ନୈନିତାଲ,୮।୪: କରୋନା ସଂକ୍ରମଣକୁ ରୋକିବା ପାଇଁ କେତେକ ସଚେତନତା ପଦକ୍ଷେପ ଗ୍ରହଣ କରାଯାଉଛି। କରୋନା ଭୂତାଣୁକୁ ନଷ୍ଟ କରିବା ଲାଗି ରାସ୍ତାଘାଟରେ ସାନିଟାଇଜର୍ ସ୍ପ୍ରେ କରାଯାଉଛି। ତେବେ ଏହାଦ୍ୱାରା ଆଗାମୀ ଦିନରେ ପରିବେଶ ସନ୍ତୁଳନ ବିଗିଡ଼ିଯିବାର ଆଶଙ୍କା ଦେଖାଦେଇଥିବା ଏକ ରିପୋର୍ଟରେ ପ୍ରକାଶ ପାଇଛି। ସାନିଟାଇଜର୍ ସ୍ପ୍ରେ କରିବା ଯୋଗୁ ବହୁ କୀଟ,ପତଙ୍ଗ, ପ୍ରଜାପତି ଏବଂ ମହୁମାଛି ପ୍ରଜାତି ଉପରେ ଖରାପ ପ୍ରଭାବ ପଡ଼ିବାର ଆଶଙ୍କା ସୃଷ୍ଟି ହୋଇଛି। ହୁଏତ ଏଭଳି ପ୍ରଜାତି ସମ୍ପୂର୍ଣ୍ଣ ଲୋପ ପାଇଯିବେ ବୋଲି ପରିବେଶ୍ବିତ୍ ମତପୋଷଣ କରିଛନ୍ତି। ଭାରତ ସରକାରଙ୍କ ନିର୍ଦ୍ଦେଶକ୍ରମେ ଗାଁଠାରୁ ଆରମ୍ଭ କରି ସହର ପର୍ଯ୍ୟନ୍ତ ସାନିଟାଇଜର୍ ସ୍ପ୍ରେ କରାଯାଉଛି। ଏହାଯୋଗୁ ଆଗାମୀ ଦିନରେ ବହୁ ଅସୁବିଧା ଦେଖାଦେବ ବୋଲି ଉତ୍ତରାଖଣ୍ଡରେ ଆରମ୍ଭ ହୋଇଥିବା ମୈତି ଆନ୍ଦୋଳନର ସଂସ୍ଥାପକ ପଦ୍ମଶ୍ରୀ କଲ୍ୟାଣ ସିଂ ରାଓ୍ବତ ପ୍ରକାଶ କରିଛନ୍ତି। ଲୋକଙ୍କ ମଧ୍ୟରେ କରୋନା ସଂକ୍ରମଣ ଆତଙ୍କ ଯୋଗୁ ଏଭଳି କରାଯାଉଛି। ଏହାଦ୍ୱାରା କରୋନା ସଂକ୍ରମଣ ତ ଥମି ଯିବ ମାତ୍ର ପରବର୍ତ୍ତୀ ସମୟରେ ପରିବେଶ ସନ୍ତୁଳନ ହରାଇ ବସିବ ବୋଲି ସେ କହିଛନ୍ତି।
