମାରୀ ରୂପ ନେଇଛି ଏବଂ ଏହାକୁ ପ୍ରତିହତ କରିବାକୁ ହେଲେ ସାନିଟାଇଜିଂର ଆବଶ୍ୟକତା ରହିଛି । ସେଥିପାଇଁ ସେ ଏହି ମେଶିନ ତିଆରି କରିଛନ୍ତି। କରୋନା ଭୂତାଣୁ ପ୍ରତିହତରେ ତାକୁ ବ୍ୟବହାର କରିବା ପାଇଁ ପ୍ରଶାସନକୁ ତାହା ପ୍ରଦାନ କରିଥିବା କଲ୍ୟାଣ କୁମାର କହିଛନ୍ତି । ଜିଲା ଯୋଜନା କମିଟି ଅଧ୍ୟକ୍ଷ ତଥା ବରଗଡ଼ ବିଧାୟକ ଦେବେଶ ଆଚାର୍ଯ୍ୟ ଶନିବାର ଏହି ମେଶିନର ଶୁଭାରମ୍ଭ କରିଛନ୍ତି । ଉକ୍ତ ମେଶିନରେ ମାତ୍ର ଘଣ୍ଟାକ ମଧ୍ୟରେ ଗୋଟିଏ ଗ୍ରାମକୁ ସାନିଟାଇଜିଂ ତଥା ବିଶୋଧିତ କରାଯାଇ ପାରିବ ବୋଲି ସୂଚନା ଦିଆଯାଇଛି । କରୋନା ବିପର୍ଯ୍ୟୟ ସମୟରେ କଲ୍ୟାଣ କୁମାରଙ୍କ ଏଭଳି ପ୍ରୟାସକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
