ପାରାଦୀପ,୫ା୮(ସ୍ବ.ପ୍ର.): ପାରାଦୀପ ତୈଳ ବିଶୋଧନାଗାର ରାସ୍ତାରେ ଫାଟକ ଲଗାଇବାକୁ ନେଇ ୨ବର୍ଷ ତଳେ ଅନେକ ବିବାଦ ମୁଣ୍ଡ ଟେକିଥିଲା। ଏପରି କି ଇଡ୍କୋ ଉକ୍ତ ଫାଟକକୁ ନେଇ ଆପତ୍ତି ଉଠାଇବା ସହ ରାସ୍ତାକୁ ମୁକ୍ତ ରଖିବାକୁ ସେତେବେଳେ ବିଶୋଧନାଗାର କର୍ତ୍ତୃପକ୍ଷଙ୍କୁ ଚିଠି କରିଥିଲା। ଫଳରେ ଉକ୍ତ ରାସ୍ତା ସମସ୍ତଙ୍କ ପାଇଁ ଉନ୍ମୁକ୍ତ ରଖାଯାଇଥିଲା। ଏବେ ପୁଣି ରାସ୍ତାରେ ଫାଟକ ଲଗାଯିବା ସହ ସାଧାରଣ ଲୋକଙ୍କ ପାଇଁ ଯାତାୟାତ ବନ୍ଦ କରାଯାଇଛି। ସାଧାରଣ ଲୋକଙ୍କ ଯାତାୟାତ ପାଇଁ ବିଶୋଧନାଗାର କର୍ତ୍ତୃପକ୍ଷ ପ୍ରଶାସନିକ ଭବନ ପଛପଟେ ଏକ ବାଇପାସ୍ ରାସ୍ତା କରିଛନ୍ତି। ଉକ୍ତ ରାସ୍ତା ଅଭୟଚାନ୍ଦପୁର ଥାନା ପାଖରୁ ପ୍ରଶାସନିକ ଭବନ ପଛ ଦେଇ ତ୍ରିଲୋଚନପୁର ଗ୍ରାମ ସୀମାକୁ ସଂଲଗ୍ନ ହୋଇଛି। ଏହି ବାଇପାସ ନିର୍ମାଣ ହେବା ଓ ବିଶୋଧନାଗାର ରାସ୍ତା ବନ୍ଦ ହେବା ପରେ ପ୍ରଶାସନିକ ଭବନ ଏବେ ସୁରକ୍ଷା ବଳୟ ଭିତରେ ରହିଯାଇଛି। ଏହା ଦ୍ୱାରା ଆଉ କୌଣସି ସଙ୍ଗଠନ ସେହି ସ୍ଥାନରେ ବିରୋଧ କରିପାରିବେ ନାହିଁ। ସୂଚନାଯୋଗ୍ୟ, ଚଣ୍ଡିଖୋଲ-ପାରାଦୀପ ୫ନଂ.(କ) ଜାତୀୟ ରାଜପଥଠାରୁ ବିଶୋଧନାଗାର ପ୍ରଶାସନିକ ଭବନ ୮କିମି। ଏହି ରାସ୍ତାର ଆରମ୍ଭସ୍ଥଳକୁ ଜିରୋ ପଏଣ୍ଟ କୁହାଯାଏ। ବିଶୋଧନାଗାର ପ୍ରକଳ୍ପ ସମ୍ପୂର୍ଣ୍ଣ ନିଷିଦ୍ଧାଞ୍ଚଳ। ଏହାର ୫ଟି ପ୍ରବେଶ ପଥ ରହିଛି। ୪ନଂ. ଗେଟ୍ ସମ୍ମୁଖରେ ବିଶୋଧନାଗାର ପ୍ରଶାସନିକ ଭବନ। ସେହି ରାସ୍ତା ପାଖରେ ଅଭୟଚାନ୍ଦପୁର ଥାନା, ବ୍ୟାଙ୍କ, ପୋଷ୍ଟ ଅଫିସ, ସିଆଇଏସ୍ଏଫ୍ କମ୍ପ୍ଲେକ୍ସ ଓ ୨୨ ରାଜସ୍ବ ଗ୍ରାମର ଲୋକେ ଯାତାୟାତ କରନ୍ତି। ଉକ୍ତ ରାସ୍ତାକୁ ବିଶୋଧନାଗାର ପକ୍ଷରୁ ନିର୍ମାଣ କରାଯାଇଛି। ପ୍ରଶାସନିକ ଭବନ ପାଖରେ ପ୍ରଧାନମନ୍ତ୍ରୀଙ୍କ ବିଶୋଧନାଗାର ଲୋକାର୍ପଣ କାର୍ଯ୍ୟକ୍ରମ ହୋଇଥିଲା। ସେହି ରାସ୍ତାର ୪ନଂ.ଗେଟ୍ ପାଖରେ ବିଶୋଧନାଗାର ଏକ ବିଶାଳ ଫାଟକ କରିଛି। ଏଥିସହ ପ୍ରଶାସନିକ ଭବନର ଅପରପାର୍ଶ୍ୱ ତ୍ରିଲୋଚନପୁର ଗ୍ରାମ ସୀମାରେ ମଧ୍ୟ ଫାଟକ କରାଯାଇଛି। ଏହି ବ୍ୟବସ୍ଥାରେ ଏବେ କୌଣସି ସାଧାରଣ ଲୋକ ବିଶୋଧନାଗାର ଅଫିସକୁ ଯିବା ସହଜ ନୁହେଁ। ୩୩୪୪ ଏକର ବିଶିଷ୍ଟ ବିଶୋଧନାଗାର ପ୍ରକଳ୍ପ ଆରମ୍ଭ ବେଳେ ଯେଭଳି ଅବାଧ ପ୍ରବେଶ ଥିଲା, ଏବେ ତାହା ସମ୍ପୂର୍ଣ୍ଣ ବିପରିତ। ଅର୍ଥାତ୍ ସେହି ଅଞ୍ଚଳକୁ ପ୍ରବେଶ କରିବା ଆଦୌ ସମ୍ଭବ ନୁହେଁ। ଏ ପରିକି ପ୍ରକଳ୍ପ ଭିତରକୁ ମୋବାଇଲ, ବାଇକ ସମ୍ପୂର୍ଣ୍ଣ ନିଷେଧ। ୪ ଚକିଆ ଯାନ ପ୍ରବେଶ ପାଇଁ ମଧ୍ୟ କଟକଣା। ଯେଉଁ କାରର ସାଇଲେନ୍ସର ପାଇପ ଆଗରେ ଆଗ୍ନିକ ଡବା (ଢୋଲକି) ନ ଥିବ ତାହା ମଧ୍ୟ ଯାଇପାରିବ ନାହିଁ। ତେବେ ଆଗାମୀ ଦିନରେ ଏହାର ପ୍ରଭାବ ସଙ୍ଗଠନ ଉପରେ କିପରି ପଡୁଛି ଦେଖିବାକୁ ରହିଲା।
